អង្គការសិទ្ធិកុមារចំនួន៥ នៅកម្ពុជា បើកវគ្គបណ្តុះបណ្តាលដល់អ្នកសារព័ត៌មានកម្ពុជា ស្តីពីការរក្សាសុវត្ថិភាព និងការរាយការណ៍អំពីកុមារ
ភ្នំពេញ៖អង្គការក្រៅរដ្ឋាភិបាលចំនួន៥ ដែលធ្វើសកម្មភាពគាំពារសិទ្ធិកុមារ ដើម្បីលុបបំបាត់នូវបញ្ហាប្រឈមនឹងអំពើកេងប្រវ័ញ្ច បង្កើនក្រមសីលធម៌ ការការពារកុមារនៅកម្ពុជា បានរៀបចំសិក្ខាសាលាមួយដល់អ្នកសារព័ត៌មានស្តីពី៖ ការរក្សាសុវត្ថិភាពកុមារ និងមនុស្សពេញវ័យក្នុងវិស័យសារព័ត៌មាន ។ អង្គការទាំង ៥ ដែលបានរៀបចំវគ្គបណ្តុះបណ្តាលនេះ រួមមាន អង្គការឃែរកម្ពុជា, អង្គការភ្លែនអន្តរជាតិកម្ពុជា, អង្គការ Save the Children, អង្គការយូនីសេហ្វ និងអង្គការទស្សនៈពិភពលោកអន្តរជាតិប្រចាំនៅកម្ពុជា ។
សកម្មភាពនេះ បានបង្ហាញពីកិច្ចខិតខំប្រឹងប្រែងរួម ដើម្បីលើកកម្ពស់វិជ្ជាជីវៈសារព័ត៌មាន ប្រកបដោយសីលធម៌ និងដោះស្រាយនូវកង្វល់អំពីការរាយការណ៍ ដែលអាចបង្កគ្រោះថ្នាក់ដល់កុមារ ។ គោលបំណងនៃ វគ្គបណ្ដុះបណ្ដាលដែលបានធ្វើឡើងកាលពីពេលថ្មីៗនេះគឺធ្វើឡើងដើម្បីការការពារកុមារ និងសហគមន៍ដែលងាយរងគ្រោះកាន់តែប្រសើរឡើង។ ការរៀបចំសិក្ខាសាលានេះ ក៏ដើម្បីពង្រឹងសមត្ថភាព និងការយល់ដឹងរបស់អ្នកសារមាន ដែលជាការចាំបាច់ណាស់ ដើម្បីធានាលើការផ្សាយព័ត៌មានរបស់ប្រព័ន្ធផ្សព្វផ្សាយដែលអាចរក្សារាល់សេចក្តីថ្លៃថ្នូរ និងសិទ្ធិរបស់កុមារ និងមនុស្សពេញវ័យ ។ កត្តាទាំងនេះ មានសារៈសំខាន់ ជាពិសេសនៅក្នុងរឿងទាក់ទងនឹងអំពើហិង្សា ការកេងប្រវ័ញ្ច ជម្លោះផ្នែកច្បាប់ ឬការរើសអើងសង្គម ។ តាមរយៈការផ្តល់អាទិភាពលើឧត្តមប្រយោជន៍របស់កុមារក្នុងការរាយការណ៍របស់អ្នកសារព័ត៌មាន ប្រព័ន្ធផ្សព្វផ្សាយអាចការពារការបង្កគ្រោះថ្នាក់ដោយអចេតនា និងបណ្តុះនូវទំនុកចិត្ត ការយល់ចិត្ត និងការយល់ដឹងកាន់តែច្រើននៅក្នុងសង្គម។
ឯកឧត្តម ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន ដែលបានអញ្ជើញចូលរួមក្នុងឱកាសនោះបានថ្លែងថា «តួនាទីរបស់អ្នកសារព័ត៌មាន គឺមានសារៈសំខាន់ណាស់ ការទទួលខុសត្រូវខ្ពស់ ជាអ្នកផ្គត់ផ្គង់សេចក្តីត្រូវការរបស់ពលរដ្ឋគ្រប់ស្រទាប់វណ្ណៈទៅលើចំណេះដឹងព័ត៌មាន ពុទ្ធិ និងការអប់រំ ។ អ្នកសារព័ត៌មានដែលមានទំនួលខុសត្រូវ និងមានក្រមសីលធម៌វិជ្ជាជីវៈត្រឹមត្រូវ គឺបានចូលរួមលើកកម្ពស់ ការពារសិទ្ធិ កិត្តិយស សេចក្តីថ្លៃថ្នូរ អនាគតរបស់កុមារ យុវវ័យ ។ សារព័ត៌មានប្រកបដោយក្រមសីលធម៌ ត្រូវចូលរួមធានាសុខុមាលភាពរបស់កុមារ និងជួយការពារកុមារពីការរងផលប៉ះពាល់នានាជាយថាហេតុ »។
លោក យី គឹមថាន នាយកស្តីទីអង្គការភ្លែនអន្តរជាតិប្រចាំកម្ពុជា បានមានប្រសាសន៍ថា៖ «ប្រព័ន្ធផ្សព្វផ្សាយដើរតួនាទីយ៉ាងសំខាន់ក្នុងការង្កើនការយល់ដឹង និងការយល់ឃើញរបស់សាធារណៈជន។ នេះជាការទទួលខុសត្រូវដ៏ធំ។ នៅពេលរាយការណ៍អំពីកុមារ យុវជន និងបុគ្គលដែលងាយរងគ្រោះ យើងត្រូវធានាថា សុវត្ថិភាព សេចក្តីថ្លៃថ្នូរ និងសិទ្ធិរបស់ពួកគេមិនត្រូវបានប៉ះពាល់ ឬបំពាន ឡើយ។ ឧត្តមប្រយោជន៍របស់ពួកគេ មិនគួរត្រឹមតែជាការពិចារណាប៉ុណ្ណោះទេ ប៉ុន្តែត្រូវតែជាគោលការណ៍ណែនាំក្នុងគ្រប់រឿងរ៉ាវទាំងអស់ ដើម្បីផ្លាស់ប្តូរការយល់ឃើញ និងជំរុញឱ្យមានការផ្លាស់ប្តូរ»។
យោងតាមសេចក្តីប្រកាសព័ត៌មានរួមនៃអង្គការទាំង៥ បានបញ្ជាក់ថា តាមរយៈវគ្គបណ្តុះបណ្តាល អ្នកសារព័ត៌មានទទួលបានចំណេះដឹងពីស្ថានភាពនៃការការពារកុមារនៅកម្ពុជា និងភាពខុសគ្នារវាងការរក្សាសុវត្ថិភាពកុមារ និងការការពារកុមារគោលការណ៍សំខាន់ៗនៃការរក្សាសុវត្ថិភាពកុមារ ក្រមសីលធម៌នៃការរក្សាសុវត្ថិភាពកុមារ ក្នុងវិស័យទំ នាក់ទំនង យេនឌ័រ និងបរិយាបន្ន យន្តការរាយការណ៍នៅទូទាំងអង្គការអន្តរជាតិផ្សេងៗគ្នា និងអង្គការសហប្រជាជាតិ ការនិយាយអំពីប្រធានបទស្មុគស្មាញ និងរសើបដែលពាក់ព័ន្ធនឹងកុមារ ក្មេងជំទង់ និងសហគមន៍ដែលងាយរងគ្រោះផងដែរ ៕
អត្ថបទ ៖ គង់ សុផុល
រូបភាព ៖ អ្នករៀបចំកម្មវិធី
