ឯកអគ្គរាជទូតកម្ពុជាប្រចាំនៅសហរដ្ឋអាម៉េរិកឆ្លើយតបចំពោះការចោទប្រកាន់របស់ក្រុមប្រឆាំង
ឯកអគ្គរាជទូតកម្ពុជាប្រចាំនៅសហរដ្ឋអាម៉េរិក បានច្រានចោលចំពោះការចោទប្រកាន់មួលបង្កាច់គ្មានការពិតពីសំណាក់ក្រុមប្រឆាំងថា មិនទទួលយកញតិ្តរបស់ក្រុមបាតុករដែលបានមកធ្វើបាតុកម្មមុខស្ថានទូតកាលពីថ្ងៃទី១០ ខែឧសភា ឆ្នាំ២០២៥ កន្លងមកនេះ។
ឯកឧត្តម កុយ គួង ឯកអគ្គរាជទូតកម្ពុជាប្រចាំសហរដ្ឋអាម៉េរិកបានមានប្រសាសន៍ថ្លែងប្រាប់ AMS នៅយប់ថ្ងៃទី១១ ខែឧសភានេះថា ក្រុមដែលធ្វើបាតុកម្ម នៅមុខស្ថានទូតកម្ពុជានៅសហរដ្ឋអាម៉េរិកាលពីថ្ងៃទី១០ ខែឧសភា កន្លងមកនេះ គឺទី១. ក្រុមបាតុករដែលមកដល់ស្ថានទូតមានគ្នាមិនដល់១០០នាក់នោះទេ ប្រហែលជា ៧០ ទៅ៨០នាក់ ហើយក្នុងនោះមានមួយចំនួនកាន់ទង់ជ័យអាម៉េរិក មួយចំនួនកាន់ទ័ង់ជ័យខ្មែរ និងមួយចំនួនកាន់ទង់ជ័យម៉ុងតាញ៉ា។ ពួកគេកៀរគរម៉ុងតាញ៉ាប៉ុន្មាននាក់មកចូលរួមបន្លំជាពលរដ្ឋខ្មែរធ្វើជាបាតុកម្មឱ្យឃើញគ្នាច្រើន។ ឯកឧត្តមបន្តថាទី២. សួរគ្នាគាត់ទៅមើលតើអ្នកណាកាន់ញតិ្តយកមក? គឺអត់មានទេ អត់មានទាល់តែសោះ ។ ទី៣. ឃើញហ្វេសប៊ុកមួយចំនួនចុះថា ខ្ញុំរត់គេចអត់ទទួលយកញតិ្ត ហើយមានរូបថតខ្ញុំបើកទ្វារចូលស្ថានទូត។ ថ្ងៃនោះ គឺក្រុមបាតុករម៉ោង១ បានមកដល់ តែខ្ញុំដើរចេញចូលស្ថានទូតធម្មតា។ ខ្ញុំធ្វើការទាំងថ្ងៃសុក្រ ថ្ងៃសៅរ៍ ការងារចាំបាច់ត្រូវធ្វើ។ ខ្ញុំដើរចូលស្ថានទូតធម្មតា ខ្ញុំអត់ទាំងដឹងខ្លួនផង ហើយមានក្រុមបាតុករម្នាក់ ពីរនាក់ បានមកមុខស្ថានទូតមុន ហើយខ្ញុំបានដើរធម្មតាចូលស្ថានទូត នៅពេលរកបើកទ្វារចូលគាត់ស្រែក ខ្ញុំក៏ងាករកមើល គេក៏យកកាម៉ារ៉ាមកថត ខ្ញុំក៏បន្តបើកទ្វារចូលទៅក្នុងស្ថានទូតពីព្រោះជាធម្មតាត្រូវមានការកោះប្រជុំ និងមានការងារបន្ទាន់ៗ ជាពិសេសការងារត្រៀមលក្ខណៈទទួលគណៈប្រតិភូកម្ពុជាអញ្ជើញមក។ ខ្ញុំធ្វើការធម្មតាអត់មានរត់គេចអីទេ។ ខ្ញុំចេញចូលក្នុងបិវេណក្នុងរបងស្ថានទូតរឿងអីទៅភ័យខ្លាចរត់ខ្លាចពីណាគេ។ ក្រុមបាតុករមកលបលួចថតគេដោយគេមិនដឹងខ្លួនផងហ្នឹង ហើយចុះតែផ្សាយផ្តេសផ្តាស។ ឯកឧត្តមបន្តថា ខ្ញុំគិតថា រស់នៅនៅក្នុងប្រទេសដែលមានអរិយធម៌ខ្ពង់ខ្ពស់ជឿនលឿនគួរធ្វើឥរិយាបថខ្លួនឯងឱ្យជឿនលឿនតាមគេផង កុំនៅរក្សារបៀបមិនថ្លៃថ្នូរបែបនេះ។
ឆ្លើយនឹងការលើកឡើង” កុយ គួង ខ្លាចមិនហ៊ានដោះស្រាយ មិនហ៊ានប្រឈម” ត្រូវបានឯកឧត្តម កុយ គួង អះអាងថា បើខ្ញុំខ្លាចចាំបាច់មកបំពេញការងារការទូតជាឯកអគ្គរាជទូតប្រចាំសហរដ្ឋអាម៉េរិកធ្វើអី? ពីព្រោះខ្ញុំដឹងថា ពលរដ្ឋខ្មែរនៅអាម៉េរិកកន្លះលាននាក់ (ទី១)។ ទី២.ខ្ញុំមកដល់នេះ ទើបតែរយៈពេលបានតែ ២ខែទេ ប៉ុន្តែពេលដែលខ្ញុំមកដល់ភ្លាមមានកម្មវិធីបុណ្យចូលឆ្នាំប្រពៃណីខ្មែរជាច្រើនកន្លែងដែលមានប្រជាជនចូលរួមរាប់ពាន់នាក់ ហើយមានការអញ្ជើញខ្ញុំចូលរួម។ ខ្ញុំចូលរួមគ្រប់កន្លែង និងបានឡើងមានមតិនៅក្នុងចំណោមមហាជន និងបានចែកនាមបណ្ណលេខទូរសព្ទខ្ញុំឱ្យពលរដ្ឋទូទៅទាំងអស់ មានការអីទូរស័ព្ទមកខ្ញុំ។ អ៊ីចឹងបើសិនជាខ្ញុំខ្លាច ហេតុអីខ្ញុំចូលទៅកម្មវិធីនឹងធ្វើអី? ហើយបើខ្ញុំខ្លាចចាំបាច់ខ្ញុំឲ្យលេខទូរស័ព្ទខ្ញុំទៅឱ្យពលរដ្ឋខ្មែរធ្វើអី?។
ឯកឧត្តមឯកអគ្គរាជទូតបានបន្តថា ” ជាទម្លាប់ខ្ញុំទោះជាធ្វើទូតនៅប្រទេសណាខ្ញុំតែងតែបង្ហាញលេខទំនាក់ទំនងផ្ទាល់របស់ខ្ញុំ តាំងពីខ្ញុំនៅអូស្ត្រាលីធ្វើឲ្យប្រជាពលរដ្ឋខ្មែរនៅអូស្ត្រាលីទាក់ទងមកខ្ញុំជាសេរី ។ខ្ញុំទៅដល់ប្រទេសឥណ្ឌា ក៏អ៊ីចឹង។ ឥឡូវមកដល់សហរដ្ឋអាម៉េរិកក៏ខ្ញុំអត់មានញញើតញញើមនឹងផ្តល់លេខទូរសព្ទ ហើយមួយថ្ងៃៗប្រជាពលរដ្ឋទូរសព្ទមកខ្ញុំដើម្បីសួរនាំអំពីកិច្ចការសេវាកុងស៊ុល ក៏ដូចជាបញ្ហាផ្សេងៗដែលគាត់មានភាពមិនយល់ច្បាស់ ឬក៏ងឿងឆ្ងល់ ឬក៏ចង់ដឹងថាស្ថានទូតយើងបានជួយអីដល់គាត់ខ្លួន។ខ្ញុំព្យាយាមទទួលទូរសព្ទមួយថ្ងៃពីរបីទៅប្រាំនាក់។ ខ្ញុំរីករាយនឹងពេញចិត្តបម្រើប្រជាពលរដ្ឋដោយឥតគ្មានការរើសអើងអី្វទាំងអស់ទេ”។
ឯកឧត្តមបានបញ្ជាក់ទៀតថា ទោះជាគាត់ (ក្រុមប្រឆាំង) និយាយបំផ្លើសថា ខ្ញុំសុទ្ធតែទូតបម្រើបក្សមិនបម្រើជាតិ ទោះបីជាគាត់និយាយយ៉ាងណាក៏ដោយ ប៉ុន្តែឧត្តមគតិនិងការផ្តាំផ្ញើរបស់ថ្នាក់ដឹកនាំគ្រប់រូបមានសម្តេចបវរធិបតី ក៏ដូចជាសម្តេចតេជោ ក៏ដូចជាឯកឧត្តម ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស ដែលតែងតែផ្តាំផ្ញើឱ្យមើលជួយយកចិត្តទុកដាក់បម្រើដល់ប្រជាពលរដ្ឋនៅសហរដ្ឋអាម៉េរិក ក៏ដូចជាទូតផ្សេងទៀតបម្រើប្រជាពលរដ្ឋយើងនៅក្រៅប្រទេស គឺនៅរក្សាដដែលឧត្តមគតិ និងការប្តេជ្ញាចិត្តបម្រើប្រជាពលរដ្ឋនៅដដែល ទោះបីជាមានប្រជាពលរដ្ឋមួយចំនួនតូចដែលនៅតែមានៈប្រឹងនិយាយមួលបង្កាច់បង្ខូចយ៉ាងណាក៏ដោយ គឺអត់ឱ្យរូបខ្ញុំជាអគ្គរដ្ឋទូតនេះបាក់ទឹកចិត្តប្តូរឥរិយាបថទេ គឺអត់ទេ! នៅដដែល៕
ដោយ៖ពលជ័យ
