(ភ្នំពេញ)៖ អ្នករៀបចំព្រឹត្តិការណ៍ប្រណាំង់កង់ភ្នំ លោក យឿន ភីយុទ្ធ បានថ្លែងបញ្ជាក់ថា ក្រោមការជួយជ្រំជ្រែងពីសហព័ន្ធកីឡាទោចក្រយានកម្ពុជា ឧបត្ថម្ភដោយហាងកង់ FLYING BIKES និងបណ្តាក្រុមហ៊ុនមួយចំនួន ព្រឹត្តិការណ៍ប្រណាំងកង់ភ្នំ KAMPONG SPEU MTB CHELLENGE 2025 នឹងរៀបចំការប្រណាំងរយៈពេល២ថ្ងៃ ចាប់ពីថ្ងៃទី២១ដល់ថ្ងៃទី២២ ខែ មិថុនា ឆ្នាំ២០២៥ ស្ថិតក្នុងឃុំ ក្រាំងអំពិល ក្នុងទឹកដី ខេត្ត កំពង់ស្ពឺ។

អ្នករៀបចំព្រឹត្តិការណ៍ប្រណាំងខាងលើ បានរំលេចថា ក្នុងព្រឹត្តិការណ៍ប្រណាំងរយៈពេល២ថ្ងៃនេះ គណៈកម្មការរៀបចំការប្រកួតបានបញ្ចូលវិញ្ញាសាប្រណាំងថ្មីមួយបន្ថែមទៀត គឺXCM Mountain Bike Marathon ចម្ងាយ៤៣.៥គីឡូម៉ែត្រ ដោយប្រើប្រាស់ថេរៈវេលាប្រណាំងប្រមាណជាជាង២ម៉ោងកន្លះ ធ្វើការប្រណាំងនៅថ្ងៃទី២១។ខណៈដែលវិញ្ញាសាប្រណាំងXCO MOUNTAIN BIKE CROSS COUNTRY OLYMPIC ដែលជាវិញ្ញាសាប្រណាំងជារៀងរាល់ឆ្នាំ គឺធ្វើនៅថ្ងៃទី២២ ខែ មិថុនា ឆ្នាំ២០២៥។

លោក យឿន ភីយុទ្ធ បានបញ្ជាក់ទៀតថា វិញ្ញាសា XCM Mountain Bike Marathon ដែលជាវិញ្ញាសាថ្មីបញ្ចូលទៅក្នុងកម្មវិធីប្រណាំងក្នុងឆ្នាំ២០២៥នេះ គឺជាវិញ្ញាសាដែលថ្មីបំផុតសម្រាប់ប្រទេសកម្ពុជា ដែលរំពឹងខ្ពស់ថា នឹងរួមចំណែកយ៉ាងខ្លាំងក្នុងការទាក់ទាញទេសចរបរទេសមកកំសាន្តនៅកម្ពុជា តាមរយៈការចូលរួមប្រណាំង។ ខណៈដែលបច្ចុប្បន្នវិញ្ញាសាថ្មីនេះ ទទួលបានជនជាតិបរទេសចុះឈ្មោះចូលរួមប្រណាំងបានចំនួន៣០នាក់ទៅហើយ។

អ្នករៀបចំព្រឹត្តិការណ៍ប្រណាំងកង់ភ្នំរូបនេះ បានអំពាវនាឱ្យកីឡាករកីឡាការិនីកម្ពុជាដែលមានបំណងចង់សាកល្បងចូលរួមប្រណាំងក្នុងវិញ្ញាសាថ្មីនេះ អាចចុះឈ្មោះចូលរួមតាមរយៈផេកហ្វេសបុករបស់ FLYINGBIKES EVENTS ក្នុងតម្លៃ២០ដុល្លារ ខណៈដែលវិញ្ញាមួយនេះ ការចុះឈ្មោះប្រណាំងនៅបរទេសតម្លៃចាប់ពី១០០ដុល្លារឡើងទៅ។ វិញ្ញាសាថ្មី XCM Mountain Bike Marathon ចម្ងាយ៤៣.៥គីឡូម៉ែត្រដែលប្រណាំងនៅថ្ងៃទី២១ ខែ មិថុនា ឆ្នាំ២០២៥ ជាការរៀបចំសាកល្បង ប្រសិនបើទទួលបានជោគជ័យ មានអ្នកឧបត្ថម្ភ និងមានចូលរួមប្រកួតច្រើននោះ វិញ្ញាសាថ្មីមួយនេះ នឹងមានវត្តមានប្រកួតនៅខេត្តផ្សេងៗនៅចុងឆ្នាំ២០២៥ ដែលជាការរូលរួមចំណែកផ្សព្វផ្សាយពីសក្កានុពលទេសចរតំបន់ក្នុងប្រទេសកម្ពុជា៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ