កៀវ ៖ កងទ័ពអាកាសអ៊ុយក្រែនបានរាយការណ៍ពីការបាត់បង់យន្តហោះចម្បាំង F-16 មួយគ្រឿងទៀត ដែលផលិតដោយក្រុមហ៊ុន Lockheed Martin របស់អាមេរិក មានតម្លៃខ្ទង់ ៧០លានដុល្លារ ក្នុងអំឡុងបេសកកម្មប្រយុទ្ធនៅលើមេឃ។

យន្តហោះចម្បាំង F-16 នេះ បានជួបគ្រោះថ្នាក់ធ្លាក់នៅម៉ោង ៣និង៣០នាទីព្រឹកថ្ងៃសុក្រសប្តាហ៍នេះ ក្នុងអំឡុងពេលធ្វើប្រតិបត្តិការការពារ ប៉ុន្តែមិនបញ្ជាក់ទីតាំងធ្លាក់ឡើយ។

បើតាមសេចក្តីរាយការណ៍របស់សារព័ត៌មាន RT នេះជាយន្តហោះចម្បាំង F-16 គ្រឿងទីបីហើយ ដែលធ្លាក់នៅអ៊ុយក្រែន ចាប់តាំងពីលោកប្រធានាធិបតី ហ្សេលេនស្គី ទទួលបានជំនួយពីសម្ព័ន្ធមិត្តលោកខាងលិចកាលពីខែសីហា ឆ្នាំ២០២៤។
យន្តហោះគ្រឿងទីមួយ បានធ្លាក់ក្រោយចូលប្រយុទ្ធក្នុងប្រទេសអ៊ុយក្រែនមិនបានដល់មួយខែផង ចំណែកគ្រឿងទីពីរត្រូវរុស្ស៊ីបាញ់មីស៊ីលចំកាលពីថ្ងៃទី១២ខែមេសា ខណៈឧប្បត្តិហេតុទាំងពីរនេះ សុទ្ធតែផ្តាច់ជីវិតអាកាសយានិក៕

ប្រភព ៖ AFP និង RT ប្រែសម្រួល ៖ ឈឹម ទីណា