ការប្រកួតជ្រើសរើសជើងឯកថ្នាក់ជាតិ កីឡាវាយកូនឃ្លីលើតុ លើកទី១ ឆ្នាំ២០២០ ទាកទាញ់បាន២២ក្រុមមកពីទូទាំងរាធានី-ខេត្តក្រុងចូលរួម
ការប្រកួតជ្រើសរើសជើងឯកថ្នាក់ជាតិ ពានរង្វាន់សហព័ន្ធកីឡាវាយកូនឃ្លីលើតុកម្ពុជា លើកទី១ ប្រចាំឆ្នាំ២០២០ បានចាប់ផ្តើមការប្រកួតជាផ្លូវការ នារសៀលថ្ងៃទី១៩ ខែតុលា ឆ្នាំ២០២០ នៅសាលសហព័ន្ធកីឡាវាយកូនឃ្លី លើតុកម្ពុជា ដោយមានការអញ្ជើញចូលរួមក្រោមអធិបតីភាព ពីសំណាក់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ ឯកឧត្តម គៀត ច័ន្ទថារិទ្ធ ប្រធានសហព័ន្ធកីឡាវាយកូនឃ្លីលើតុ ឯកឧត្តម វ៉ាត់ ចំរើន អគ្គលេខាធិការគណកម្មការអូឡាំពិកកម្ពុជា តំណាងឯកឧត្តមបណ្ឌិត ថោង ខុន រួមជាមួយថ្មាក់ដឹកនាំ និងមន្ត្រីកីឡាករ កីឡាការិនី វាយកូនឃ្លីលើតុជាច្រើនទៀតផងដែរ ។
បើតាមលោក ស៊ុន សុធារិទ្ធ អគ្គលេខាធិការសហព័ន្ធកីឡាវាយកូនឃ្លីលើតុកម្ពុជា បានបញ្ជាក់ថា ការប្រកួតជ្រើសរើសជើងឯកថ្នាក់ជាតិ ពានរង្វាន់សហព័ន្ធកីឡាវាយកូនឃ្លីលើតុកម្ពុជា លើកទី១នេះរៀបចំឡើងក្នុងន័យ បំផុសចលនា យុវកីឡាករ-កីឡាការិនី ឲ្យងាកមកចាប់អារម្មណ៍ប្រភេទកីឡានៅក្នុងប្រទេសកម្ពុជាមួយនេះ កាន់តែផុសផុល សម្រាប់ស្វែងរកធនធានឆ្នើមយកមកបណ្តុះបណ្តាលត្រៀមការប្រកួតជាលក្ខណៈអន្តរជាតិ នាពេលខាងមុខ ។ លោក ស៊ុន សុធារិទ្ធ បានអោយដឹងថា ចំពោះវិញ្ញាសាដាក់ប្រកួត មានពីរក្របខ័ណ្ឌ គឺក្របខ័ណ្ឌ ក១ មានអាយុចាប់ពី១៩ឆ្នាំឡើងទៅ និងក្របខ័ណ្ឌ ក២ មានអាយុ១៨ឆ្នាំចុះ ដោយបែងចែកក្នុងមួយក្របខ័ណ្ឌមាន ៤វិញ្ញាសារ ដោយទាកទាញបាន ក្រុម ចូលរួមប្រកួតប្រជែង ចំនួន២២ មកពីទូទាំងរាធានី-ខេត្តក្រុង។
ឯកឧត្តម វ៉ាត់ ចំរើន បានលើកឡើងដែលថា «ដើម្បីជំរុញបន្ថែមល្បឿនអភិវឌ្ឍគុណផលកីឡា កម្រិតខ្ពស់ ដល់កីឡាករ កីឡាកាវិនីវាយកូនឃ្លីលើតុ គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ (SEA Games) លើកទី៣២ ឆ្នាំ២០២៣ ហៅកាត់ គ.ជ.ប.អ (CAMSOC) បានឯកភាពជាមួយក្រុមជំនាញកីឡា និងក្រុមសិក្សាស្រាវជ្រាវមកពីក្រុមហ៊ុនកីឡាអន្តរជាតិ តំណាងឲ្យអាជ្ញាធរកីឡា នៃសាធារណរដ្ឋប្រជាមានិតចិនផ្តល់ចំនួនកីឡាករ កីឡាការិនី វាយកូនឃ្លីលើតុចំនួន៨នាក់ ត្រៀមទៅហ្វឹកហាត់រយៈពេលវែង នៅសាធារណរដ្ឋប្រជាមានិតចិន។ ដូចនេះ សូមសហព័ន្ធត្រៀមលក្ខណៈជ្រើសរើសកីឡាករ កីឡាការិនីមានទេពកោសល្យ មានវិន័យ ក្រមសីលធម៌កីឡាល្អបញ្ជូនទៅធ្វើការហ្វឹកហាត់ ឲ្យទទួលបានជោគជ័យត្រឡប់មកប្រកួតកីឡា SEA Games ឆ្នំ២០២៣ដណ្ដើមយកមេដាយមាស ចំនួន១គ្រឿង សម្រាប់កីឡាវាយកូនឃ្លីលើតុ តាមតារាងសន្ទស្សន៍មេដាយ ដែលគណៈកម្មាធិការជាតិអូឡាំពិកកម្ពុជាបានប្រកាសក្នុងមហាសន្និបាតនាដើមឆ្នាំ២០២០ កន្លងមក»។
សូមបញ្ជាក់ថា ការប្រកួតជ្រើសរើសជើងឯកថ្នាក់ជាតិ ពានរង្វាន់សហព័ន្ធកីឡាវាយកូនឃ្លីលើតុកម្ពុជា លើកទី១ ប្រចាំឆ្នាំ២០២០នេះ ទទួលបានការគាំទ្រថវិការមួយចំនួនពីក្រសួងអប់រំ យុវជន និងកីឡាព្រទាំងសមាជិកគណៈកម្មាធិការសហព័ន្ធផងដែរ ដោយមានប្រតិភូគ្រូបង្វឹកចូលរួមចំនួន៤១នាក់ស្រី១នាក់ អត្តពលិកក្របខ័ណ្ឌ ក១ មានចំនួន ៩០រូប (ស្រី៥នាក់) អត្តពលិកក្របខ័ណ្ឌ ក២ មានចំនួន ៤២នាក់ (ស្រី១៣នាក់) សរុបទាំងអស់១៧៣នាក់ (ស្រី១៩នាក់)៕
