បរទេស៖ ក្រុមអ្នកជួយសង្គ្រោះមីយ៉ាន់ម៉ា បានបរាជ័យ ក្នុងការជួយសង្គ្រោះជិវិត ស្ត្រីមានផ្ទៃពោះម្នាក់ ដែលជាប់ក្នុងអគារបាក់បែក អស់រយៈពេល៥៥ម៉ោង ក្នុងនោះ ស្ត្រីវ័យ៣៥ឆ្នាំ រូបនេះ ត្រូវបានទាញចេញពីគំនរហើយ តែ បានស្លាប់បាត់បង់ជីវិត នៅពេលក្រោយ។

ស្ត្រីមានផ្ទៃពោះម្នាក់នេះ ត្រូវបានទាញចេញពីប្លុកផ្ទះល្វែង ដែលដួលរលំ ក្នុងទីក្រុង Mandalay បន្ទាប់ពីជាង៥៥ម៉ោង នៅក្រោមគំនរបាក់បែក ប៉ុន្តែ ត្រូវបានប្រកាសថា បានស្លាប់ភ្លាមៗ បន្ទាប់ពីនោះ។ ក្រុមអ្នកជួយសង្គ្រោះបានគិតថា ពួកគេបានជួយសង្គ្រោះជីវិតរបស់ ស្ត្រី ឈ្មោះ Mathu Thu Lwin រូបនេះបាន បន្ទាប់ពីជើងរបស់នាង ត្រូវបានកាត់ផ្តាច់ ដើម្បីរំដោះនាង ប៉ុន្តែ មិនអាចជួយសង្គ្រោះនាងបានឡើយ។

អ្នកស្រីត្រូវបានទាញចេញពីការបាក់បែកនៃអគារខុនដូ Sky Villa ដែលត្រូវបានបំផ្លាញ ដោយការរញ្ជួយដីដ៏ធំមួយដែលបានវាយប្រហារប្រទេសមីយ៉ាន់ម៉ា កាលពីថ្ងៃសុក្រ។

ខុនដូ Sky Villa ស្ថិតក្នុងចំណោមអគារ ដែលរងផលប៉ះពាល់ខ្លាំងបំផុតដោយសារការរញ្ជួយដី កម្រិត ៧.៧រិចទ័រ ដែលត្រូវបានគេដឹងថា បានសម្លាប់មនុស្សប្រហែល ១,៧០០នាក់ នៅក្នុងប្រទេសមីយ៉ាន់ម៉ា។ អគារ ១២ ជាន់ ត្រូវបានកាត់បន្ថយមកនៅសល់ ត្រឹម៦ជាន់ ក្រោយកើតមានការរញ្ជួយដី៕

ប្រភពពី AFP ប្រែសម្រួល៖ សារ៉ាត