(ភ្នំពេញ)៖ រាជរដ្ឋាភិបាលកម្ពុជា បានលើកទឹកចិត្តឱ្យ​វិស័យ​ឯក​ជន​វិនិយោគ បន្ថែមលើការនាំយកនូវបច្ចេកវិទ្យា​ចុង​ក្រោយ​មកកាន់កម្ពុជា ស្របគ្នានឹងការជំរុញការបណ្តុះ​បណ្តាល និងបំពាក់បំប៉នជំនាញបច្ចេកទេស​ដល់​និយោ​ជិតខ្មែរ ព្រមទាំងពិនិត្យលទ្ធភាពក្នុងការពង្រីកការវិនិ​យោគនៅកម្ពុជា។

ឯកឧត្តម ជា វុទ្ធី បន្តថា មជ្ឈមណ្ឌលត្រួតពិនិត្យឧបករណ៍​ពិសេសនេះ ជាសមិទ្ធផលថ្មីមួយរបស់កម្ពុជា ដោយវានឹង​ក្លាយជាផ្នែកដ៏សំខាន់មួយនៃប្រព័ន្ធអេកូឡូស៊ីរបស់វិស័យឧស្សាហកម្ម អចលនទ្រព្យ និងហេដ្ឋារចនាសម្ព័ន្ធ ក្នុងការធា​នា​បានថា ឧបករណ៍ពិសេសដែលត្រូវបានប្រើប្រាស់ គឺស្រប​តាមស្តង់ដាអន្តរជាតិ និងមានសុវត្ថិភាពខ្ពស់។

ឯកឧត្តម ជា វុទ្ធី បញ្ជាក់ថា ក្រុមប្រឹក្សាអភិវឌ្ឍន៍កម្ពុជានិង​ខិត​ខំ​ប្រឹងប្រែងបន្ថែមទៀតក្នុងការផ្តល់សេវា និងការ​គាំ​ទ្រ​គ្រប់បែបយ៉ាង ដើម្បីធានាថាក្រុមហ៊ុន ដែលបណ្តាក់ទុន​វិនិយោគនៅកម្ពុជា អាចរីករលូតលាស់ជាបន្តបន្ទាប់ ។

បើតាមការអះអាងរបស់ប្រធានក្រុមប្រឹក្សាភិបាលក្រុមហ៊ុន បានឲ្យដឹងថា ការជ្រើសរើសបណ្តាក់ទុនវិនិយោគ​ក្នុងការ​បង្កើតមជ្ឈមណ្ឌលត្រួតពិនិត្យឧបករណ៍ពិសេសនៅកម្ពុជា ជាការរួមចំណែកជាមួយរាជរដ្ឋាភិបាលក្នុងការរក្សាសុវត្ថិភាព និងអាយុជីវិតរបស់ប្រជាពលរដ្ឋ ដែលប្រើប្រាស់ឧបករណ៍​ពិសេសទាំងនេះជាប្រចាំ។ ក្នុងមួយឆ្នាំ ក្រុមហ៊ុននឹងបណ្ដុះ​បណ្ដាលជំនាញដល់កម្លាំងពលកម្មនៅកម្ពុជាប្រមាណ ៣០០នាក់ ព្រមទាំងបុគ្គលិកប្រតិបត្តិការផ្ទាល់ប្រមាណ ៣ម៉ឺននាក់ ។

គួរកត់សម្គាល់ថា ការកើនឡើងនូវឧស្សាហូបនីយកម្ម ក៏ដូចជាការរីកដុះដាលនៃវិស័យអចលនទ្រព្យ និងហេដ្ឋា​រចនាសម្ព័ន្ធនៅកម្ពុជា បានធ្វើឱ្យការប្រើប្រាស់ឧបករណ៍​ពិសេសដូចជា៖ ឡចំហាយ ធុងសម្ពាធ ជណ្តើរ យន្ត គ្រឿងចក្រលើកស្ទួចទម្ងន់ធ្ងន់ ជាដើម មានការកើនឡើង​យ៉ាងគំហុក។ ក្នុងបរិការណ៍នេះ ការត្រួតពិនិត្យ និងធ្វើ​តេស្តឧបករណ៍ពិសេសនេះឱ្យបានទៀងទាត់ គឺជាការការ​ពារអាយុជីវិតរបស់កម្មករនិយោជិត ដែលប្រើប្រាស់​ឧបករ​ណ៍​ទាំងនេះជាប្រចាំ៕

ដោយ ៖ ង៉ាន់ ទិត្យ
រូបភាព រិន រចនា