អភិបាលរងខេត្ដតាកែវ បានជំរុញដល់លោកគ្រូជំនាញកីឡា ត្រូវបន្តពង្រឹងលើការបង្វឹកបង្ហាត់អំពីបច្ចេកទេសលេងកីឡា និងច្បាប់នៃកីឡាបន្ថែមទៀត
(តាកែវ)៖ ការប្រកួតកីឡាជ្រើសរើសជើងឯកសិស្សមធ្យមសិក្សាថ្នាក់ខេត្ត ប្រចាំឆ្នាំ២០២៤-២០២៥ របស់ខេត្ត តាកែវ បានដំណើរការប្រកួតហើយ ដោយមាន១០ក្រុង ស្រុក ក្នុងខេត្ត តាកែវ ចូលរួម។
នេះបើតាមរបាយការណ៍ លោក ឡោ វីរិទ្ធ ប្រធានមន្ទីរអប់រំយុវជន និងកីឡាខេត្ដបានអោយដឹងក្នុងពិធីបើក ។ ប្រធានមន្ទីរខាងលើ បានគូសបញ្ជាក់ទៀតថា ១០ក្រុងស្រុកចូលរួម មានកីឡាករកីឡាការិនី សរុប ៨២៥នាក់ ដោយចាប់ផ្ដើមប្រកួតចាប់ពីថ្ងៃទី ២៦ ដល់ថ្ងៃទី២៩ ខែមីនា ឆ្នាំ២០២៥ មានវិញ្ញាសារកីឡាបាល់ទាត់យុវជន ១០ក្រុម បាល់ទាត់យុវនារី ១០ក្រុម បាត់ទះយុវជន មាន ១០ក្រុម បាល់ទះយុវនារី ០៨ក្រុម បាល់បោះយុវជនមាន ៥ក្រុម បាល់បោះយុវនារី ០៦ក្រុម អត្តពលកម្មកុមារា ០៦ក្រុម ប៉េតង់ប៊ូលយុវជន ០៩ក្រុម និងប៉េតង់ប៊ូលយុវនារី ចំនួន ០៨ក្រុម ។
ថ្លែងនៅក្នុងពិធីបើក លោកស្រី គា សុភូ អភិបាលរងខេត្ដតាកែវ បានជំរុញដល់លោកគ្រូជំនាញកីឡា ត្រូវបន្តពង្រឹងលើការបង្វឹកអំពីបច្ចេកទេសលេងកីឡា និងច្បាប់ នៃកីឡាបន្ថែមទៀត ដើម្បីអោយកីឡាករនិមួយៗមានសមត្ថភាពពិត និងបានយល់ដឹងអំពីច្បាប់ទម្លាប់ពីកីឡា ជៀសវាងកើតឡើងនៅកាយវិកាមិនសមរម្យធ្វើអោយខូចកិត្តិយសដល់ខ្លួនឯងនិងសាលារៀនផងដែរ។
សូមជម្រាបថា ការប្រកួតកីឡាជ្រើសរើសជើងឯកសិស្សកម្រងមធ្យមសិក្សាឆ្នាំ២០២៤ ២០២៥នេះ គេសង្កេតឃើញថា មានការចូលរួមទស្សនាគាំទ្រច្រើនជាងសពដង ដែលនេះឆ្លុះបញ្ចាំងអោយឃើញពីសកម្មភាពកីឡានៅក្នុងខេត្ដចាប់ផ្ដើមរីកលូតលាស់ឡើងវិញ ទាំងអ្នកគាំទ្រកីឡា និងការចូលរួមលេងកីឡាពីសំណាក់ក្មួយៗសិស្សានុសិស្ស យុវជន មហាជន នាំគ្នាលេងកីឡា ដើម្បីសុខភាព មិត្តភាព កីឡាក្រោមម្លប់សន្កិភាព ៕
ដោយ ៖ ជាវ ចន្ធូ
