(ខេត្តឧត្តរមានជ័យ)៖ រដ្ឋមន្ត្រីក្រសួងអភិវឌ្ឍន៍ជនបទ ឯកឧត្តម ឆាយ ឫទ្ធិសែន ដឹកនាំគណៈប្រតិភូក្រសួង ដែលមានការ​ចូល​រួម​ពី លោក អឿន រតនា ប្រធានអង្គការសមាហរណកម្មអភិវឌ្ឍន៍​សហគមន៍ (ស៊ីដូ) ,ប្រធានមន្ទីរអភិវឌ្ឍន៍ជនបទខេត្តឧត្តរមានជ័យ នៅថ្ងៃទី៧ ខែមេសា ឆ្នាំ២០២៥ បានអញ្ជើញចុះពិនិត្យសក្ដានុពល លើការ​បង្កបង្កើនផលស្រូវប្រាំង ការចិញ្ចឹមសត្វ និងការដាំបន្លែវិលជុំ​របស់​ពលរដ្ឋ ស្ថិតនៅភូមិកញ្ជ្រៀប ឃុំគោកមន ស្រុកបន្ទាយអំពិល ខេត្ត​ឧត្តរមានជ័យ។

ឯកឧត្តម ឆាយ ឫទ្ធិសែន បានពាំនាំប្រសាសន៍ ផ្តាំផ្ញើសួរសុខទុក្ខ​ក្នុងក្ដីនឹករលឹកយ៉ាងជ្រាលជ្រៅ និងពរសព្វសាធុការពីសំណាក់ សម្ដេចតេជោ ហ៊ុន សែន ប្រធានព្រឹទ្ធសភា សម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ព្រមទាំងបាននាំយកអំណោយដ៏ថ្លៃថ្លារបស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ជូនដល់ប្រជាពលរដ្ឋ​នៅក្នុង​សហគមន៍ ផងដែរ។

ឯកឧត្តមរដ្ឋមន្ដ្រី បានមានប្រសាសន៍ថា រាជរដ្ឋាភិបាល ក្រោមការ​ដឹកនាំ​របស់ សម្ដេចមហាបវរធិបតី ហ៊ុន ម៉ាណែត បានខិតខំប្រឹង​ប្រែង​ក្នុងការអភិវឌ្ឍប្រទេសជាតិ និងការអភិវឌ្ឍតំបន់ជនបទ​ឱ្យមាន​ការរីកចម្រើន ដែលមានក្រសួងអភិវឌ្ឍន៍ជនបទជាសេនាធិការ ក្នុងការ​ជួយអភិវឌ្ឍនៅតំបន់ជនបទ ជាពិសេសការលើក​កម្រិតផ្លូវ​ពីផ្លូវក្រាលល្បាយដី ទៅជាផ្លូវក្រាលកៅស៊ូ ឬផ្លូវក្រាលបេតុង ដែល​មានភាពធន់នឹងអាកាសធាតុ, លើកកម្ពស់សុខភាព អនាម័យ និង​បរិស្ថានរស់នៅរបស់សហគមន៍ជនបទ តាមរយៈការផ្គត់ផ្គង់ទឹកស្អាត​សហគមន៍ និងបង្គន់អនាម័យ, ការអភិវឌ្ឍសហគមន៍ និងចលនា​ភូមិ​គំរូ ព្រ​មទាំងការបណ្ដុះបណ្ដាលជំនាញមូលដ្ឋាន និងបំណិនជីវិត ដើម្បី​ឱ្យប្រជាពលរដ្ឋមានមុខរបរ និងរកប្រាក់ចំណូលបន្ថែម ក្នុងគោល​ដៅ​កាត់បន្ថយភាពក្រីក្ររបស់ប្រជាជន និងអភិវឌ្ឍ​តំបន់ជនបទឱ្យមានភាពស៊ីវិល័យ។

បន្ទាប់ពីជួបសំណេះសំណាល ជាមួយប្រជាសហគមន៍នោះមក ឯកឧត្តមរដ្ឋមន្ដ្រី ឆាយ ឬទ្ធិសែន បានបន្តដឹកនាំគណៈប្រតិភូ អញ្ជើញចុះពិនិត្យចំការបន្លែរបស់សហគមន៍ រួមមានបន្លែននោង ប៉េងប៉ោះ និងដំណាំពោតផងដែរ។

នាឱកាសនោះ ឯកឧត្តមរដ្ឋមន្រ្ដី បានណែនាំដល់ថ្នាក់ដឹកនាំ និងប្រធានមន្ទីរអភិវឌ្ឍន៍ជនបទ ត្រូវធ្វើការសិក្សាបន្ថែមពីត្រូវការ​របស់​សហគមន៍តាមវិស័យ ដើម្បីបំពេញបន្ថែម តាមរយៈ​កម្មវិធី​ត្រីវិស័យ ដែលមានក្រសួងអភិវឌ្ឍន៍ជនបទ ក្រសួងធនធានទឹក និងឧតុនិយម និងក្រសួងកសិកម្ម រុក្ខាប្រមាញ់ និងនេសាទ ផងដែរ ។

គួរបញ្ជាក់ថា ភូមិកញ្ជ្រៀប មានប្រជាពលរដ្ឋរស់នៅចំនួន ៣០៧គ្រួសារ ស្មើនឹង ១ពាន់ ១៨៣នាក់ ស្រី ៦០២នាក់ មានផ្ទៃដីបង្កបង្កើនផល ១ពាន់ ៤០០ហិកតា និងមានសក្ដានុពល លើការបង្កបង្កើនផលស្រូវប្រាំង និងស្រូវវស្សា ចិការញ្ចឹមសត្វ ការដាំបន្លែវិលជុំ ព្រមទាំងមានសហគមន៍សន្សំប្រាក់ផងដែរ។ ភូមិកញ្ជ្រៀបក៏មានហេដ្ឋារចនាសម្ព័ន្ធគមនាគមន៍ និងសហគមន៍​កសិកម្មគោកមនមានជ័យ ដែលមានសក្ដានុពលខាងវិស័យ​ទេសចរណ៍បែបធម្មជាតិ គឺអាងអូរអង្គ្រងផងដែរ៕

ដោយ ៖ ឡុង សំបូរ