បរទេស៖ ប្រទេស វ៉េណេស៊ុយអេឡា បាននិយាយ កាលពីថ្ងៃអាទិត្យថា ខ្លួនបានទទួលឧក្រិដ្ឋជនកម្រិតខ្ពស់ ជាលើកដំបូង ក្នុងចំណោមអ្នកនិរទេស ដែលបញ្ជូនមកពីសហរដ្ឋអាមេរិក មួយរយៈចុងក្រោយនេះ។

អាជ្ញាធរវេណេហ្ស៊ុយអេឡាបានរាយការណ៍ ពីការមកដល់នៃជើងហោះហើរថ្មី នៃជនចំណាកស្រុកចំនួន១៧៥នាក់ ដែលត្រូវបានបណ្តេញចេញ ដោយសហរដ្ឋអាមេរិក រួមទាំង មេដឹកនាំក្រុមក្មេងទំនើង ផងដែរ។ នេះជាលើកទីមួយហើយ ដែលរដ្ឋាភិបាលទីក្រុង Caracas បានបញ្ជាក់ថា ឧក្រិដ្ឋជនស្ថិត ក្នុងចំណោមអ្នកនិរទេស។

ប្រធានាធិបតីអាមេរិក លោក ដូណាល់ ត្រាំ បានបើកការបង្រ្កាបជនចំណាកស្រុក ចាប់តាំងពីឡើងកាន់អំណាច ក្នុងខែមករា ដោយបាននិរទេសមនុស្សរាប់រយនាក់ ទៅកាន់តំបន់អាមេរិកឡាទីន ហើយ រដ្ឋបាលរបស់លោក ត្រាំ បានចាត់ទុកថា ជា «ក្រុមក្មេងទំនើង»។

រដ្ឋមន្ត្រីមហាផ្ទៃ វ៉េណេស៊ុយអេឡា លោក Diosdado Cabello បានមានប្រសាសន៍ថា «ជាលើកដំបូង នៅក្នុងជើងហោះហើរទាំងនេះ… ជាឧក្រិដ្ឋជនកម្រិតខ្ពស់មកដល់ ដែលត្រូវបានទាមទារ ដោយប្រព័ន្ធយុត្តិធម៌ប្រទេសវ៉េណេស៊ុយអេឡា៕

ប្រភពពី AFP ប្រែសម្រួល៖ សារ៉ាត