សៀមរាប​៖ លោកស្រី ស៊ិន ណម ប្រធានសាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ខេត្តសៀមរាប កាល​ពី​រសៀលថ្ងៃទី៨ ខែមេសា ឆ្នាំ២០២៥​បាន​ដឹកនាំប្រតិភូនាំយកអំណោយ និងថវិការបស់សម្តេចកិត្តិសង្គហបណ្ឌិត ម៉ែន សំអន ទៅជូនដល់ស្ត្រីបានសម្រាលកូនភ្លោះបីនាក់ (ស្រី១នាក់ និងប្រុស២នាក់) និងស្ត្រីផ្សេងទៀតដែលទើបសម្រាលកូន និងធ្វើវះកាត់នៅមន្ទីរពេទ្យជ័យវរ្ម័នទី៧ (គន្ធបុប្ផាទី៣) ខេត្តសៀមរាប។

គ្រួសារទារកភ្លោះបីនាក់នេះមានឪពុកឈ្មោះ គុយ ខែម អាយុ៣០ឆ្នាំ និងម្ដាយ​ឈ្មោះ ជួន សុម៉ុម អាយុ២៦ឆ្នាំ ស្នាក់​នៅ​ភូមិតាំងក្រសៅ ឃុំងន ស្រុកសណ្តាន់ ខេត្តកំពង់ធំ។

លោកវេជ្ជបណ្ឌិតសាស្ត្រាចារ្យ យ៉ៃ ចន្ទនា នាយកគ្រប់គ្រងមន្ទីរពេទ្យជ័យវរ្ម័នទី៧ បានឱ្យដឹងថា ក្នុងមួយថ្ងៃ មន្ទីរពេទ្យ​នេះទទួលស្រ្តីពិនិត្យផ្ទៃពោះ​ចន្លោះពី​៣០០​ដល់៥០០នាក់ និងសម្រាលកូនចន្លោះពី៦០ដល់៨០នាក់ ក្នុងនោះមាន​ប្រហែល​១០ដល់១៥ករណី ដែលជាស្រ្តីមានហានិភ័យខ្ពស់៕
ដោយ៖​ប៊ុន​រដ្ឋា