ភ្នំពេញ : ប្រជាពលរដ្ឋបានរាយការណ៍ឲ្យដឹងថា មុនកើតហេតុមានបុរសម្នាក់អាយុប្រហែល៣០ឆ្នាំ ដេកក្នុងរថយន្តម៉ាក កាមរីហាយប្រ៊ីដ ពណ៍ខ្មៅ ពាក់ស្លាកលេខភ្នំពេញ២N ៨៧៧៨ សេរីឆ្នាំ២០០៧ ហើយបន្ទាប់ស្រាប់តែភ្ញាក់ដឹងខ្លួន និងបើករថយន្តបន្តដំណើរទៅមុខ ស្រាប់តែបួងចង្កូតមិនទាន់ក៏ជ្រុលបុកទ្វារ និងរបងផ្ទះ បណ្ដាលឲ្យរថយន្តខ្ទេចពីចំហៀងខាងឆ្វេង និងខូចខាតរបងថ្ម និងទ្វារដែកផងដែរ។ ហេតុការនេះ បានកើតឡើងនៅវេលាម៉ោង៥និង៣០នាទីព្រឹកថ្ងៃទី០៥ ខែកក្ដដា ឆ្នាំ២០១៨ នៅចំណុចផ្ទះលេខ២៦ តាមបណ្ដោយផ្លូវ៤៨០ ក្រុម២៤ ស្ថិតនៅភូមិ៣ សង្កាត់ផ្សារដើមថ្កូវ ខណ្ឌចំការមន។

ក្រោយកើតហេតុបុរសជាអ្នកបើករថយន្តបើកទ្វារចុះពីលើរថយន្តរួចដកសោរថយន្តប្រគល់ស្រ្តីជាម្ចាស់ផ្ទះ ដើម្បីខ្លួនទៅរកលុយមកសងការខូចខាតម្ចាស់ផ្ទះ។ រហូតម៉ោង៩ព្រឹក នៅតែមិនឃើញខាងម្ចាស់រថយន្ត មកដោះស្រាយ ទើបស្រ្តីម្ចាស់ផ្ទះប្ដឹងសមត្ថកិច្ចជំនាញវាស់វែងចាត់ការតាមផ្លូវច្បាប់ និងទាមទារសំណង៥០០ដុល្លាសហរដ្ឋអាម៉េរិក។ បន្ទាប់ពីសមត្ថកិច្ចធ្វើការវាស់វែងរួច រថយន្តត្រូវបានសមត្ថកិច្ចយកមករក្សាទុកនៅអធិការដ្ឋាន នគរបាលខណ្ឌចំការមន ដើម្បីធ្វើការស្រាវជ្រាវរកម្ចាស់រថយន្តមកធ្វើការដោះស្រាយ។