បរទេស៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃអង្គារ បានលើកឡើងថា សមភាគីរុស្ស៊ី លោក វ្ល៉ាឌីមៀ ពូទីន នៅតែចង់ចរចាកិច្ចព្រមព្រៀងសន្តិភាព ជាមួយអ៊ុយក្រែន ខណៈដែលកិច្ចចរចាបទឈប់បាញ់ ដែលសម្របសម្រួល ដោយក្រុងវ៉ាស៊ីនតោន ហាក់ដូចជាជាប់គាំង។

នៅពេលសួរ អំឡុងបទសម្ភាសន៍ ជាមួយទូរទស្សន៍ ABC ថាតើ ពូទីន ចង់បានសន្តិភាពទេ? លោក Trump បាននិយាយថា «ខ្ញុំគិតថាគាត់ចង់» ។ លោក Trump ក៏បានអះអាងផងដែរថា លោក ពូទីន ចង់គ្រប់គ្រងលើអ៊ុយក្រែនទាំងមូល ប៉ុន្តែ «ដោយសារតែខ្ញុំ គាត់នឹងមិនធ្វើដូច្នេះទេ»។

សេចក្តីថ្លែងការណ៍នេះកើតឡើង បន្ទាប់ពីលោក Trump កាលពីថ្ងៃសៅរ៍ បានចោទសួរថា តើមេដឹកនាំរុស្ស៊ីរូបនេះ ពិតជាចង់បានសន្តិភាព ឬយ៉ាងណា។ ជាការលើកឡើង បន្ទាប់ពីកិច្ចប្រជុំជាមួយលោក Zelensky ប្រធានាធិបតីអ៊ុយក្រែន នៅឯព្រះរាជពិធីបុណ្យសពរបស់សម្តេចប៉ាប នៅទីក្រុងរ៉ូម ប្រទេសអ៊ីតាលី។

លោក Trump បាននិងកំពុងជំរុញ ឱ្យមានបទឈប់បាញ់ នៅក្នុងសង្រ្គាមរយៈពេល ៣ ឆ្នាំ ដោយបញ្ជូនមនុស្សទៅជួបលោក ពូទីន ប៉ុន្តែ ការសន្យាយុទ្ធនាការរបស់លោក ក្នុងការបញ្ចប់ជម្លោះ ក្នុងរយៈពេល ២៤ម៉ោងដំបូង បានបង្ហាញពីការបំភាន់៕

ប្រភពពី AFP ប្រែសម្រួល៖ សារ៉ាត