មន្រ្តីក្រសួងកសិកម្ម ចុះពិនិត្យ និងបង្រ្កាបបទល្មើសជលផល ក្នុងភូមិសាស្រ្តមួយចំនួន ក្នុងខេត្តព្រៃវែង
(ភ្នំពេញ)៖ឧបករណ៍នេសាទល្មើសច្បាប់ក្នុងនោះរួមមានទាំងស្បែមុង របាំងព្រួល បង្រ្គោលចម្រឹង ត្រូវបានបង្រ្កាបនៅស្រុក ពោធិ៍រៀង ក្នុង ខេត្តព្រៃវែង។នេះជាការចុះបង្រ្កាបដើម្បីអភិរក្សពូជត្រី និងក៏ដូចជាកិច្ចការពារជីវចម្រុះសត្វក្នុងទឹកដើម្បីសំដៅធ្វើយ៉ាងណាឱ្យមានសម្បូរបែបចៀសវាងការបំផ្លាញដោយជនល្មើសនេសាទខុសច្បាប់។
បើតាមក្រសួងក្រសួងកសិកម្មរុក្ខាប្រមាញ់ និងនេសាទបានឱ្យដឹងថាការបង្រ្កាបនេះធ្វើឡើងដោយ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយកាលពីថ្ងៃទី១១ ខែមិថុនា ឆ្នាំ២០២៥ បានដឹកនាំក្រុមការងារបាន ចុះស្រាវជ្រាវ ត្រួតពិនិត្យ ទប់ស្កាត់ និងបង្ក្រាបបទល្មើសជលផល នៅក្នុងភូមិសាស្ត្រសង្កាត់កំពង់លាវ ក្រុងព្រៃវែង និងឃុំព្រែកជ្រៃ ស្រុកពោធិ៍រៀង ខេត្តព្រៃវែង។
ប្រភពខាងលើនេះបានបញ្ជាក់ថាជាលទ្ធផលនៃការបង្រ្កាបនេះ សរុបមានចំនួន ២ករណី ដែលជាការនេសាទដោយប្រើប្រាស់ឧបករណ៍ស្បៃមុង ។ ជាមួយគ្នានោះឧបករណ៍នេសាទល្មើសច្បាប់ ត្រូវបានរុះរើបំផ្លាញចោលនៅនឹងកន្លែងនេសាទ រួមមាន៖ លូស្បៃមុងចំនួន ៤៣មាត់ របាំងព្រួលស្បៃមុងប្រវែង ១ ៨៦០ម៉ែត្រ បង្គោលចម្រឹងចំនួន៦២៥ដើម និងបានចាក់លែងត្រីចម្រុះចូលទៅក្នុងបឹងធម្មជាតិវិញទម្ងន់ ២០គីឡូក្រាម និងវារីសត្វ១០គីឡូក្រាម ៕
ដោយ ៖ ម៉ាដេប៉ូ
