បរទេស ៖ សណ្ឋាគារស្ថិតនៅក្នុងរមណីយដ្ឋានជិះស្គីលើទឹកកកក មួយកន្លែង នៅប្រទេសបារាំង ត្រូវបានភ្លើងឆាបឆេះ ជាហេតុនាំឲ្យមនុស្សជិត៥០០នាក់ ត្រូវបានជម្លៀសចេញភ្លាមៗ។

សណ្ឋាគារ La Plagne ស្ថិតក្នុងរមណីយដ្ឋានជិះស្គី Alps មួយនេះ ត្រូវបានភ្លើងឆាបឆេះ នៅពាក់កណ្តាលអធ្រាត ថ្ងៃពុធឈាងចូលដល់ថ្ងៃព្រហស្បតិ៍។ ប៉ុន្តែ អ្នកពន្លត់អគ្គីភ័យ ជាង៩០នាក់ ជាមួយនឹងរថយន្តពន្លត់អគ្គិភ័យប្រមាណ៤០គ្រឿង បានពន្លត់ភ្លើងវិញ។

លោក Bruno Charlot អនុអភិបាល នៃតំបន់ Albertville បានប្រាប់ប្រព័ន្ធផ្សព្វផ្សាយក្នុងស្រុកថា មនុស្ស៤៨៤នាក់ ត្រូវបានជម្លៀសចេញ ក្នុងរយៈពេល១៥នាទី តែ មានមនុស្ស៤នាក់ រងរបួស ហើយត្រូវបញ្ជូនទៅមន្ទីរពេទ្យ។

ភ្ញៀវឈ្មោះ Paul Tucker អាយុ ៧៦ឆ្នាំ ជនជាតិអង់គ្លេស ដែលស្នាក់នៅ សណ្ឋាគារបាននិយាយថា «ពេលនោះ មនុស្សកំពុងប្រញាប់ប្រញាល់ ប៉ុន្តែ ពួកគេមិនមានការភ័យស្លន់ស្លោទេ ហើយយើងចេញពីសណ្ឋាគារ ក្នុងរយៈពេល៥នាទី»។

ប្រភពដើម នៃអគ្គីភ័យ មិនទាន់ដឹងនៅឡើយ ហើយការស៊ើបអង្កេតកំពុងដំណើរការ ប៉ុន្តែ ភ្ញៀវថា មានលឺសម្លេងផ្ទុះ មុនពេលភ្លើងឆេះសណ្ឋាគារ។ ប៉ូលិស និងក្រុមពន្លត់ បាននិយាយថា អគ្គិភ័យបានចាប់ផ្តើម នៅខាងមុខអគារ ហើយបានរាលដាល ដល់ដំបូល៕

ប្រភពពី AFP ប្រែសម្រួល៖ សារ៉ាត