រថយន្តឡិសស៊ីស RX300 ស្លាកលេខភ្នំពេញ 2AQ-0032 បើកចុះពីស្ពានអាកាសក្បាលថ្នល់ ជ្រុលទៅបុករថយន្ត៣គ្រឿង ខណៈពេលកំពុងកកស្ទះចរាចរណ៍!
រាជធានីភ្នំពេញ ៖ ករណីគ្រោះថ្នាក់ចរាចរណ៍មួយបង្កឡើងដោយរថយន្ត Lexus RX300 បើកចុះពីស្ពាន ទៅបុកពីក្រោយរថយន្ត CHEVROLET MINI ហើយរុញទៅបុកជាមួយនឹងរថយន្ត Highlander មួយគ្រឿងទៀត ហើយបន្តទៅបុកជាមួយនឹងរថយន្ត Lexus 570 ស៊េរីទំនើបមួយគ្រឿងទៀត បណ្ដាលឲ្យរថយន្ត CHEVROLET MINI ខ្ទេចផ្នែកខាងមុខយ៉ាងដំណំ រីឯរថយន្ត៣គ្រឿងទៀត រងការខូចខាតផ្នែកខាងមុខនិងខាងក្រោយយ៉ាងដំណំផងដែរ។
ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង០៨:៤០នាទីយប់ ថ្ងៃសុក្រ ទី០៥ ខែតុលា ឆ្នាំ២០១៨នេះនៅត្រង់ចំណុចលើស្ពានអាកាសក្បាលថ្នល់ ដែលស្ថិតក្នុងសង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
សាក្សីនៅក្បែរកន្លែងកើតហេតុបានរៀបរាប់ប្រាប់អោយភ្នាក់ងារ TNN ដឹងថា នៅមុនពេលកើតហេតុ ខណៈពេលដែលចរាចរណ៍កំពុងមានការកកស្ទះ និងមមាញឹក គេឃើញ រថយន្ត Lexus RX300 ពណ៍ស្ករ ពាក់ស្លាកលេខភ្នំពេញ 2AQ-0032 បើកបរដោយបុរសម្នាក់ រួមដំណើរជាមួយប្រពន្ធនិងកូនតូចម្នាក់ទៀត ធ្វើដំណើរក្នុងទិសដៅ ពីជើងទៅត្បូង ខណៈពេលបើកចុះពីលើស្ពាន ក៏ជ្រុលទៅបុកពីក្រោយរថយន្ត CHEVROLET MINI ពណ៍ស ពាក់ស្លាកលេខភ្នំពេញ 2AQ-3821 បើកបរដោយយុវតីរូបស្រស់២នាក់បងប្អូន ហើយរុញទៅបុកជាមួយនឹងរថយន្ត Highlander មួយគ្រឿងទៀត ពណ៍ឈាមជ្រូក ពាក់ស្លាកលេខភ្នំពេញ 2AA-0164 បើកបរដោយបុរស៣នាក់ ហើយបន្តទៅបុកជាមួយនឹងរថយន្ត Lexus 570 ស៊េរីទំនើបមួយគ្រឿងទៀត (មិនចាំស្លាកលេខ) បណ្ដាលឲ្យរថយន្ត CHEVROLET MINI ខូចខាតខ្លាំងជាងគេ គឺខ្ទេចផ្នែកខាងមុខយ៉ាងដំណំ រីឯរថយន្ត៣គ្រឿងទៀត រងការខូចខាតផ្នែកខាងមុខនិងខាងក្រោយបន្តិចបន្តួចដែរទេ។
បន្ទាប់មកសមត្ថកិច្ចមូលដ្ឋានបានចុះមកកន្លែងកើតហេតុជួយសម្រួលចរាចរណ៍ រួចអោយភាគីរថយន្តទាំង៤គ្រឿង បើកចុះមកអែបក្បែរចិញ្ចើមផ្លូវ ដើម្បីដោះស្រាយគ្នាមួយជំហានសិន ព្រោះចរាចរណ៍កំពុងមានការកកស្ទះ និងមមាញឹក យ៉ាងខ្លាំង ដោយមិនចង់វែងឆ្ងាយ និងមិនខូចខាតអ្វីធ្ងន់ទេ ម្ចាស់រថយន្តស៊េរីទំនើប Lexus 570 ក៏បានបន្តដំណើរទៅមុខបាត់ទៅ (ដោយមិនទាមទារសំណងអ្វីនោះទេ)។
ក្រោយមកនៅសល់រថយន្តរងគ្រោះ២គ្រឿងទៀត បានហៅតំណាងនិងបងប្អូនមកជួយធ្វើការចរចារ និងដោះស្រាយគ្នា ជិតកន្លះម៉ោងរួចមក បុរសដែលជាម្ចាស់រថយន្ត Lexus RX300 បង្កហេតុនោះ បានព្រមសងថ្លៃខូចខាតទៅកាន់រថយន្ត Highlander និងធានាយករថយន្ត CHEVROLET MINI ទៅជួសជុលអោយ ដើម្បីបញ្ចប់រឿង នៅកន្លែងកើតហេតុជាមួយគ្នាផងដែរ៕