ឃើញសមត្ថកិច្ចភ័យពេក រត់ឡើងតោងខ្សែភ្លើងឆក់ស្លាប់យ៉ាងអណោចអធម៌
ភ្នំពេញ ៖ មានហេតុការដ៏រន្ធត់ និងភ្ញាក់ផ្អើលមួយបានកើតឡើង ពេលក្មេងប្រុសវ័យ១៤ឆ្នាំម្នាក់ បានឆក់ខ្សែភ្លើងស្លាប់ កាលពីវេលាម៉ោង៣ និង១០នាទីរសៀលថ្ងៃទី១៧ ខែតុលា ឆ្នាំ២០១៨ ស្ថិតតាមបណ្តោយផ្លូវ២៧១ សង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ ពេលដែលក្មេងប្រុសរូបនោះបានព្យាយាមរត់គេចពីសមត្ថកិច្ច ហើយតោងបង្គោលភ្លើងបណ្តាលឲ្យឆក់ស្លាប់តែម្ដង។
តាមប្រភពពីប្រជាពលរដ្ឋដែលនៅជុំវិញកន្លែងកើតហេតុបានប្រាប់ឲ្យដឹងថា ដំបូងក្មេងប្រុសម្នាក់នេះ បានទៅដើរលេងក្បែរប្រឡាយទឹក ហើយស្របពេលនោះ មានអាជ្ញាធរមួយក្រុម ចុះមកពិនិត្យស្ថានភាពការស្តារប្រឡាយខាងលើ។ ភ្លាមនោះក្មេងប្រុសរងគ្រោះ មានការភ័យពេកក៏បានរត់ឆ្លងប្រឡាយ ខ្លួនទទឹកជោគ រួចបានបន្តរត់ទៅផ្លោះរបងផ្ទះប្រជាពលរដ្ឋ ក៏តោង ប៉ះចំបង្គោលភ្លើង បណ្តាលឲ្យឆក់ខ្សែភ្លើងស្លាប់នៅលើចំម្រឹងដែករបងតែម្តង។
ពាក់ព័ន្ធនឹងករណីខាងលើនេះ សមត្ថកិច្ចបានមូលដ្ឋានបានឲ្យដឹងថា ក្មេងប្រុសមានឈ្មោះ ម៉ូ នី អាយុ១៤ឆ្នាំ ស្នាក់នៅម្តុំសំណង់១២ សង្កាត់ទឹកល្អក់ទី២ ខណ្ឌទួលគោក។ សមត្ថកិច្ចបានបន្តថា ទំនងក្មេងប្រុសម្នាក់នេះ ធ្លាប់ប្រើប្រាស់ថ្នាំញៀន ទើបពេលឃើញសមត្ថកិច្ច ភ័យហើយរត់គេច រហូតមកជួប រឿងបែបនេះ។
ក្រោយកើតហេតុ សមត្ថកិច្ចមូលដ្ឋាន បានសហការជាមួយនឹងមន្ត្រីជំនាញ ចុះធ្វើកោសល្យវិច្ច័យលើសពដល់ទីតាំងកើតហេតុ រួចបានប្រគល់សពឲ្យទៅក្រុមគ្រួសារ ដឹកយកទៅ ធ្វើបុណ្យតាមប្រពៃណី ក្រោយពិនិត្យឃើញថា ពិតជាស្លាប់ដោយខ្សែភ្លើងឆក់ប្រាកដមែន៕
