Nokia សហការជាមួយ NASA គ្រោងសាងសង់បណ្តាញទំនាក់ទំនងចល័តជាលើកដំបូងនៅលើភពព្រះច័ន្ទ
ហ្វាំងឡង់៖ ទីភ្នាក់ងារអវកាស NASA របស់សហរដ្ឋអាមេរិក បានជ្រើសរើសក្រុមហ៊ុន Nokiaក្នុងការសាងសង់បណ្តាញទំនាក់ទំនងចល័តជាលើកដំបូងលើភពព្រះច័ន្ទ នៅចុងឆ្នាំ២០២២ខាងមុខ នេះបើតាមសារព័ត៌មានរ៉យទ័រនៅថ្ងៃទី១៩ ខែតុលា ឆ្នាំ២០២០ ។
ក្រុមហ៊ុន Nokia នឹងធ្វើជាដៃគូរសហការជាមួយក្រុមហ៊ុនឯកជនផ្នែកអវកាស Intuitive Machines ដែលមានមូលដ្ឋានក្នុងរដ្ឋតិចសាស របស់សហរដ្ឋអាមេរិក ក្នុងការនាំយកឧបករណ៍ផ្នែកបណ្តាញទៅកាន់ភពព្រះច័ន្ទ តាមយានអវកាសរបស់ខ្លួន ។ បន្ទាប់ពីការនាំយកឧបករណ៍ផ្នែកបណ្តាញរួចហើយ បណ្តាញទំនាក់ទំនងនេះ នឹងផ្គុំខ្លួនឯង ហើយបង្កើតនូវប្រព័ន្ធទំនាក់ទំនងរយ:ចម្ងាយឆ្ងាយ មានល្បឿនលឿន LTE ជាលើកដំបូងលើភពព្រះច័ន្ទ ។
សូមជំរាបថា ការបង្កើតបណ្តាញប្រព័ន្ធទំនាក់ទំនង Lunar network លើភពព្រះច័ន្ទនោះ គឺជាផ្នែកមួយនៃកិច្ចខិតខំប្រឹងប្រែងរបស់ទីភ្នាក់ងារអវកាស NASA ក្នុងការនាំមនុស្សទៅកាន់ភពព្រះច័ន្ទនៅឆ្នំា២០២៤ខាងមុខនេះ និងសាងសង់លំនៅដ្ឋានរយៈពេលយូរនៅទីនោះ ក្រោមគម្រោងកម្មវិធី Artemis ដែលមានបច្ចេកវិទ្យាខ្ពស់របស់ខ្លួន ។ កម្មវិធីនេះត្រូវគេដឹងថា នឹងនាំមនុស្សស្រីដំបូង ហើយបន្ទាប់មកនឹងនាំមនុស្សប្រុសដំបូងទៅកាន់ភពព្រះច័ន្ទ ៕
