អតីតយុទ្ធជននៅខេត្តប៉ៃលិន៣៩៩នាក់ទទួលបានអំណោយពីសប្បុរសជននិងសាកសួរសុខទុក្ខពីអភិបាលខេត្តប៉ៃលិន

អត្ថបទដោយ៖
Kien Sereyvuth

ប៉ៃលិន៖អតីតយុទ្ធកម្ពុជានៅខេត្តប៉ៃលិនចំនួន៣៩៩នាក់ទទួលបានអំណោយពីសប្បុរសជនមកពីក្រុមហ៊ុន Pailin Flamingo ដើម្បីដោះស្រាយជីវភាពនិងសម្រួលការលំបាកនិងមានការសំណេះសំណាលសាកសួរសុខទុក្ខពីអភិបាលខេត្តប៉ៃលិន លោក ផាន់ ចាន់ថុល នៅ ព្រឹកថ្ងៃសុក្រទី១៥ ខែមិថុនា ឆ្នាំ២០១៨។
អភិបាលខេត្តប៉ៃលិន លោក ផាន់ ចាន់ថុល បានមានប្រសាសន៍ឱ្យដឹងថា៖ ប្រទេសកម្ពុជាទទួលបានសុខសន្តិភាព និងការអភិវឌ្ឍប្រទេសរីកចម្រើនរហូតមកដល់បច្ចុប្បន្ននេះដោយសារការរួមចំណែកធ្វើពលីកម្មដ៏ធំធេង និងមិនអាចកាត់ថ្លៃបានចំពោះ​យុទ្ធជន យុទ្ធនារី ប្រជាជន និងអ្នកស្នេហាជាតិ​ដើម្បីបុព្វហេតុជាតិ​មាតុភូមិ និងប្រជាជននៅ​គ្រប់ដំណាក់កាល ។លោកអភិបាលខេត្តបានមានប្រសាសន៍បញ្ជាក់ថា៖ ប្រទេសកម្ពុជា​បានឆ្លងកាត់​នូវ​សង្គ្រាម ជាច្រើនទសវត្សនិងរបបប្រល័យពូជសាសន៍ដែលបានបំផ្លិចបំផ្លាញសង្គមជាតិខ្ទេចខ្ទីដល់ឬសគល់ ព្រមទាំងបានបន្សល់ទុក​នូវអតីតយុទ្ធជន ដែលជាជនពិការ និវត្តន៍​ជន ជនបាត់បង់សមត្ថភាពការងារ និង​គ្រួសារ​​យុទ្ធជនពលី មរណៈជាច្រើន ហើយចាប់តាំងពីក្រោយថ្ងៃរំដោះ ៧ មករា ១៩៧៩ រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ជានិច្ចជាកាលបានគិត​គូ​ដល់​សុខ​​ទុក្ខ និងជីវភាពរស់នៅរបស់កងកម្លាំង​ប្រដាប់អាវុធគ្រប់ប្រភេទ តាមរយៈការអភិវឌ្ឍមូលដ្ឋាន សម្ភារៈ ជីវភាព ការចុះសួរសុខទុក្ខដល់អង្គភាព ។ ដោយឡែក​ចំពោះអតីតយុទ្ធជន សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បានផ្តល់នូវការឧបត្ថម្ភគាំទ្រជាច្រើន និងបាន​កសាងផ្ទះជូនអតីតយុទ្ធជនក្រីក្រ តាមរយៈសមាគមអតីតយុទ្ធជនកម្ពុជាបានរាប់រយខ្នងនៅតាមសហគមន៍ និងផ្តល់​អំណោយសប្បុរសធម៌​ដល់អតីតយុទ្ធជនជាច្រើនទៀត ។ ទន្ទឹមនឹងនោះ ក្រសួងសង្គមកិច្ច អតីតយុទ្ធជន និងយុវនីតិ​សម្បទា ក៏​ដូចជា​​អាជ្ញាធរមូលដ្ឋាន និងស្ថាប័នពាក់ព័ន្ធនានា បានផ្តល់អាទិភាពដល់បងប្អូនអតីតយុទ្ធជន និងក្រុមគ្រួសារ ក្នុងការទទួលបាន​នូវសេវាសាធារណៈផ្សេងៗ ស្របតាមគោលនយោបាយរបស់រាជរដ្ឋាភិបាលផងដែរ និងបាន ដោះស្រាយបញ្ហាទាំងនោះ​ជា​បន្ត​បន្ទាប់ ដោយបន្តពង្រឹង និងពង្រីកសេវាបណ្តុះបណ្តាលជំនាញ និងឥទានជាដើម ដើម្បីឲ្យបងប្អូនអតីត​យុទ្ធជន​ទទួលបាននូវសមត្ថភាព និងលទ្ធភាព ដើម្បីអភិវឌ្ឍន៍ជីវភាពគ្រួសារឲ្យ​កាន់តែប្រសើរឡើង​។ ក្នុងឱកាសនោះលោកអភិបាលខេត្តប៉ៃលិន ផាន់ ចាន់ថុល ក៏បានអំពាវនាវឱ្យបងប្អូនអតីតយុទ្ធជនកម្ពុជា ត្រូវនាំគ្នាចេញទៅបោះឆ្នោតសកលជ្រើសតាំងតំណាងរាស្រ្ត រដ្ឋសភា នៅថ្ងៃទី២៩ ខែកក្កដា ឆ្នាំ២០១៨ ខាងមុខនេះឱ្យបានគ្រប់គ្នា ដើម្បីបំពេញកាតព្វកិច្ចជាប្រជាពលរដ្ឋ ដែលមានសិទ្ធិចូលរួមបោះឆ្នោតតំណាងថ្នាក់នាំរបស់ខ្លួន កសាងអភិវឌ្ឍន៍ប្រទេសកម្ពុជាឱ្យកាន់តែរីកចម្រើន។
         សូមបញ្ជាក់ថា៖ តាមរយៈអភិបាលខេត្តប៉ៃលិន ផាន់ ចាន់ធុល អគ្គនាយកក្រុមហ៊ុន Pailin Flamingo បានឧបត្ថម្ភ ដល់អតីត​យុទ្ធជន ចំនួន ៣៩៩នាក់ ដោយក្នុងម្នាក់ៗ ទទួលបានឃីត ១កញ្ចប់ មាន អង្ករ ទឹកត្រី ទឹកសុទ្ធ មី ត្រីខ ស្ករស ថ្នាំដុសធ្មេញ អំបិល និងថវិការ ចំនួន ២ម៉ឺនរៀល៕

Kien Sereyvuth
Kien Sereyvuth
IT Technical Support
ads banner
ads banner
ads banner