ពលករខ្មែរនៅប្រទេសថៃ វិលត្រឡប់មកស្រុកកំណើតជាបណ្តើរៗ ដើម្បីត្រៀម ចូលរួមបុណ្យចូលឆ្នាំថ្មី
បាត់ដំបង៖នៅច្រកទ្វារអន្តរជាតិដូង នៃស្រុកកំរៀង ខេត្តបាត់ដំបង ជាការកត់សម្គាល់ចាប់តាំងពីដើមខែមេសាមក ប្រជាពលរដ្ឋ ជាពលករខ្មែរធ្វើការនៅប្រទេសថៃបានចាប់ផ្តើមនាំគ្នាធ្វើដំណើរវិលត្រឡប់មកកាន់ស្រុកកំណើតរជាបណ្តើរៗ ខណៈច្រកដទៃទៀត ដែលមានព្រំដែនជាប់ជាមួយប្រទេសថៃ ក៏បានសភាពស្រដៀងៗគ្នានេះដែរ គ្រាន់តែមានចំនួនតិច ឬច្រើនប៉ុណ្ណោះ ។
សមត្ថកិច្ចប្រចាំច្រកទ្វារព្រំដែនអន្តរជាតិដូង ស្រុកកំរៀង ខេត្តបាត់ដំបងបានឱ្យដឹងថា ចាប់ពីថ្ងៃទី១ ខែមេសា ឆ្នាំ២០២៥មក វត្តមានពលករខ្មែរដែលចេញទៅធ្វើការនៅប្រទេសថៃបានវិលត្រឡប់ចូលមកកម្ពុជាវិញជាបន្តបន្ទាប់ខុសប្លែកពីថ្ងៃធម្មតា ។លំហូរពលករវិលត្រលប់មិនខុសពីបណ្ដាឆ្នាំមុនដែរ គឺនៅក្នុងឱកាសបុណ្យចូលឆ្នាំថ្មីប្រពៃណីជាតិ ជិតមកដល់ ពលករខ្មែរតែងតែធ្វើដំណើរវិលមកស្រុកកំណើតវិញដើម្បីជួបជុំសាច់ញាតិដើម្បីប្រារព្ធចូលឆ្នាំថ្មី។
នៅច្រកទ្វារព្រំដែនអន្តរជាតិដូង ដដែលគ្រាន់តែរយៈពេលពីរថ្ងៃពីថ្ងៃទី១ និងទី២ ខែមេសា មានពលករខ្មែរជិត៥ពាន់នាក់បានធ្វើដំណើរចូលតាមច្រកនេះ ស្របគ្នាការលើកលែងតម្លៃសេវាការអនុញ្ញាតចេញ-ចូល ប្រទេសថៃ អំឡុងពេលបុណ្យចូលឆ្នាំថ្មី ដែលបានចាប់ផ្តើមអនុវត្តពីថ្ងៃទី១ ខែមេសារហូតដល់ថ្ងៃទី១៥ ខែឧសភា ។
តាមរយៈនៃការវិលត្រឡប់មកកាន់ស្រុកកំណើតវិញរបស់បងប្អូនពលករប្រកបដោយទឹកមុខសប្បាយរីករាយស្រស់ស្រាយ ចំពោះការគិតគូររបស់រាជរដ្ឋាភិបាលដល់សុខទុក្ខរបស់បងប្អូនជាពលករចំណាកស្រុក។ទន្ទឹមនេះសមត្ថកិច្ចប្រចាំច្រកព្រំដែនទាំងភាគីថៃ និងកម្ពុជា បានបង្កលក្ខណៈងាយស្រួលក្នុងការផ្តល់សេវាលឿនរហ័ស ។ពិសេសការរៀបចំសណ្តាប់ធ្នាប់។
បុណ្យចូលឆ្នាំថ្មីប្រពៃណីជាតិនឹងមកដល់នៅថ្ងៃទី១៤ ខែមេសា ខាងមុខ។ខេត្តបាត់ដំបង មានច្រកអន្តរជាតិមួយទៀតគឺច្រកភ្នំដី ។
សូមបញ្ជាក់ថារាជរដ្ឋាភិបាលនៃព្រះរាជាណាចក្រថៃឡង់ដ៍ បានឯកភាពតាមសំណើរបស់ក្រសួងការងារថៃ ពីការលើកលែងតម្លៃសេវា ការអនុញ្ញាត(ចេញ-ចូល) ប្រទេសថៃ(Re-Entry Permit)ដល់ពលករខ្មែរ ឡាវ និង ភូមា ក្នុងអំឡុងពេលបុណ្យចូលឆ្នាំថ្មីប្រពៃណីជាតិ ចាប់ពីថ្ងៃទី១ខែមេសា ដល់ថ្ងៃទី១៥ខែឧសភា ឆ្នាំ២០២៥។
ការលើកលែងតម្លៃសេវានេះគឺផ្ដល់ជូនតែមួយដងគត់ ដល់ពលករខ្មែរដែលមានលិខិតឆ្លងដែន/លិខិតធ្វើដំណើរ ពលករកម្ពុជា ទៅធ្វើការនៅបរទេស (TD) និងមានទិដ្ឋាការ ការងារ(Non-Immigration L-A_Visa) ដែលមានសុពលភាពលើសពីថ្ងៃទី១៥ ខែឧសភា ឆ្នាំ២០២៥។ការលើកលែងនេះបូករួមទាំងកូនអាយុក្រោម១៨ឆ្នាំ ដែលទទួលបានការវាយត្រាប្រភេទអ្នកក្នុងបន្ទុកនិងមានលិខិតអនុញ្ញាតឱ្យស្នាក់នៅក្នុងប្រទេសថៃលើសពីថ្ងៃទី១៥ ខែឧសភាឆ្នាំ២០២៥ ពលករខ្មែរធ្វើការប្រទេសថៃមានចំនួនជាច្រើនម៉ឺននាក់៕
អត្ថបទ-រូបភាព ៖ អ៊ុក សំអាន បប.
