ភ្នំពេញ ៖ អគ្គីភ័យបានឆាបឆេះហាងសំអាងការ អប្សរាភ្នំពេញ មួយកន្លែងនៅជាប់ផ្លូវលេខ៦៣ (ផ្លូវត្រសក់ផ្អែម) កែងផ្លូវលេខ១៨៤ ស្ថិតក្នុងសង្កាត់បឹងរាំង ខណ្ឌដូនពេញ ដោយបង្កការភ្ញាក់ផ្អើលដល់អ្នកជិតខាង និងសមត្ថកិច្ចមូលដ្ឋានជួយអន្តរាគមន៍ កាលវេលាម៉ោង៣ និង៤០នាទីរសៀល ថ្ងៃទី២៤ ខែមេសា ឆ្នាំ២០១៩នេះ ។

តាមប្រភពព័ត៌មានពីកន្លែងកើតហេតុបានឲ្យដឹងថា ក្នុងហេតុការណ៍អគ្គីភ័យខាងលើនេះ មានមនុស្ស៤នាក់បានជាប់ក្នុងហេតុការណ៍នោះ ហើយអាជ្ញាធរមូលដ្ឋាន និងអ្នកជំនាញបានស្វះស្វែងជួយសង្គ្រោះ និងរំដោះបានទាំង៤នាក់ ក៏ប៉ុន្តែមាននារីម្នាក់បានសន្លប់ស្ដូកស្ដឹងត្រូវបានសមត្ថកិច្ចបញ្ចូនទៅមន្ទីពេទ្យភ្លាមៗ និងមនុស្ស៣នាក់ទៀតពុំមានបញ្ហាអ្វីនោះទេ ។

ប្រភពដដែលបានឲ្យដឹងថា ក្នុងហេតុការណ៍អគ្គីភ័យខាងលើនេះ បណ្ដាលមកពីទុសេខ្សែភ្លើងបន្ទប់ជាន់ទី3 និងមានរថយន្តពន្លត់អគ្គីភ័យជាច្រើនគ្រឿងមកពីស្ថាប័នផ្សេងគ្នា បានសហការគ្នាយ៉ាងយកចិត្តទុកដាក់ក្នុងការជួយបាញ់ពន្លត់អគ្គីភ័យខាងលើនេះ ដោយបានប្រើប្រាស់រថយន្តពន្លត់អគ្គីភ័យអស់ទឹកចំនួន ៣១គ្រឿង ទើបរលត់ទៅវិញជាស្ថាព័រ ។ ចំពោះទំហំនៃទ្រព្យសម្បត្តិ និងសម្ភារៈក្នុងទីតាំងដែលត្រូវឆេះខាងលើនេះ អាជ្ញាធរមូលដ្ឋាននៅមិនទាន់កំណត់បាននៅឡើយទេ ៕ធ.ដ