សម្តេចបវរធិបតី ហ៊ុន ម៉ាណែត និងលោកជំទាវបណ្ឌិត អញ្ជើញចាកចេញពីប្រទេសម៉ាឡេស៊ីបន្តដំណើរទៅប្រទេសជប៉ុន
គូឡាឡាំពួ ៖សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី បានអញ្ជើញចាកចេញពីអាកាសយានដ្ឋានអន្តរជាតិនៃប្រទេសម៉ាឡេស៊ី នាយប់ថ្ងៃទី២៧ ខែឧសភា ឆ្នាំ២០២៥ ដើម្បីបន្តដំណើរទៅកាន់ប្រទេសជប៉ុន បន្ទាប់ពីបញ្ចប់បេសកកម្មប្រកបដោយជោគជ័យ និងផ្លែផ្កា ក្នុងកិច្ចប្រជុំកំពូលអាស៊ាន លើកទី៤៦ និងកិច្ចប្រជុំកំពូលពាក់ព័ន្ធ នៅទីក្រុងគូឡាឡាំពួ ប្រទេសម៉ាឡេស៊ី រយៈពេលបីថ្ងៃ ។
យោងតាមសេចក្តីប្រកាសព័ត៌មាន របស់ក្រសួងការបរទេស បានឱ្យដឹងថា បំពេញទស្សនកិច្ចការងារផ្លូវការនៅ ប្រទេសជប៉ុន របស់សម្តេចធិបតីនាយករដ្ឋមន្ត្រី និង លោកជំទាវបណ្ឌិត ប្រព្រឹត្តទៅពីថ្ងៃទី២៨ ដល់ថ្ងៃទី៣១ ខែឧសភា តបតាមការអញ្ជើញរបស់រដ្ឋាភិបាលជប៉ុន ។
អញ្ជើញអមដំណើរសម្តេចធិបតីនាយករដ្ឋមន្ត្រី និងលោកជំទាវបណ្ឌិត រួមមាន ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ រដ្ឋមន្ត្រី មន្ត្រីជាន់ ខ្ពស់នៃរាជរដ្ឋាភិបាល និងតំណាងពីវិស័យឯកជន។
ក្នុងដំណើរទស្សនកិច្ចនេះ សម្តេចបវរធិបតី នឹងមានជំនួបពិភាក្សាទ្វេភាគីជាមួយ ឯកឧត្តម អ៊ីស៊ីបា ស៊ីហ្គេរ៉ូ(ISHIBA Shigeru) នាយករដ្ឋមន្ត្រីនៃប្រទេសជប៉ុន។ សម្តេចធិបតី ក៏គ្រោងនឹងមានជំនួបទ្វេភាគីដាច់ដោយឡែក ជាមួយថ្នាក់ដឹកនាំ នៃស្ថាប័ននីតិបញ្ញត្តិជប៉ុន និងអញ្ជើញចូលរួមថ្លែងសុន្ទរកថាគន្លឹះ នៅក្នុង សន្និសីទអន្តរជាតិ លើកទី៣០ ស្តីពី «អនាគតរបស់អាស៊ី»។ លើសពីនេះសម្តេចធិបតី នឹងអញ្ជើញ ចូលរួមវេទិកាធុរកិច្ចកម្ពុជា-ជប៉ុន ។
ក្នុងអំឡុងពេលស្នាក់នៅប្រទេសជប៉ុន សម្តេចធិបតីនាយករដ្ឋមន្ត្រី និងលោកជំទាវបណ្ឌិត នឹងមានជំនួបសំណេះសំណាលជាមួយ សហគមន៍ខ្មែរនៅប្រទេសជប៉ុន ផងដែរ ។
ជំវិញដំណើរទស្សនកិច្ចរបស់សម្តេចធិបតី ហ៊ុន ម៉ាណែត ទៅកាន់ប្រទេសជប៉ុននេះ ឯកឧត្តមបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានថ្លែងប្រាប់ AMS ថា ដំណើរទស្សនកិច្ចនេះ គឺជាការផ្តល់នូវសន្ទស្សន៍ថ្មីថែមទៀត សម្រាប់ទំនាក់ទំនងទ្វេភាគីរវាងកម្ពុជា និងជប៉ុន ត្បិតទំនាក់ទំនងរវាងប្រទេសទាំងពីរ គឺកំពុងតែមានការអភិវឌ្ឍរីកចម្រើនស្រាប់ ដោយកាលពីឆ្នាំ២០២៣ កន្លងទៅ កម្ពុជា និងជប៉ុន គឺបានដំឡើងកម្រិតទំនាក់ទំនងការទូតរបស់ខ្លួន រហូតដល់ទៅភាពជាដៃគូរយុទ្ធសាស្ត្រគ្រប់ជ្រុងជ្រោយ ដែលនេះ គឺជាការវិវត្តថ្មីក្នុងរយៈពេលជាង៧០ឆ្នាំ នៃទំនាក់ទំនងការទូតរបស់ប្រទេសទាំងពីរ ត្រូវបានពង្រឹងពង្រីក និងមានលក្ខណៈស៊ីជម្រៅទៅលើវិស័យជាច្រើន ទាំងនយោបាយ សេដ្ឋកិច្ច ពាណិជ្ជកម្ម ការអភិវឌ្ឍន៍ បច្ចេកវិទ្យា រហូតទៅដល់សន្តិសុខសាយប័រទៅទៀត ។
បណ្ឌិត គិន ភា បានបន្តថា ដំណើរទស្សនកិច្ចរបស់ សម្តេចធិបតី ទៅកាន់ប្រទេសជប៉ុននេះ គឺមានសារៈសំខាន់ សម្រាប់កម្ពុជា ក៏ដូចជា សម្រាប់ប្រទេសជប៉ុនដែរ ក្នុងការធ្វើឱ្យទំនាក់ទំនងកាន់តែស៊ីជម្រៅបន្ថែមទៀត ហើយក៏ជាការបញ្ជាក់អំពីដំណើរការធ្វើពិពិធកម្មការទូតរបស់កម្ពុជា ដូចដែលរាជរដ្ឋាភិបាល តែងតែបានបញ្ជាក់ម្តងហើយម្តងទៀតថា កម្ពុជា គឺប្រកាន់ភ្ជាប់ នូវគោលនយោបាយការបរទេសមួយដែលមិនយកប្រទេសណាជាសត្រូវ ហើយក៏មិនចូលរួមជាមួយប្រទេសណា ដើម្បីប្រឆាំងជាមួយប្រទេសណាដែរ គឺកម្ពុជា តែងតែមានបំណងប្រាថ្នា និងសុឆន្ទៈក្នុងការពង្រឹងពង្រីក ទំនាក់ទំនងការទូតរបស់ខ្លួន ជាមួយបណ្តាប្រទេសនានាទាំងអស់ ទាំងក្របខណ្ឌប្រទេសក្បែរខាង ប្រទេសនៅក្នុងតំបន់ និងពិភពលោក មិនដូចការចោទប្រកាន់ថា កម្ពុជា មានទំនាក់ទំនងចាក់ទឹកមិនលិចស៊ីជម្រៅតែជាមួយប្រទេសចិនទេ គឺជប៉ុន ក៏ជាប្រទេសដែលមានទំនាក់ទំនងភាពជាដៃគូរយុទ្ធសាស្ត្រគ្រប់ជ្រុងជ្រោយ ជាមួយនឹងកម្ពុជាផងដែរ ។ ទំនាក់ទំនងកម្ពុជា ជប៉ុន គឺចងដោយចំណងប្រវត្តិសាស្ត្រយូរអង្វែង ហើយនិងប្រវត្តិ នៃការគាំទ្រគ្នាទៅវិញទៅមក ជាពិសេស ចាប់ពីក្រោយកិច្ចព្រមព្រៀងសន្តិភាពទីក្រុងប៉ារីសមក ឃើញថា ប្រទេសជប៉ុន បានដើរតួនាទីដ៏មានសារៈសំខាន់ ក្នុងដំណើរការកសាងសន្តិភាពនៅកម្ពុជា ក៏ដូចជាការស្តារនិងអភិវឌ្ឍន៍ប្រទេសកម្ពុជាឡើងវិញ ៕
ដោយ៖វណ្ណលុក
