អនុប្រធានទី២ ព្រឹទ្ធសភា ៖ ជោគជ័យនៃការ អនុវត្តគោលនយោបាយនានា គឺអាស្រ័យលើកិច្ចសហប្រតិបត្តិការ រវាងសភា រដ្ឋាភិបាល ប្រជាពលរដ្ឋ និង វិស័យឯកជន
(ភ្នំពេញ)៖ ជាទូទៅ សមាជិកសភា មានមុខងារ ៣ គឺការអនុម័តច្បាប់ ការតាមដាន និងត្រួតពិនិត្យការ អនុវត្តច្បាប់ និងមុខងារតំណាង។ ជោគជ័យនៃការ អនុវត្តគោលនយោបាយនានា គឺអាស្រ័យលើកិច្ចសហប្រតិបត្តិការ រវាងសភា រដ្ឋាភិបាល ប្រជាពលរដ្ឋ និង វិស័យឯកជន និងពេលខ្លះត្រូវការកិច្ចសហប្រតិបត្តិការកម្រិតតំបន់ និងអន្តរជាតិ។
នេះជាប្រសាសន៍លើកឡើងរបស់ ឯកឧត្តមបណ្ឌិត ធន់ វឌ្ឍនា អនុប្រធានទី២ នៃព្រឹទ្ធសភា តំណាងដ៏ខ្ពង់ខ្ពស់ សម្តេចអគ្គមហា សេនាបតីតេជោ ហ៊ុន សែន ប្រធានព្រឹទ្ធសភា ក្នុងឱកាសបិទសិក្ខាសាលាសភាថ្នាក់តំបន់ ស្តីពី « បម្រែបម្រួលប្រជាសាស្រ្ត និងជំងឺមិនឆ្លង៖ គោលនយោបាយឆ្លើយតប បញ្ហាប្រឈម សម្រាប់ប្រជាជនសកម្ម និងយុវជន » ដែលបានប្រារព្ធធ្វើឡើងរយៈពេលពេញ១ថ្ងៃ នាថ្ងៃទី៣១ ខែមីនាឆ្នាំ២០២៥ វិមានរដ្ឋសភា ។
ឯកឧត្តមបណ្ឌិត អនុប្រធានទី២នៃព្រឹទ្ធសភា ក៏បានបញ្ជាក់ថា ការកើតជំងឺមិនឆ្លង បណ្តាលមកពីកត្តាហានិភ័យចម្បងប្រាំរួមមាន៖ របបអាហារមិនមានសុខភាព (ផ្អែម ប្រៃ ខ្លាញ់) កង្វះ សកម្មភាពរាងកាយ ការប្រើ ប្រាស់ផលិតផលថ្នាំជក់ ភេសជ្ជៈថាមពល និងគ្រឿងស្រវឹង ប្រកបដោយគ្រោះ ថ្នាក់ ដោយ ឯកឧត្តមបណ្ឌិត បញ្ជាក់ថា ផ្នែកមួយនៃដំណោះស្រាយបញ្ហាសុខភាព គឺការអប់រំប្រជាពលរដ្ឋ ឱ្យចេះ និងចេះស្រាវជ្រាវ លើការថែទាំសុខភាព។
សូមជម្រាបជូនថា សិក្ខាសាលាថ្នាក់តំបន់នេះ បានលើកឡើងពីការព្រួយបារម្ភយ៉ាងខ្លាំង អំពីការកើនឡើងនៃជំងឺមិនឆ្លងនៅក្នុងប្រទេសកម្ពុជា និងអាស៊ីអាគ្នេយ៍ទាំងមូល។ អនុសាសន៍គោលនយោបាយជាក់ ស្តែងមួយចំនួនត្រូវបានស្នើឡើង រួមជាមួយនឹងផែនការ សកម្មភាពជាក់ស្តែង និងយុទ្ធនាការដូចជា “ប្រជា ជនមានសុខភាពល្អ កម្ពុជាបវរ រុងរឿង” (“Healthy Life, Healthy Cambodia”)។ ជំងឺមិនឆ្លងគឺជាបញ្ហា ឆ្លងវិស័យ ពហុវិមាត្រ និងស្មុគស្មាញ ដោយវាទាមទារដំណោះស្រាយជាប្រព័ន្ធ កិច្ចសហប្រតិបត្តិការឆ្លង វិស័យ និងវិធីសាស្ត្រពហុភាគីនៅកម្រិតជាតិ តំបន់ និងពិភពលោក។
ការដោះស្រាយបញ្ហាជំងឺមិនឆ្លងត្រូវ មានលក្ខណៈចរិតវិទ្យាសាស្ត្រ ចរិតសង្គម ចរិតវប្បធម៌ ចរិត សេដ្ឋកិច្ច និងចរិតនយោបាយ។ នីតិប្បញ្ញត្តិ ដើរតួនាទីយ៉ាងសំខាន់ក្នុងការដោះស្រាយ បញ្ហាជំងឺមិនឆ្លង ជាពិសេសតាមរយៈការអនុម័តច្បាប់ ការពង្រឹង ការតាមដានការត្រួតពិនិត្យ ការបង្កើនការបែងចែកថវិកាលើការថែទាំសុខភាព និងការលើកកម្ពស់កិច្ចសហ ប្រតិបត្តិការឆ្លងវិស័យ ៕
ដោយ ៖ ហេង សម្បត្តិ+ថេត វិចិត្រ
