កម្ពុជាមានទោចម្កុដ ដែលជាសត្វដ៏កម្រ ច្រើនជាងគេ កំពុងមានវត្តមាន នៅព្រៃធម្មជាតិ និងក្នុងព្រៃរងទឹកភ្លៀងជួរភ្នំក្រវាញ
(ភ្នំពេញ)៖សត្វទោចម្កុដជាសត្វដ៏កម្រ មានចំនួនសរុបប្រមាណជា ៥០,០០០ នៅក្នុងព្រៃធម្មជា ក្នុងនោះទោចម្កុដចំនួន ៣៥,០០០ កំពុងរស់នៅក្នុងព្រៃរងទឹកភ្លៀងជួរភ្នំក្រវាញ នៃប្រទេសកម្ពុជា។
អង្គការសម្ព័ន្ធមិត្ដសត្វព្រៃ (Wildlife Alliance Cambodia) បានឱ្យដឹងនៅថ្ងៃទី០៧ ខែ មេសា ឆ្នាំ ២០២៥ថា ប្រភេទសត្វដ៏អស្ចារ្យនេះប្រឈមនឹងការថយចុះនៃចំនួន ដោយសារតែការបរបាញ់ ទាក់ចាប់ និងការបាត់បង់ទីជម្រក។ ទោចម្កុដទាំងញីទាំងឈ្មោលចូលចិត្តបន្លឺសម្លេងយ៉ាងពិរោះគ្រលួចលឺទ្រហឹងពេញព្រៃដើម្បីគ្រប់គ្រងដែនដីរបស់ខ្លួន។
អ្នកប្រមាញ់សត្វអាចតាមដាន និងចាប់ពួកគេបានដោយសារតែសម្លេងដ៏ពិរោះនេះឯង។ នេះគឺជាវិនាសកម្មមួយ ដែលប្រភេទដ៏ល្អប្លែកគេមួយនេះ កំពុងស្ថិតក្នុងគ្រោះថ្នាក់ ហើយកំពុងដង្ហោយហៅរកជំនួយបន្ទាន់ពីយើងរាល់គ្នាឱ្យជួយការពារ។
ទោចម្កុដ ជាប្រភេទសត្វកម្រ និងត្រូវបានចុះក្នុង បញ្ជីក្រហមរបស់អង្គការ IUCN ថាជាប្រភេទរងគ្រោះជិតផុតពូជនៅលើពិភពលោក និងត្រូវបានចាត់ថ្នាក់ក្នុងឧបសម្ព័ន្ធ១ នៃអនុសញ្ញា CITES ។ ទោចម្កុដនេះ មានដើមកំណើតនៅក្នុងប្រទេសកម្ពុជា ឡាវ និងថៃ ហើយសត្វប្រភេទនេះត្រូវគំរាមកំហែង បាត់បង់ដោយសារ តែការបរបាញ់ ដាក់អន្ទាក់ ការធ្វើអាជីវកម្មនិងការបាត់បង់ជម្រក។
ដោយឡើងបើយោងតាមអង្គការIUCN តាមការប៉ាន់ស្មាន ទោចម្កុដទូទាំងពិភពលោកមានប្រមាណជាង ៦៥,០០០ ក្បាល ដែលក្នុងនោះ កម្ពុជាត្រូវបានគេជឿថា មានវត្តមាន ទោចម្កុដច្រើនជាងគេ កំពុងរស់នៅ ក្នុងតំបន់ព្រៃស្រោង និងព្រៃពាក់កណ្តាលស្រោងក្នុងតំបន់ការពារធម្មជាតិកម្ពុជាជាពិសេសតំបន់ជួរភ្នំក្រវាញ៕
ដោយ ៖ ម៉ាដេប៉
