ប្រតិបត្តិការបង្ក្រាបឈ្នាងអូសលៀស៖ ចាក់លៀសចូលបឹងទន្លេសាបវិញប្រមាណ ៥តោន
(សៀមរាប)៖ កម្លាំងចម្រុះរួមមាន តំបន់ប្រតិបត្តិការសិករងសៀមរាប កងទ័ពពិសេសឆ័ត្រយោង ៩១១ កងពលលេខ ៧០ សហការជាមួយផ្នែករដ្ឋបាលជលផលដំដែក និងសង្កាត់រដ្ឋបាលជលផលស្រុកសូទ្រនិគម ដឹកនាំដោយលោកវរសេនីយ៍ឯក វិញ វឿន បានចុះបំពេញភារកិច្ចក្នុងការបង្ក្រាប និងទប់ស្កាត់បទល្មើសនេសាទ នៅថ្ងៃទី ២៣ ខែមេសា ឆ្នាំ ២០២៥។
ក្នុងដំណើរប្រតិបត្តិការនេះ កងកម្លាំងបានចាប់ឃាត់ឧបករណ៍ឈ្នាងអូសលៀសចំនួន ០១ ករណី នៅក្នុងដែននេសាទសហគមន៍កំពុងឃ្លាំង (ចំណុចលកទល់)។ បានដកហូតក្រឡាចាប់ត្រី (រែងលៀស) ទំហំ ១.០២ សង់ទីម៉ែត្រ ចំនួន ២៣ គ្រឿង និងបានចាក់លៀសដែលបានរងចាប់ ចូលបឹងទន្លេសាបវិញប្រមាណ ៥ តោន ដើម្បីថែរក្សាសមតុល្យប្រព័ន្ធអេកូឡូស៊ីនៃបឹង។
ប្រតិបត្តិការបែបនេះ មិនមែនជាព្រឹត្តិការណ៍លើកដំបូងនោះទេ។ គណៈកម្មការចម្រុះបានបន្តធ្វើសកម្មភាពបង្ក្រាបយ៉ាងសកម្ម ដូចភ្លៀងរលឹម ចាប់តាំងពីថ្ងៃទី ២៣ ខែមីនា ឆ្នាំ ២០២២ ដែលបានផ្តួចផ្តើមដោយសម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា ក្នុងពិធីបិទសន្និបាតបូកសរុបការងាររបស់ក្រសួងកសិកម្ម។
ការងារនេះ ក៏ទទួលបានការគាំទ្រយ៉ាងពេញទំហឹងពីសម្តេចធិបតី ហ៊ុន ម៉ាណែត នាយករដ្ឋមន្ត្រី បច្ចុប្បន្ន ដែលបានបញ្ជាក់ឱ្យថែរក្សា និងអភិរក្សធនធានធម្មជាតិ ព្រមទាំងជីវចម្រុះ ក្នុងបឹងទន្លេសាប ដើម្បីធានាថា តំបន់អេកូឡូស៊ីសំខាន់នេះ នឹងមានសម្បូរថែមទាំងប្រយោជន៍សេដ្ឋកិច្ច និងបរិស្ថានសម្រាប់ជំនាន់ក្រោយ ៕
ដោយ ៖ ប៊ុនរដ្ឋា
