បរទេស ៖ អង្គការសហប្រជាជាតិ ហៅកាត់ UN បានស្វែងរកជំនួយបន្ទាន់ ចំនួន២៧៥លានដុល្លារអាមេរិក ដើម្បីយកទៅជួយដល់ជនរងគ្រោះ ដោយសារការរញ្ជួយដី នៅប្រទេសមីយ៉ាន់ម៉ា ដែលបានសម្លាប់មនុស្ស ជាង៣,៦០០នាក់។

អង្គការសហប្រជាជាតិ បានបើកការអំពាវនាវ កាលពីថ្ងៃសុក្រ ដោយបង្ហាញរបាយការណ៍ ព្រមានថា «ជាមួយនឹងតម្រូវការថ្មី និងការកើនឡើង ធនធានបន្ថែម ត្រូវបានទាមទារ ជាបន្ទាន់»។

សេចក្តីអំពាវនាវថ្មីនេះ នឹងកំណត់គោលដៅ ដល់មនុស្ស ១,១លាននាក់ ដែលងាយរងគ្រោះបំផុត ដោយសង្កត់ធ្ងន់លើស្ត្រី និងកុមារី ដែលប្រឈមមុខនឹងហានិភ័យខ្ពស់ នៃអំពើហិង្សា​យេនឌ័រ, អសន្តិសុខអាហារ និងកង្វះលទ្ធភាព ទទួលបានសុខភាពបន្តពូជ»។

យោងតាមអង្គការសហប្រជាជាតិ បានឲ្យដឹងថា មនុស្សជាង៦.៣លាននាក់ កំពុងត្រូវការជំនួយជាបន្ទាន់ នៅក្នុងតំបន់ ដែលរងគ្រោះខ្លាំងបំផុត ដោយសារការរញ្ជួយដីកម្រិត ៧.៧រិចទ័រ កាលពីថ្ងៃទី២៨ ខែមីនា៕

ប្រភពពី AFP ប្រែសម្រួល៖ សារ៉ាត