គម្រោង «និរន្តភាពតំបន់ទេសភាព និងទេសចរណ៍ធម្មជាតិកម្ពុជា» គឺដើម្បីអនុវត្ត និង លើកកម្ពស់ ជួរភ្នំក្រវាញ-បឹងទន្លេសាប ចាប់ពីឆ្នាំ២០២០-២០២៧
(ភ្នំពេញ)៖ «គម្រោង «និរន្តភាពតំបន់ទេសភាព និងទេសចរណ៍ធម្មជាតិកម្ពុជា» គឺជាគម្រោងដែលទទួលបានការគាំទ្រពី ធនាគារពិភពលោក ដើម្បីអនុវត្តការពារតំបន់ធនធានធម្មជាតិ ហើយនិងលើកកម្ពស់ការអភិវឌ្ឍន៍ទេសចរណ៍ធម្មជាតិ នៅក្នុងតំបន់ការពារទេសភាពតំបន់ទេសភាពចំនួន២រួមមាន៖ ទី១៖ ជួរភ្នំក្រវាញ និងទន្លេសាប ដែលមានខេត្ដចំនួន៦ រួមមាន ខេត្តកោះកុង កំពង់ស្ពឺ កំពង់ឆ្នាំង ពោធិ៍សាត់ បាត់ដំបង និងខេត្តសៀមរាប ចាប់ពីឆ្នាំ២០២០ ដល់២០២៧។នេះជាការលើកឡើងពីសំណាក់ លោក ឃិន ម៉េងឃាង ប្រធាននាយកដ្ឋានទេសចរណ៍ធម្មជាតិ នៃក្រសួងបរិស្ថាន និងជាប្រធានគម្រោង CSLEP។
បញ្ជាក់ប្រាប់បណ្តាញសារព័ត៌មានក្នុងដំណើរទស្សនកិច្ចគម្រោង «និរន្តរភាព តំបន់ទេសភាព និងទេសចរណ៍ធម្មជាតិកម្ពុជា»លោក ឃិន ម៉េងឃាងបានឱ្យដឹងថា៖ដោយមានការគាំទ្ររបស់គម្រោង CSLEP របស់ក្រសួងបរិស្ថាន ទីក្នុងនេះគោលដៅទី១សម្រាប់ ពង្រឹងការការពារព្រៃឈើ មានការកំណត់តំបន់ បោះបង្គោលព្រំ ចុះបញ្ជីដី ពង្រឹងការងារអនុវត្តច្បាប់ និងសម្រាប់ទី២ គឺតំបន់ទេសភាពទាំងអស់ ក៏ដូចជាតំបន់សក្ដានុពល ហើយជំរុញការអភិវឌ្ឍន៍គោលដៅលំហែលបៃតង ទាំងការចូលរួមពីវិស័យឯកជន ទាំងសហគមន៍មូលដ្ឋាន ពីព្រោះមិនអាចកាត់ផ្ដាច់បានទេ គឺត្រូវតែមានការផ្សារភ្ជាប់ជាមួយ និងការងារអភិវឌ្ឍ និងតុល្យភាព ជាមួយការងារអភិរក្ស។
លោកបានលើកឡើងដោយបញ្ជាក់ថាតំបន់ទេសភាព គឺជាគោលដៅលំហែលបៃតងមួយដ៏សំខាន់ ម្ល៉ោះហើយបានគម្រោងគាំទ្រទី១ គឺការរៀបចំតំបន់ការពារឱ្យល្អកុំឱ្យបាត់បង់ ,ទី២ គឺទាញយកឱកាសដើម្បីអភិវឌ្ឍន៍គោលដៅលំហែបៃតងអេកូរទេសចរណ៍ និងទី៣ គឺការគាំទ្រផ្សេងៗទៀតដែលពាក់ព័ន្ធទៅនឹងរឿងការការពារ ការអនុវត្តច្បាប់ និងការតភ្ជាប់ផ្លូវ។ ផ្លូវ ដំណាក់កាលទីមួយ គឺតភ្ជាប់ផ្លូវ៩០គីឡូ នៅតាមតំបន់ខេត្ត ដើម្បីភ្ជាប់ពីតំបន់គោលដៅមួយទៅតំបន់គោលដៅមួយ។
គួរបញ្ជាក់ថាក្នុងដំណើរទស្សនកិច្ចការងារនេះក៏នឹងពិនិត្យស្វែងយល់ពីលទ្ធផលការងារ ពីការវិនិយោគដោយប្រយោលមួយចំនួនតាមរយៈការគាំទ្រដល់ទេសចរណ៍ធម្មជាតិដូចជា ផ្លូវភ្ជាប់តំបន់ទេសចរណ៍ថ្មីរបស់ក្រសួងអភិវឌ្ឍន៍ជនបទ ដែលមានឈ្មោះថា «ផ្លូវនៃក្តីញញឹមចុងក្រោយ» និងទីតាំងដែលគ្រោងដាំស្តារព្រៃឈើក្នុងតំបន់ជួរភ្នំក្រវាញ។សម្រាប់«គម្រោងនិរន្តរភាពតំបន់ទេសភាព និងទេសចរណ៍ធម្មជាតិកម្ពុជា» ដែលបាននិងកំពុងអនុវត្តបន្ត (២០២០-២០២៧) តាមរយៈហិរញ្ញប្បទានឥណទានពីធនាគារពិភពលោក។
គម្រោងមានគោលបំណងកែលម្អ ការគ្រប់គ្រងតំបន់ការពារធម្មជាតិ និងលើកកំពស់សេវាកម្មទេសចរណ៍ធម្មជាតិ នៅក្នុងតំបន់ទេសភាពជួរភ្នំក្រវាញ និងទន្លេសាប (CMTS)៕
ដោយ ៖ ម៉ាដេប៉ូ
