តាកែវ៖ នៅព្រឹកថ្ងៃទី០៩ ខែកក្កដា ២០១៨ នេះ មានករណីកម្មកររោងចក្រជាង២រយនាក់បានដួលសន្លប់ជាបន្តបន្ទាប់ នៅក្នុងរោងចក្រផលិតស្បែកជើង ប៉ុនតឹស ហ្វ៊ូតវែរ ដែលមានទីតាំងនៅភូមិខ្លាក្រហឹម ឃុំតាភេម ស្រុកត្រាំកក់ ខេត្តតាកែវ ។ ឯកឧត្តមឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ បានឲ្យដឹងថា ក្នុងករណីកម្មកររោងចក្រដួលសន្លប់នេះ មកទល់ពេលមានចំនួន ៣៣១នាក់ហើយ ក្នុងនោះត្រូវបានដឹកយកទៅសង្គ្រោះបន្ទាន់នៅតាមមន្ទីរពេទ្យ នៅក្នុងស្រុក និងក្នុងក្រុងដូនកែវ ។ លោកបានបន្តថា តាមការសន្និដ្ឋានជាជំហានដំបូង គឺនៅមុនពេលកើតហេតុនៃការណ៍ដួលសន្លប់នោះ គឺមានកម្មករម្នាក់បានកាប់ស្បែកជើងត្រូវចំដៃខ្លួនឯង ពេលនោះក៏កើតជាការស្រែកឆោរឡោ ពេញក្នុងអគាររោងកច្រតែម្តង ភ្លាមនោះក៏មានកម្មករដួលសន្លប់ ជាបន្តបន្ទាប់ ហើយអ្នកខ្លះរត់ចេញមកក្រៅអគារ ។