មន្រ្តីរដ្ឋបាលខេត្តស្វាយរៀងជំរុញមន្រ្តីវិទ្យាស្ថានពហុបច្ចេកទេសភូមិភាគតេជោសែនស្វាយរៀង លើការងារបណ្ដុះបណ្ដាល
ស្វាយរៀង៖អញ្ជើញចូលរួមក្នុងកម្មវិធីទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ លើកទី៨ ឆ្នាំ២០២៥ក្រោមប្រធានបទ “ការអប់រំបណ្តុះបណ្តាលបច្ចេកទេស និងវិជ្ជាជីវៈ បង្កើតឱកាសការងារ សាងក្តីសង្ឃឹមដល់យុវជន” នាព្រឹកថ្ងៃទី១៥ ខែមិថុនា លោក សេង សិលា អភិបាលរងខេត្តស្វាយរៀងបានជំរុញដល់វិទ្យាស្ថានពហុបច្ចេកទេសភូមិភាគតេជោសែនស្វាយរៀងឱ្យខិតខំបន្តជ្រើសរើសសិស្សចូលរៀនគ្រប់កម្រិតសិក្សា ជាពិសេស កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស១.៥លាននាក់ លើក្រុមគោលដៅមកពីគ្រួសារមានបណ្ណសមធម៌ និងគ្រួសារងាយរងហានិភ័យ។
ក្នុងឋានៈតំណាងឯកឧត្តម ប៉េង ពោធិ៍សា អភិបាលខេត្តស្វាយរៀង លោក សេង សិលា ក៏បានផ្តាំផ្ញើដល់វិទ្យាស្ថានពហុបច្ចេកទេសភូមិភាគតេជោសែនស្វាយរៀងខិតខំស្រាវជ្រាវ ពង្រឹងសមត្ថភាពរបស់ខ្លួនឱ្យស្របតាមបច្ចេកវិទ្យាដែលកំពុងតែរីកចម្រើនរៀងរាល់ថ្ងៃ។ខិតខំបណ្តុះបណ្តាលដល់សិក្ខាកាម ឱ្យមានសមត្ថភាពជំនាញគ្រប់គ្រាន់ និងមានសីលធម៌ គុណធម៌។ពង្រីកវិសាលភាពរបស់ខ្លួនដើម្បីសិក្ខាកាម សិស្ស និស្សិត ក្រោយបញ្ចប់វគ្គបណ្តុះបណ្តាល មានកន្លែងកម្មសិក្សា និងការងារធ្វើ។
លោក មុត ចិន្តា នាយកវិទ្យាស្ថានពហុបច្ចេកទេសភូមិភាគតេជោសែនស្វាយរៀងបានឱ្យថា ក្រោយការប្រកាសដាក់ចេញនូវកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ១.៥លាននាក់ ដល់គ្រួសារក្រីក្រ និងគ្រួសារងាយរងហានិភ័យ នាថ្ងៃទី១៤ ខែវិច្ឆិកា ឆ្នាំ២០២៣ ក្រោមអធិបតីភាពដ៏ខ្ពង់ខ្ពស់ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា វិទ្យាស្ថានពហុបច្ចេកទេសភូមិភាគតេជោសែនរៀង បានធ្វើការប្រកាសជ្រើសរើសតាមគ្រប់រូបភាព និងចុះជ្រើសរើសតាមបណ្តាឃុំសង្កាត់ ចុះតាមផ្ទះ ព្រមទាំងមានការប្រជុំរួមនៅតាមបណ្តាក្រុងស្រុកផងដែរ។ វិទ្យាស្ថានបានកំណត់យកវិស័យចំនួន៥ លើមុខជំនាញចំនួន៧គឺ ជំនាញការដំឡើងបណ្តាញអគ្គិសនីក្នុងអគារ ,ជំនាញសេវាកម្មបរិក្ខារត្រជាក់ក្នុងគេហដ្ឋាន ,ជំនាញសេវាកម្មថែទាំ និងជួសជុលរថយន្ត ,ជំនាញជួសជុល និងថែទាំបរិក្ខារអេឡិចត្រូនិក, ជំនាញសម្អាងការ ,ជំនាញសេវាកម្មកុំព្យូទ័រ ជំនាញថែទាំ និងដំឡើងកាមេរ៉ាសុវត្ថិភាព។ ចាប់តាំងពីផ្តើមដំណើរការជ្រើសរើសសិស្សចូលរៀនមក រហូតដល់ពេលនេះមានសិស្សដាក់ពាក្យចូលរៀនសចំនួន២.០៣១នាក់ ក្នុងនេះក្រុមគោលដៅមានចំនួន៧១៣នាក់។ វិទ្យាស្ថាននឹងបន្តជ្រើសរើសសិស្សតាមជំហានៗ និងខិតខំអនុវត្តឱ្យអស់ពីសមត្ថភាព លទ្ធភាព ដោយគោរពតាមអនុសាសន៍ដ៏ខ្ពង់ខ្ពស់បំផុតរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា “រៀនឱ្យចប់ ឱ្យចេះ ឱ្យមានការងារ”។
សូមជម្រាបថា ខេត្តស្វាយរៀង មានតំបន់សេដ្ឋកិច្ចពិសេសចំនួន១២ ,មានរោងចក្រសហគ្រាសតូចធំចំនួន១ ០២៥ កន្លែង បានបង្កើតការងារជូនចំនួន ១៣១,៤៥៣នាក់( ស្រី៧៦,៨៤១នាក់) ។បច្ចុប្បន្នតំបន់សេដ្ឋកិច្ចពិសេសនានាក្នុងខេត្ត ក៏ត្រូវការកម្មករប្រមាណ២៦ ០៤៤នាក់បន្ថែមទៀត។
តបនឹងតម្រូវការលោកអភិបាលរងខេត្តបានជំរុញឱ្យយកចិត្តទុកដាក់ចំពោះអ្នកចំណាកស្រុកទៅធ្វើការនៅប្រទេសជិតខាងដែលអាចវិលត្រឡប់មកវិញ បានធ្វើការងារតាមបណ្ដារោងចក្រនានាក្នុងខេត្តដែលកំពុងត្រូវការ៕
ដោយ៖នុត នាង
