សៀមរាប​៖វត្តប្រាសាទចន្ទរង្សី ហៅ វត្តគោកចាន់ ស្ថិតនៅភូមិគោកចាន់ ឃុំអំពិល ស្រុកប្រាសាទបាគង ខេត្តសៀមរាប កាលពីថ្ងៃទី២៤ ខែឧសភា ឆ្នាំ២០២៥ បានរៀបចំពិធីបំបួសកុលបុត្រចំនួន ២៤រូប ដើម្បីតបស្នង​សង​គុណចំពោះ មាតា បិតា និងចូលរួមបម្រើក្នុង​វិស័យ​ព្រះពុទ្ធសាសនា។

ពិធីនេះបានដឹកនាំដោយព្រះធម្មានុរ័ក្ខញាណ ស៊ុម ពិសិដ្ឋ ដែលជាព្រះសមុហ​គណខេត្តសៀមរាប និងជាព្រះគ្រូចៅអធិការ វត្តប្រាសាទចន្ទរង្សី។ព្រះគ្រូចៅ​អធិការ​បានមានថេរដីកាថា ការបំបួសនាគនាពេលនេះមានគោលបំណង​សំខាន់ៗចំនួនបី។ទីមួយ.ដើម្បីសងគុណមាតាបិតា,ទីពីរ.ដើម្បីរួច​ផុតពី​ទុក្ខនានានិងទីបី.​ដើម្បីបន្តការសិក្សាព្រះធម៌ និងគម្ពីរព្រះពុទ្ធសាសនា។
ព្រះគ្រូបានបន្ថែមថា ការបំបួសនាគគឺមិនប្រកាន់អាយុឡើយ សម្រាប់បុគ្គល​ដែលចង់បួសជាសាមណេរ ប៉ុន្តែសម្រាប់​ការបួស​ជាភិក្ខុ ត្រូវមានអាយុចាប់ពី ២០ ឆ្នាំឡើងទៅ។ បុគ្គលដែលហៅថា “នាគ” គឺជាអ្នកកំពុងរៀបចំដើម្បីចូលបួស ជាការចាប់ផ្ដើមបន្តិចមួយទៅរកជីវិតថ្មីក្នុងសាសនា។

ដើម្បីបួសបាន ត្រូវមានលក្ខខណ្ឌចំនួនបួន ។មួយ.មានសុខភាពល្អ,ពីរ.មាន​ការអនុញ្ញាតពីមាតាបិតា,បី.មិនជាប់បំណុល​​នឹង​អ្នកដទៃនិងបួន.មិនជាប់ទោស​ដោយច្បាប់។

គួរជម្រាបថា ពិធីបំបួសនាគអាចធ្វើបានពេញមួយឆ្នាំ ប៉ុន្តែបើធ្វើនៅថ្ងៃ ១៤កើតខែអាសាឍ មុនចូលព្រះវស្សា ២ថ្ងៃ គឺល្អបំផុត ព្រោះអាចគង់ចាំព្រះវស្សាជាមួយព្រះសង្ឃអ្នកដទៃ និងមានឱកាសសិក្សា ចេះអានចេះសូត្រលើវចន​ធម៌បានយ៉ាងជ្រៅជ្រះ។

ក្នុងពិធីបំបួសនេះក៏បានអនុវត្តតាមប្រពៃណីបុរាណដូចជា ពិធីកោរសក់ ពិធីធ្វើធ្មេញនាគ ពិធីជូនត្រ័យដល់មាតាបិតា ពិធីចូលព្រះវិហារ និងវ​ន្ទាព្រះពុទ្ធរូប ពិធីសុំសេចក្ដីអភ័យពីអ្នកមានគុណ ពិធីកប់សក់សុំសេចក្ដីសុខជាដើម។
គិតត្រឹមឆ្នាំ ២០២៥នេះ ព្រះពុទ្ធសាសនាបានឈានដល់ ព.ស. ២៥៦៩ហើយ៕​
ដោយ៖​ប៊ុន​ រដ្ឋា