លោកជំទាវ សេង សុមេត្តា ៖ សៀវភៅគោលការណ៍ណែនាំ ស្តីពីការគ្រប់គ្រងហិរញ្ញវត្ថុសាធារណៈ គឺជាឯកសារគោល និងជាឯកសារតម្រង់ទិស ធានាប្រសិទ្ធភាព តម្លាភាព នៃការរៀបចំថវិកានិងការគ្រប់គ្រងហិរញ្ញវត្ថុ
(ព្រះសីហនុ)៖ លោកជំទាវ សេង សុមេត្តា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា សៀវភៅគោលការណ៍ណែនាំ ស្តីពីការគ្រប់គ្រងហិរញ្ញវត្ថុសាធារណៈ គឺជាឯកសារគោល និងជាឯកសារតម្រង់ទិសដល់គ្រប់អង្គភាពថវិកាក្រោមឱវាទរបស់ក្រសួងរៀបចំដែនដី នគរូបនីយកម្ម និងសំណង់ ទាំងអស់ ឱ្យអនុវត្តសំដៅធានាប្រសិទ្ធភាព តម្លាភាពនៃការរៀបចំថវិកានិងការគ្រប់គ្រងហិរញ្ញវត្ថុរបស់ក្រសួង ។
នេះជាប្រសាសន៍លើកឡើងរបស់លោកជំទាវ សេង សុមេត្តា ក្នុងឱកាសអញ្ជើញបិទសិក្ខាសាលាស្តីពីការផ្សព្វផ្សាយ និងការដាក់ឱ្យអនុវត្តគោលការណ៍ណែនាំស្តីពីការគ្រប់គ្រងហិរញ្ញវត្ថុសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ នាល្ងាចថ្ងៃទី២៨ ខែមីនា ឆ្នាំ២០២៥ នៅសណ្ឋាគារសុខា ខេត្តព្រះសីហនុ ។
លោកជំទាវ សេង សុមេត្តា បានថ្លែងនូវការកោតសរសើរ និងវាយតម្លៃខ្ពស់ចំពោះសមិទ្ធផលដ៏នៃដំណើរការសិក្ខាសាលាដ៏មានសារៈសំខាន់នេះ សម្រាប់ជាឧបករណ៍ជួយតម្រង់ទិសក្នុងការគ្រប់គ្រង និងការប្រមូលចំណូល ការរៀបចំផែនការថវិកា ការប្រើប្រាស់ថវិកា ការអនុវត្តនីតិវិធីលទ្ធកម្មសាធារណៈ ការគ្រប់គ្រងទ្រព្យសម្បត្តិរដ្ឋ យន្តការតាមដានវាយតម្លៃលើការប្រើប្រាស់ថវិកា និងសមិទ្ធកម្មជាដើម ។ យ៉ាងណាមិញ គោលការណ៍ណែនាំនេះ គឺជាមូលដ្ឋានក្នុងការអនុវត្ត ប៉ុន្តែវាអាចមានការប្រែប្រួលទៅតាមបរិបទថ្មីៗរបស់រាជរដ្ឋាភិបាល ក៏ដូចជាទិសដៅរបស់គណៈកម្មាធិការដឹកនាំការងារកែទម្រង់ការគ្រប់គ្រងហិរញ្ញវត្ថុសាធារណៈ (PFM) ។
លោកជំទាវរដ្ឋលេខាធិការ គូសបញ្ជាក់ថា សិក្ខាសាលានេះមិនត្រឹមតែជាកិច្ចការផ្សព្វផ្សាយអំពីសារៈសំខាន់នៃគោលការណ៍ណែនាំការគ្រប់គ្រងហិរញ្ញវត្ថុសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ ប៉ុណ្ណោះទេ ប៉ុន្តែព្រឹត្តិការណ៍នេះបានជួយផ្សារភ្ជាប់និងបង្កើនទំនាក់ទំនងក្នុងនាមជាសហការី និងជាគ្រួសាររបស់ក្រសួង ដើម្បីស្វែងយល់ពីគ្នាទៅវិញទៅមក និងបានដោះស្រាយនូវបញ្ហាប្រឈមមួយចំនួន ដែលបានឆ្លងកាត់និងកំពុងជួបប្រទះពាក់ព័ន្ធនឹងការងារហិរញ្ញវត្ថុសាធារណៈនេះ រួមមាន ការងាររៀបចំថវិកា ការងារប្រមូលចំណូល ការងារលទ្ធកម្ម ការងារទូទាត់ចំណាយ និងការងាររៀបចំរបាយការណ៍ ។
ជាមួយគ្នានេះ លោកជំទាវជឿជាក់ថា សិក្ខាសាលានេះ គ្រប់អង្គភាពថវិកាទាំងអស់ ទាំងថ្នាក់កណ្តាល និងថ្នាក់មូលដ្ឋានតាមរយៈមន្ទីររៀបចំដែនដី នគរូបនីយម្ម សំណង់ និងសុរិយោដី រាជធានីខេត្ត នឹងបន្តចូលរួមខិតខំប្រមូលចំណូលមិនមែនសារពើពន្ធ ផ្តល់សេវាគាប់ជិតជូនប្រជាពលរដ្ឋ អនុវត្តការងារហិរញ្ញវត្ថុដែលបានកំណត់ក្នុងគោលការណ៍ណែនាំស្តីពីការគ្រប់គ្រងហិរញ្ញវត្ថុសាធារណៈរបស់ក្រសួងដែនដី នគរូបនីយកម្ម និងសំណង់ ប្រកបដោយឆន្ទៈ វិជ្ជាជីវៈ និងស្មារតីទទួលខុសត្រូវខ្ពស់ ។
លោកជំទាវ សេង សុមេត្តា បានគូសបញ្ជាក់ថា ក្នុងដំណើរដ៏លំបាកនិងវែងឆ្ងាយរបស់កម្ពុជា ផ្តើមចេញពីការតស៊ូរំដោះជាតិ ការទប់ស្កាត់ការវិលត្រឡប់ នៃរបបប្រល័យពូជសាសន៍ ការស្តារនិងកសាងប្រទេសពីបាតដៃទទេ ការចរចាស្វែងរកសន្តិភាពរហូតដល់ការបញ្ចប់ សង្គ្រាមរ៉ាំរ៉ៃ ការបង្រួបបង្រួមផ្សះផ្សាជាតិ ឯកភាពជាតិ ឯកភាពទឹកដី និងសុខសន្តិភាពតាមរយៈ នយោបាយ ឈ្នះឈ្នះ រួមជាមួយនឹងជោគជ័យនៃការអនុវត្តយុទ្ធសាស្ត្រត្រីកោណនិងចតុកោណជាបន្តបន្ទាប់ កម្ពុជាសម្រេចបានកំណើន សេដ្ឋកិច្ចខ្ពស់ជាមធ្យម ៧,៧% ក្នុងរយៈពេលជាង២ទសវត្សរ៍មុនវិបត្តិក្ខវីដ-១៩ ដែលធានាបានលំនឹងម៉ាក្រូសេដ្ឋកិច្ច និងដំណើរជាវិជ្ជមាន នៃបរិវត្តកម្ម និងពិពិធកម្មរចនាសម្ព័ន្ធនៃខឿនសេដ្ឋកិច្ចជាតិជាលំដាប់។
គួរបញ្ជាក់ផងដែរថា ក្នុងឆ្នាំ២០២៤ កន្លងមក ក្រសួងរៀបចំដែនដី នគរូបនីយកម្ម និងសំណង់គឺជាក្រសួងមួយ ចំណោមក្រសួង ៣ ដែលបានខិតខំរៀបចំ និងកសាងសៀវភៅគោលការណ៍ណែនាំនេះ បានរួចរាល់ ហើយក្នុងនោះក្រសួងរៀបចំដែនដី នគរូបនីយកម្ម និងសំណង់ គឺជាក្រសួងដំបូងគេបំផុតដែលបាននិងកំពុងផ្សព្វផ្សាយ និងដាក់ឱ្យអនុវត្តនាពេលនេះ ៕
ដោយ / គ្រី សម្បត្តិ
