មន្រ្តីជាន់ខ្ពស់ក្រសួងអភិវឌ្ឍន៍ជនបទអញ្ជើញពិនិត្យមើលផលប៉ះពាល់ផ្លូវជនបទចំនួនបីខ្សែនៅខេត្តបន្ទាយមានជ័យ
បន្ទាយមានជ័យ៖ឯកឧត្តម លី ណារុន រដ្ឋលេខាធិការនក្រសួងអភិវឌ្ឍន៍ជនបទ និងជានាយករងគម្រោងកែលម្អការតភ្ជាប់ផ្លូវជនបទ(RRCIP)រួមដំណើរដោយលោក ឃ្លោក នួយ អភិបាលរងខេត្តតំណាងឯកឧត្តម អ៊ុ រាត្រី អភិបាលខេត្ត លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តក្នុងសប្ដាហ៍នេះបានអញ្ជើញពិនិត្យមើលផលប៉ះពាល់ ផ្លូវជនបទចំនួន៣ខ្សែប្រវែងជាង៦០គីឡូម៉ែត្រ ដែលស្ថិតនៅក្នុងស្រុកមួយចំនួន ក្នុងខេត្តបន្ទាយមានជ័យ។
មន្រ្តីជំនាញបានបង្ហាញថា គម្រោងផ្លូវទាំងបីខ្សែនេះមាន៖ ទី១.ផ្លូវស្ពានស្រែងពីស្រុកភ្នំស្រុក ដែលមានឃុំទឹកជោរ ឃុំស្ពានស្រែង និងឃុំភ្នំដី ស្រុកព្រះនេតព្រះ មានទទឹង ៨ម៉ែត្រ និងប្រវែង ២៤គីឡូម៉ែត្រ។ ទី២.ខ្សែផ្លូវតាផូ ពីស្រុកភ្នំស្រុក ដែលមាន ឃុំរលួស ឃុំតាផូ ឃុំសារង្គ និងឃុំពន្លៃ ដល់ស្រុកព្រះនេតព្រះ មានទទឹង ៨ម៉ែត្រ និងប្រវែង ២៩គីឡូម៉ែត្រនិង ទី៣. ខ្សែផ្លូវរលួស-ភូមិថ្មី ពីស្រុកស្វាយចេក ដល់ស្រុកថ្មពួក ដែលមានឃុំរលួស ឃុំទ្រាស និងឃុំភូមិថ្មី មានទទឹង ៨ម៉ែត្រ និងមានប្រវែង ១៤.១០គីឡូម៉ែត្រ ។
ក្រសួងអភិវឌ្ឍន៍ជនបទបានជ្រើសរើសខ្សែផ្លូវក្នុងខេត្តបន្ទាយមានជ័យចំនួនបីខ្សែ នឹងត្រូវកែលម្អលើកកម្រិតគុណភាពផ្លូវទៅជាក្រាលកៅស៊ូពីរជាន់ ឬកម្រាលបេតុងនៅក្នុងឆ្នាំ២០២៦ខាងមុខ ។បច្ចុប្បន្នផ្លូវទាំង ៣ខ្សែ កំពុងស្ថិតក្នុងដំណាក់កាលសិក្សាគ្រោងប្លង់ បច្ចេកទេសលម្អិតដោយក្រុមហ៊ុនទីប្រឹក្សាបច្ចេកទេស Nippon Koei។
ក្នុងឱកាសនេះឯកឧត្តម លី ណារុន រដ្ឋលេខាធិការនៃក្រសួងអភិវឌ្ឍន៍ជនបទ និងជានាយករងគម្រោង កែលម្អការតភ្ជាប់ផ្លូវជនបទ បានសំណូមពរដល់ប្រជាពលរដ្ឋ សូមចូលរួមសហការជាមួយអាជ្ញាធរមូលដ្ឋាន ដើម្បីងាយស្រួលដល់ក្រុមការងារចុះអនុវត្តសាងសង់ផ្លូវជូនបានឆាប់រហ័ស៕
ដោយ៖ឃិន គន្ធា
