ស្ទឹងត្រែង៖ សមិទ្ធផលធំៗជាច្រើនត្រូវបានកសាងឡើង បន្ទាប់ពីការចូលកាន់​តំណែង​ជាអភិបាលខេត្តស្ទឹងត្រែងរបស់ ឯកឧត្តម សរ សុពុត្រា ប្រមាណ៩ខែ​កន្លងមកនេះ។ នោះគឺកសាងហេដ្ឋារចនាសម្ព័ន្ធ ផ្លូវ ស្ពាន ការផ្គត់ផ្គង់អគ្គិសនី ប្រព័ន្ធ​ទឹកស្អាត សោភណភាពក្រុងជាដើម។

សមិទ្ធផលថ្មីសន្លាងមួយទៀតដែលកំពុងស្ថាបនាគឺ “វេទិកានាគជ័យ និងទីលាន​តេជោសន្តិភាព” ខណៈ​បច្ចុប្បន្ន​ការដ្ឋាននេះ សម្រេចបានប្រមាណ ៩៥ភាគរយ និងការដោះស្រាយបញ្ចប់វិបត្តិដីធ្លី ៣កន្លែង ដែលស្ថិតនៅចំកណ្តាល​បេះដូងខេត្ត​ស្ទឹងត្រែង (ផ្ទៃដីស្ទើរមួយចំហៀង នៃព្រះរាជដំណាក់ស្តេច ,ផ្ទៃដីស្រះឈូក នៅទល់​មុខសណ្ឋាគារ​អង្គរ​មាស ,ផ្ទៃដីស្ថានីយប្រេងឥន្ទនៈ នៅផ្នែកខាងមុខ​សាលាខេត្តស្ទឹងត្រែង) លើការកាន់កាប់របស់បុគ្គលឯកជន អស់រយៈ​ពេល​ជាច្រើនឆ្នាំកន្លងមក ដីទាំងនោះត្រូវបានយកមកដាក់ជាសម្បត្តិរដ្ឋ សម្រាប់ការ​អភិវឌ្ឍសាធារណៈ។

ឯកឧត្តម សរ សុពុត្រា អភិបាលខេត្តស្ទឹងត្រែងមានប្រសាសន៍ឱ្យដឹងកាលថ្ងៃទី​៣០ ខែមីនា ឆ្នាំ២០២៥ ថា ក្រោយការដោះ​ស្រាយបញ្ចប់ក្រោមគោលការណ៍ “ឈ្នះ-ឈ្នះ” ខេត្តស្ទឹងត្រែងនឹងកាន់តែស្អាត និងមានសណ្តាប់ធ្នាប់កាន់តែ​ល្អ​ប្រសើរ​ថែមទៀត។

ដំណោះស្រាយឈ្នះ-ឈ្នះ គឺដីមួយផ្នែកនៃព្រះរាជដំណាក់ស្តេច និងដីស្រះឈូក នៅទល់មុខសណ្ឋាគារអង្គរមាស ត្រូវបាន​ចុះបញ្ជីដីធ្លីចេញប្លង់រឹងតម្កល់ទុកជា​សម្បត្តិរដ្ឋ។ដោយឡែកផ្ទៃដីស្ថានីយប្រេងឥន្ទនៈ ខណៈបច្ចុប្បន្ន ក៏កំពុងពន្លឿន​លើ​ការ​ចុះ​បញ្ជីដីធ្លី និងរុះរើស្ថានីយប្រេងនោះចេញដើម្បីប្រែក្លាយទីតាំងនោះ ឱ្យក្លាយជាសួនច្បារដ៏ប្រណិត សម្រាប់​ប្រជាពល​រដ្ឋក្នុងមូលដ្ឋាន ភ្ញៀវទេសចរ​ជាតិ និងអន្តរជាតិ ចូលមកទស្សនាខេត្តស្ទឹងត្រែង៕
ដោយ៖ឡុង សំបូរ