(ភ្នំពេញ)៖ បណ្ឌិត្យសភា បច្ចេកវិទ្យា ឌីជីថល កម្ពុជា អគ្គនាយកដ្ឋានបច្ចេកវិទ្យាគមនាគមន៍និងព័ត៌មាន និងក្រុមការងារបញ្ញាសិប្បនិម្មិត នៃក្រសួងប្រៃសណីយ៍ និងទូរគមនាគមន៍ ក.ប.ទ កាលពីថ្ងៃទី២៧ ខែមីនា ឆ្នាំ២០២៥ បានរៀបចំសិក្ខាសាលាផ្សព្វផ្សាយ​និងប្រមូលធាតុចូលលើកទី២ ស្ដីពី “ការ រៀបចំ យុទ្ធសាស្ត្រ ជាតិ ស្ដីពី បញ្ញាសិប្បនិម្មិត” ក្រោមប្រធានបទ “កិច្ចពិភាក្សា នៃ សហគមន៍ អ្នក បច្ចេកទេស បញ្ញាសិប្បនិម្មិត” ដើម្បីបញ្ជ្រាបចំណេះដឹងពាក់ព័ន្ធ​នឹងការវិវត្តនិង វឌ្ឍនភាពស្រាវជ្រាវ នៃបញ្ញាសិប្បនិម្មិត​នៅកម្ពុជា, បង្ហាញគម្រោងបញ្ញា​សិប្បនិម្មិតមួយ​ចំនួន​ដែលកំពុងអនុវត្តនៅក្នុង ក.ប.ទ. និងធ្វើកិច្ចពិភាក្សាស្តីពី​ទិន្នន័យ និង សំណុំ ធនធាន បច្ចេកទេស ដើម្បី ជំរុញ ការ អភិវឌ្ឍ បញ្ញាសិប្បនិម្មិត នៅកម្ពុជា ព្រមទាំងប្រមូលមតិ​យោបល់នានាពីសិក្ខាកាមដែលបានអញ្ជើញមកពីបណ្តាក្រសួង ស្ថាប័ន គ្រឹះស្ថានអប់រំនិងស្រាវជ្រាវ សហគមន៍អ្នក​ជំនាញ អ្នកបច្ចេកទេស និងតួអង្គពាក់ព័ន្ធនានាក្នុងវិស័យ​សាធារណៈនិងវិស័យឯកជន ដែលមានសរុបប្រមាណ 150នាក់។

ឯកឧត្តម ហាក់ សុខហេង អនុរដ្ឋលេខាធិការ ក.ប.ទ. បានបន្តដោយបទបង្ហាញចំនួន ៤ លើប្រធានបទ 1-“សាវតារ និង វឌ្ឍនភាព ការស្រាវជ្រាវ បញ្ញាសិប្បនិម្មិត នៅកម្ពុជា” ដោយ ឯកឧត្ដម សេង សុភាព ប្រធាន បណ្ឌិត្យសភាបច្ចេកវិទ្យា ឌីជីថល កម្ពុជា, ២-“ការ អភិវឌ្ឍ TranslateKH” ដោយ លោក ឡាយ អជដេត អ្នកជំនាញ​ជាន់ខ្ពស់ បញ្ញាសិប្បនិម្មិត ក.ប.ទ., ៣-“ការ អភិវឌ្ឍ Khmer Braille Translator” ដោយ លោកបណ្ឌិត លី រតនា ប្រធានផ្នែក ស្រាវជ្រាវ និងអភិវឌ្ឍ នៃ​​បណ្ឌិត្យ​សភា បច្ចេកវិទ្យា ឌីជីថល កម្ពុជា និង ៤-“ទស្សនៈមួយចំនួន ពាក់ព័ន្ធនឹង គម្រោង អភិវឌ្ឍ Khmer LLM” លោក​បណ្ឌិត អ៊ិន សុវណ្ណ ប្រធាននាយកដ្ឋាន បរិវត្តកម្ម រដ្ឋាភិបាល ឌីជីថល នៃអគ្គលេខាធិការដ្ឋាន​គណៈ​កម្មាធិការ រដ្ឋាភិបាល ឌីជីថល អមដោយកិច្ចពិភាក្សា​លើប្រធានបទ “ទិន្នន័យ និង សំណុំ ធនធាន បច្ចេកទេស ដើម្បី ជំរុញ ការ អភិវឌ្ឍ បញ្ញាសិប្បនិម្មិត នៅកម្ពុជា” ដែលទទួលបានការសាកសួរជាច្រើនពីសិក្ខាកាម។

ក្នុងនោះដែរ ឯកឧត្ដម សេង សុភាព ប្រធាន បណ្ឌិត្យ​សភា​បច្ចេកវិទ្យា ឌីជីថល កម្ពុជា បានផ្តល់កិត្តិយសបិទ​សិក្ខា​សាលាដោយជោគជ័យល្អប្រសើរផងដែរ៕

ដោយ ៖ ង៉ាន់ ទិត្យ