អាជ្ញាធរខេត្តសៀមរាប ត្រៀមអបអរសាទរពិធីអង្គរសង្ក្រាន្តឆ្នាំ ២០២៥
(សៀមរាប)៖ អាជ្ញាធរខេត្តសៀមរាប និងក្រុមការងារពាក់ព័ន្ធកំពុងរៀបចំទីតាំងសម្រាប់ពិធីអង្គរសង្ក្រាន្ត។ ពិធីបុណ្យនេះនឹងប្រារព្ធនៅតំបន់សួរច្បារព្រះរាជដំណាក់ និងដងស្ទឹងសៀមរាប ដែលជាទីតាំងសំខាន់បន្ថែមលើមុខប្រាសាទអង្គរវត្ត ។
លោក សេង វិចិត្រ ប្រធានកម្មវិធីផ្សារទឹក (សហភាពសហព័ន្ធយុវជនកម្ពុជាខេត្តសៀមរាប) បានឲ្យដឹងថា កម្មវិធីផ្សារទឹកស្ទឹងសៀមរាប កំពុងរៀបចំបានប្រមាណ ៨០% ហើយ ។ តំបន់ផ្សារទឹកនេះ ពីស្ពានថ្មព្រះរាជដំណាក់ ដល់ស្ពានថ្មវត្តរាជបូណ៌ ហើយនឹងមានកម្មវិធីកម្សាន្តបួនចំណុចរួមមាន៖ ផ្សារលើទឹកដែលមានការលក់តាមទូក ,កម្មវិធីជិះទូកលេងកំសាន្ត ,ការប្រគុំតន្ត្រីបុរាណ ,ពិព័រណ៍ផលិតផលនៅតាមដងស្ទឹងសៀមរាប ។
កម្មវិធីជិះទូកនឹងមានការចូលរួមពីប្រជានេសាទចុងឃ្នៀសជាង ១២០ ទូក និងទូកហង្ស ៨ ទូកមកពីទន្លេអុំ។ ចំណូលពីការលក់សំបុត្រជិះទូក នឹងប្រគល់ជូនប្រជានេសាទ ដើម្បីលើកស្ទួយជីវភាពសង្គមរបស់ពួកគាត់។
ក្នុងនាមជាតំណាងសហភាពសហព័ន្ធយុវជនកម្ពុជាខេត្តសៀមរាប លោក សេង វិចិត្រ បានអំពាវនាវដល់ភ្ញៀវទេសចរជាតិ និងអន្តរជាតិឲ្យចូលរួមលើកស្ទួយវប្បធម៌ និងសេដ្ឋកិច្ចសហគមន៍ក្នុងឱកាសអង្គរសង្ក្រាន្ត។ ជាពិសេស លោកក៏បានសូមឲ្យអ្នកចូលរួមអភិរក្សសុវត្ថិភាពក្នុងការបើកបរក្នុងឱកាសបុណ្យនេះ ដោយបំពាក់មួកសុវត្ថិភាព និងខ្សែក្រវ៉ាត់សុវត្ថិភាព ៕
ដោយ ៖ ប៊ុនរដ្ឋា
