យោងតាមសេចក្តីប្រកាសព័ត៌មានព្រឹទ្ធសភា ស្តីពី លទ្ធផលនៃកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា បានឲ្យដឹងថា នាថ្ងៃសុក្រ ទី០៥ ខែតុលា ឆ្នាំ២០១៨ វេលាម៉ោង ៨:០០នាទីព្រឹក គណៈកម្មាធិការអចិន្ត្រៃយ៍ព្រឹទ្ធសភា បានបើកកិច្ចប្រជុំ ក្រោមអធិប​តី​ភាព​​ដ៏ខ្ពង់​ខ្ពស់​របស់ ឯកឧត្តម ទេព ងន ប្រធានស្តីទីព្រឹទ្ធសភា ដោយមានរបៀបវារៈដូចខាងក្រោម ៖

១– ពិនិត្យ និងសម្រេចសំណើរបស់គណបក្សប្រជាជនកម្ពុជាលេខៈ ០៤៨/១៨ និងលេខ: ០៤៩/១៨ លគ.គក ចុះថ្ងៃទី០៣ និងថ្ងៃទី០៤ ខែតុលា ឆ្នាំ២០១៨ ស្តីអំពីសំណើសុំផ្លាស់ប្តូរសមាជិកព្រឹទ្ធសភានៅមណ្ឌលភូមិភាគទី៥ និងសំណើសុំជ្រើសតាំងអនុប្រធានទី១ព្រឹទ្ធសភាថ្មី ជំនួសឯកឧត្តម នៃ ប៉េណា ដែលបានទទួលមរណភាពកាលពីថ្ងៃទី២៩ ខែកញ្ញា ឆ្នាំ២០១៨។  

២– ពិនិត្យ និងសម្រេចលើសំណើរបស់សមាជិកព្រឹទ្ធសភា ចុះថ្ងៃទី០៤ ខែតុលា ឆ្នាំ២០១៨ ស្នើសុំព្រឹទ្ធសភាកោះប្រជុំជាវិសាមញ្ញ។

៣– កំណត់របៀបវារៈ កាលបរិច្ឆេទ និងសមាសភាពលេខាធិការប្រជុំវិសាមញ្ញ ព្រឹទ្ធសភានីតិកាលទី៤។

បន្ទាប់ពីបានពិនិត្យ និងពិភាក្សារួចមក គណៈកម្មាធិការអចិន្ត្រៃយ៍ព្រឹទ្ធសភា បានកំណត់យកថ្ងៃព្រហស្បតិ៍ ទី១១ ខែតុលា ឆ្នាំ២០១៨ វេលាម៉ោង៨:០០នាទីព្រឹក បើកសម័យប្រជុំវិសាមញ្ញព្រឹទ្ធស​ភា នីតិកាលទី៤ ដោយមានរបៀប​វារៈដូចខាងក្រោម៖

១–   ប្រកាសទទួលស្គាល់សមាជិកព្រឹទ្ធសភាថ្មី នីតិកាលទី៤។

២–   បោះឆ្នោតជ្រើសរើសអនុប្រធានទី១ព្រឹទ្ធសភា នីតិកាលទី៤។