រដ្ឋមន្ត្រីការងារ ចាត់ទុកបញ្ជាការដ្ឋានអង្គរក្ស ជាកម្លាំងស្នូល នៃ ខ.ភ.ម ដែលបានរួមចំណែក ក្នុងកិច្ចការពារសុវត្ថិភាពថ្នាក់ដឹកនាំ
(កណ្ដាល)៖ រដ្ឋមន្ត្រីក្រសួងការ បានចាត់ទុកបញ្ជាការដ្ឋានអង្គរក្ស គឺជាកម្លាំងស្នូល នៃ កងយោធពលខេមរភូមិន្ទ ដែលបានចូលរួមចំណែកយ៉ាងសំខាន់ ក្នុងកិច្ចការការពារសុវត្ថិភាព សន្តិសុខរបស់ថ្នាក់ដឹកនាំ ប្រមុខរាជរដ្ឋាភិបាលកម្ពុជា ។ ឯកឧត្តម ហេង សួរ បានថ្លែងដូច្នេះ ក្នុងឱកាសអញ្ជើញសំណេះសំណាល ជាមួយនាយទាហាន នាយទាហានរង និងពលទាហាន បញ្ជាការដ្ឋានអង្គរក្ស នាព្រឹកថ្ងៃទី០៣ ខែមេសា ឆ្នាំ២០២៥ ក្នុងឱកាសចូលឆ្នាំថ្មី ប្រពៃណីជាតិខ្មែរ ដោយទទួលបានការស្វាគមន៍យ៉ាងកក់ក្តៅ ពីសំណាក់ នាយឧត្តសេនីយ៍ កិត្តិសង្គហបណ្ឌិត ហ៊ីង ប៊ុនហៀង អគ្គមេបញ្ជាការរងនៃ ខ.ភ.ម នាយករងខុទ្ធកាល័យ សម្តេចធិបតីនាយករដ្ឋមន្ត្រី និងជាមេបញ្ជាការ បញ្ជាការដ្ឋានអង្គរក្ស ។
ឧត្តមសេនីយ៍ទោ អុិត ឋាន់រ័ត្ន អ្នកនាំពាក្យ បញ្ជាការដ្ឋានអង្គរក្ស បានធ្វើរបាយការណ៍ស្វាគមន៍ថា កម្លាំងអន្តរាគមន៍ពិសេស ចល័តយ៉ាងឆាប់រហ័ស តាមបទបញ្ជារបស់សម្តេចតេជោ និងសម្តេចកិត្តិព្រឹទ្ធបណ្ឌិត សម្តេចធិបតី និងលោកជំទាវបណ្ឌិត បានទាន់ពេលវេលា និងមានប្រសិទ្ធភាពខ្ពស់បំផុត ដោយបានសហការ យ៉ាងស្អិតរមួត ជាមួយកងកម្លាំងអង្គភាពចំណុះ អគ្គបញ្ជាការដ្ឋានក្រសួងការពារជាតិ កងនគរបាលជាតិ និងអាជ្ញាធរដែនដីគ្រប់លំដាប់ថ្នាក់ និងបានចូលរួមចំណែកការពារបូរណភាពទឹកដី នៃព្រះរាជាណាចក្រកម្ពុជា ការពារស្ថិរភាព សន្តិសុខសង្គម ការពារភ្ញៀវជាតិ អន្តរជាតិ ដែលបានមកបំពេញបេសកកម្ម នៅកម្ពុជា និងការពារប្រជាពលរដ្ឋ ប្រកបដោយសុខសន្តិភាព ។
ក្រៅពីការងារស្នូល នាយឧត្តមសេនីយ៍ កិត្តិសង្គហបណ្ឌិត បានប្រើប្រាស់កម្លាំងធ្វើជាសេនាធិការ ជូនកាកបាទក្រហមកម្ពុជា គណៈកម្មការជាតិគ្រប់គ្រងគ្រោះមហន្តរាយ ក្រសួងបរិស្ថាន ក្រសួងកសិកម្ម ក្រសួងធនធានទឹក និងឧតុនិយម ក្រសួងការងារ និងបណ្តុះបណ្តាលវិជ្ជាជីវៈ ចូលរួមការងារជួយសង្គ្រោះប្រជាពលរដ្ឋ ដូចជា ជីក-ស្តារប្រឡាយ ដកស្ទូង សង្គ្រោះគ្រោះរាំងស្ងួត គ្រោះទឹកជំនន់ គ្រោះអគ្គិភ័យ និងគ្រោះមហន្តរាយផ្សេងៗ និងបានត្រៀមកម្លាំងប្រមាណ២ពាន់ សម្រាប់អន្តរាគមន៍ទប់ស្កាត់បាតុកម្ម និងកូដកម្ម នៅគ្រប់មុខសញ្ញា និងគ្រប់ពេលទាំងអស់ ជូនក្រសួងការងារ និងបណ្តុះបណ្តាលវិជ្ជាជីវៈ ។
កម្លាំងបញ្ជាការដ្ឋានអង្គរក្ស បានប្រកាន់ខ្ជាប់ នូវអភិក្រមទាំង ៣ របស់បញ្ជាការដ្ឋានអង្គរក្ស គឺស្មោះត្រង់ ការពារ និងបម្រើ ជូនសម្តេចតេជោ និងសម្តេចកិត្តិព្រឹទ្ធបណ្ឌិត សម្តេចធិបតី និងលោកជំទាវបណ្ឌិត ព្រមទាំងក្រុមគ្រួសារ ឲ្យបាន ១០០% ហើយប្តេជ្ញាគាំទ្រសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី នាអាណត្តិបន្តបន្ទាប់ទៀត។
ថ្លែងក្នុងឱកាសនោះ ឯកឧត្តម ហេង សួរ បានកោតសរសើរ និងវាយតម្លៃខ្ពស់ចំពោះសមិទ្ធផល និងស្នាដៃនានារបស់នាយទាហាន ពលទាហាន បញ្ជាការដ្ឋានអង្គរក្ស ដែលជានិច្ចកាល តែងតែយកចិត្តទុកដាក់ និងមានការលះបង់ខ្ពស់ ក្នុងការបំពេញតួនាទីភារកិច្ចប្រកបដោយភាពស្មោះត្រង់ បម្រើ ការពារប្តូរផ្តាច់ លើការការពារសុវត្ថិភាព សន្តិសុខជូនប្រមុខថ្នាក់ដឹកនាំរាជរដ្ឋាភិបាល និងកិច្ចការពារបូរណភាពទឹកដី ព្រមទាំងកិច្ចការសង្គម ជាច្រើនទៀត។
ដោយសេចក្តីគោរព ស្រឡាញ់ និងដឹងគុណ, ឯកឧត្តម ហេង សួរ បានប្រកាសចងសម្ព័ន្ធមេត្រីភាព ជាមួយបញ្ជាការដ្ឋានអង្គរក្ស ជាមួយនឹង ក្រសួងការងារ និងបណ្តុះបណ្តាលវិជ្ជាជីវៈ ទោះបីជាក្រសួង បានចងសម្ព័ន្ធមេត្រីភាព ជាមួយនឹងកងពលតូចថ្មើរជើងលេខ៥៧ រួចហើយក៏ដោយនោះ ។
ឯកឧត្តម ហេង សួរ ក៏បានផ្ដល់អំណោយឧបត្ថម្ភ ដល់បញ្ជាការដ្ឋានអង្គរក្ស មានភេសជ្ជៈស្រាបៀរ, មី, អង្ករ ៤០តោន, ទឹកស៊ីអ៊ីវ, ទឹកត្រី, ត្រីខ, ថវិកា និងទូរស័ព្ទដៃម៉ាកសាំសុង ចំនួន ១០០គ្រឿងផងដែរ ៕
ដោយ ៖ វណ្ណលុក
