បរទេស ៖ ទិដ្ឋភាពប្រជាជនប៉ាឡេស្ទីនរត់គេចខ្លួន ខណៈការវាយប្រហារតាមអាកាស របស់អ៊ីស្រាអែល កើតមាន នៅកណ្តាលតំបន់ហ្គាហ្សា កាលពីពេលថ្មីៗនេះ។

ប្រជាជនប៉ាឡេស្ទីន បានរត់ភៀសខ្លួន បន្ទាប់ពីការព្រមាន ពីសំណាក់កងទ័ពអ៊ីស្រាអែល មុនពេលដែលមានការវាយប្រហារតាមអាកាស នៅភាគខាងលិចក្រុង Al-Zawayda ប៉ែកកណ្តាល នៃតំបន់ហ្គាហ្សាស្ទ្រីប។

ក្រុមហាម៉ាស់បាននិយាយថា អ៊ីស្រាអែលបានផ្តល់បទឈប់បាញ់ រយៈពេល ៤៥ ថ្ងៃ ប្រសិនបើខ្លួនដោះលែងពាក់កណ្តាល នៃចំណាប់ខ្មាំង ដែលនៅសេសសល់ នៅក្នុងហ្គាហ្សា។

គួរបញ្ជាក់ថា ​មានចំណាប់ខ្មាំង ២៥១ នាក់ ត្រូវបានចាប់ខ្លួន ក្នុងអំឡុងការវាយប្រហារ ដែលមិនធ្លាប់មាន ក្នុងខែតុលា ឆ្នាំ ២០២៣ របស់ក្រុមហាម៉ាស់ ដែលបាន​បង្កើតឱ្យមានសង្រ្គាម មកដល់ពេលបច្ចុប្បន្ននេះ។ ក្នុងនោះ មានចំណាប់ខ្មាំង៥៨នាក់ទៀត នៅតែត្រូវបានឃុំខ្លួន នៅហ្គាហ្សា ខណៈដែលទាហានអ៊ីស្រាអែលថា ក្នុងចំណោមនេះ មាន៣៤នាក់ បានស្លាប់។

អង្គការសហប្រជាជាតិបាននិយាយថា ឥឡូវនេះ កំពុងស្ថិតក្នុងវិបត្តិមនុស្សធម៌ដ៏អាក្រក់បំផុតរបស់តំបន់ហ្គាហ្សា ចាប់តាំងពីសង្គ្រាម បានចាប់ផ្តើម៕

ប្រភពពី AFP ប្រែសម្រួល៖ សារ៉ាត