(ភ្នំពេញ)៖ ការចាប់ផ្តើម ការពិនិត្យបញ្ជីឈ្មោះ និងការចុះឈ្មោះបោះឆ្នោតតាមឃុំ សង្កាត់ ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ មានរយៈពេល ២៦ថ្ងៃ ពោលគឺចាប់ពី ថ្ងៃទី១ រហូតដល់ថ្ងៃទី២៦ ខែឧសភា ឆ្នាំ២០២៥ រៀងរាល់ថ្ងៃរួមទាំងថ្ងៃសៅរ៍ និងថ្ងៃអាទិត្យ ។នេះបើតាមការបញ្ជាក់ឱ្យដឹងពីសំណាក់ឯកឧត្តម មាន សទិ សមាជិក គ.ជ.ប ។

ថ្លែងក្នុងកិច្ចប្រជុំជាមួយភាគីពាក់ព័ន្ធនាថ្ងៃទី៣០ ខែ មេសា ឆ្នាំ ២០២៥នេះ ឯកឧត្តម មាន សទិ បានឱ្យដឹងថាប្រជាពលរដ្ឋអាចអញ្ជើញទៅពិនិត្យមើលឈ្មោះនៅតាមឃុំ សង្កាត់ ឬតាមអាសយដ្ឋានវេប voterlist.nec.gov.kh ឬតាមរយៈកម្មវិធីទូរសព្ទ ) NEC KH។

ប្រជាពលរដ្ឋខ្មែររស់នៅក្នុងឃុំ សង្កាត់ ដែលទើបគ្រប់អាយុ ១៨ឆ្នាំ គិតដល់ថ្ងៃផ្តល់សុពលភាព លើបញ្ជីបោះឆ្នោត (ថ្ងៃទី៣១ ខែកក្កដា ឆ្នាំ២០២៥) គឺ អ្នកកើតមុន ឬកើតត្រឹមថ្ងៃទី១ ខែសីហា ឆ្នាំ២០០៧ អ្នកដែលមិនទាន់បានចុះឈ្មោះបោះឆ្នោតពីមុនមក ឬបានផ្លាស់លំនៅឋាន ឬទីសំណាក់ចូលក្នុងឃុំ សង្កាត់ថ្មី។

ឯកឧត្តមបានថ្លែងថា នីតិវិធីនៃការចុះឈ្មោះតាមប្រព័ន្ធកុំព្យូទ័រមានភាពងាយស្រួល និងច្បាស់លាស់។ លើសពីនេះ គ.ជ.ប អាចបង្កើតបញ្ជីបោះឆ្នោតដំបូងព្រមគ្នានៃឃុំ សង្កាត់ ទូទាំងប្រទេស ហើយការបិទផ្សាយត្រូវ ធ្វើនៅថ្ងៃតែមួយ គឺថ្ងៃទី២៨ ខែមិថុនា ឆ្នាំ២០២៥ រួមទាំងបញ្ជីឈ្មោះអ្នកបោះឆ្នោតដែលនឹងត្រូវលុប ចេញពីបញ្ជីបោះឆ្នោត។

ជាមួយគ្នា នេះឯកឧត្តម មាន សទិ សមាជិក គ.ជ.បបានថ្លែងបញ្ជាក់ដែរថាជនណាក៏ដោយ ឬតំណាងមានសិទ្ធិប្តឹងតវ៉ាទៅក្រុមប្រឹក្សាឃុំ សង្កាត់ រួចបន្តទៅ គ.ជ.ប និង ក្រុមប្រឹក្សាធម្មនុញ្ញ អំពីបញ្ហាទាំងឡាយពាក់ព័ន្ធនឹងការចុះឈ្មោះបោះឆ្នោត ប្រសិនបើមានភស្តុតាង បញ្ជាក់ថា មានភាពមិនត្រឹមត្រូវដូចមានចែងក្នុងច្បាប់ស្តីពីការបោះឆ្នោតជ្រើសតាំងតំណាងរាស្ត្រឬច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់ ឬ/និងបទបញ្ជា និងនីតិវិធីសម្រាប់ការ ពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ ឬ/និងបទបញ្ជាផ្ទៃក្នុងរបស់ គ.ជ.ប។

គួរបញ្ជាក់ថាគិតត្រឹមថ្ងៃទី២៩ ខែមេសា ឆ្នាំ២០២៥ ការចែកលិខិតអញ្ជើញអ្នកមានឈ្មោះក្នុងបញ្ជីបោះឆ្នោត ផ្លូវការ ឆ្នាំ២០២៤ បានចំនួន ជាង៩លាន នាក់ ស្មើនឹង ៩១,០៨ភាគរយ។ ការចែកលិខិតអញ្ជើញតាមភូមិ នឹងត្រូវបញ្ចប់នៅថ្ងៃទី៣០ ខែមេសា ឆ្នាំ២០២៥ នេះហើយ តែប្រជាពលរដ្ឋដែលមិនទាន់បានទទួល លិខិតអញ្ជើញ សូមទៅទទួលលិខិតអញ្ជើញនៅសាលាឃុំ សង្កាត់ ដែលប្រជាពលរដ្ឋមានឈ្មោះ ក្នុងបញ្ជីបោះឆ្នោតនៃឃុំ សង្កាត់នោះ៕

អត្ថបទ ៖ ម៉ាដេប៉ូ
រូបភាព ៖ លោក គ្រី សម្បត្តិ