បង្កាត់ពូជសត្វត្រដក់ធំបានកូន ២ក្បាលយ៉ាងជោគជ័យ
(ភ្នំពេញ)៖មជ្ឈមណ្ឌលអង្គរសម្រាប់ការអភិរក្សជីវៈចម្រុះ(ACCB)បានធ្វើការបង្កាត់ត្រដក់ធំមួយគូដែលគេបានចិញ្ចឹមថែទាំទុក ដោយក្នុងនេះទទួលបានកូនត្រដក់ធំចំនួនពីរក្បាលយ៉ាងជោគជ័យ។
មជ្ឈមណ្ឌលអង្គរសម្រាប់ការអភិរក្សជីវៈចម្រុះបានឱ្យដឹងនៅថ្ងៃទី០៤ ខែ មិថុនា ឆ្នាំ ២០២៥ថា”ពេលនេះពួកកូនត្រដក់ធំទាំងនេះ វាអាចហើរបានហើយ ។នេះជាសមិទ្ធផលដ៏សំខាន់មួយដែលបានបញ្ជាក់ឱ្យឃើញថាការខិតខំប្រឹងប្រែងក្នុងការអភិរក្សរបស់ពួកយើងកំពុងតែបន្តសម្រាប់ប្រភេទដ៏អស្ចារ្យនេះ”។
នេះមិនមែនជាការព្យាយាមបង្កាត់ពូជជាលើកដំបូងរបស់ពួកវានោះទេពោលគឺកាលពីក្នុងឆ្នាំ២០២៣ និងឆ្នាំមុន ២០២៤ មជ្ឈមណ្ឌលអង្គរសម្រាប់ការអភិរក្សជីវៈចម្រុះបានធ្វើការភ្ញាស់ដោយជោគជ័យពូជសត្វត្រដក់ធំម្តងរួចមកហើយ ប៉ុន្តែជាអកុសលកូនត្រដក់ទាំងនោះមិនបានរស់រានមានជីវិតឡើយ។ ដោយបទពិសោធន៍នេះហើយបានបង្ហាញឱ្យឃើញនូវបញ្ហាប្រឈមក្នុងការអភិរក្សបង្កាត់ពូជ។
សម្រាប់កូនត្រដក់ដែលទើបតែកើតថ្មី ហើយរៀនហើរទាំងនោះ ស្ថិតនៅក្រោមការមើលថែទាំដោយមេបារបស់ពួកវានៅឡើយ។ ដោយមានការគាំទ្រពីរដ្ឋាភិបាល និងអង្គការដៃគូអភិរក្ស កូនត្រដក់ទាំងនេះនឹងត្រូវលែងចូលទៅក្នុងតំបន់ការពារវិញនៅក្នុងប្រទេសកម្ពុជា ដើម្បីពង្រឹងឱ្យមានស្ថិរភាពនូវចំនួនប្រជាសាស្ត្ររបស់ពួកវាបន្ថែមទៀតនៅក្នុងព្រៃធម្មជាតិ ។នេះក៏ជាការពង្រឹង និង ក៏ដូចជា ការអភិរក្សរបស់ប្រទេសកម្ពុជាសម្រាប់សត្វដ៏កម្រទាំងនេះឱ្យមានចំនួនកាន់តែច្រើនក្នុងប្រទេសកម្ពុជា។
កាលពីឆ្នាំ២០២៣ សត្វត្រដក់ធំនេះត្រូវបានធ្វើបច្ចុប្បន្នភាពចុះក្នុងបញ្ជីក្រហមពីរប្រភេទកំពុងរងគ្រោះជិតផុតពូជទៅជាប្រភេទជិតទទួលរងគ្រោះជាក្រុមមានដោយបង្គួរ។សកម្មភាពអភិរក្សដែលប្រព្រឹត្តទៅបានដោយជោគជ័យ ដែលបានធ្វើឱ្យកើនឡើងនូវចំនួនប្រជាសាស្ត្រទាំងពីរតំបន់នៅក្នុងប្រទេសកម្ពុជា និងនៅភូមិភាគឦសានក្នុងប្រទេសឥណ្ឌា។
ទោះបីជាយ៉ាងណាក៏ដោយ សត្វត្រដក់ធំត្រូវបានគេប៉ាន់ប្រមាណថាចំនួនប្រជាសាស្រ្តសរុបជាសកលមានត្រឹមតែ ៣១៨០-៣៣០០ ក្បាលប៉ុណ្ណោះ ដោយក្នុងនោះប្រហែលជា ៧៥០ ក្បាលមាននៅក្នុងប្រទេសកម្ពុជា។ការបន្តកិច្ចខិតខំប្រឹងប្រែងក្នុងការអភិរក្សគឺមានសារសំខាន់ខ្លាំងណាស់នៃសត្វដ៏កម្រទាំងនេះ។
គួរបញ្ជាក់ថាសត្វត្រដក់ធំ មានបណ្តោយខ្លួនធំ ឆ្នូតបណ្ដោយកណ្ដាលផ្ទាំងស្លាបលើ ពណ៌ប្រផេះ មានរោមសនៅគល់ក និងថង់យាមមួយនៅករបស់វា។ ចំណីរបស់វាមាន ត្រី កណ្តុរ កង្កែប ពពួកល្មូនជាដើម និងជួនកាលស៊ីសាកសព ឬគមរង់ផ្សេងៗ ហើយនៅរដូវពងកូន ពេលខ្លះវាចាប់កូនសត្វ ស្លាបដទៃស៊ីជាអាហារ។សត្វប្រភេទនេះភាគច្រើនរស់នៅតាមតំបន់ព្រៃរនាម តំបន់ដីសើម និងព្រៃល្បោះ មានបន្ទាយពងកូនយ៉ាងធំ នៅតំបន់ព្រែកទាល់បឹងទន្លេសាប ដែលជាបន្ទាយពងកូនធំជាងគេបំផុតនៅក្នុងតំបន់អាស៊ីអាគ្នេយ៍ និងជា បន្ទាយពងកូនធំជាងគេទីពីរលើពិភពលោក៕
ដោយ ៖ ម៉ាដេប៉ូ
