រដ្ឋមន្ដ្រី ក្រសួងអប់រំ ជឿថា សៀវភៅគ្រូមុខវិជ្ជាអប់រំកាយថ្មី និងផ្ដល់សារៈប្រយោជន៍យ៉ាងសំខាន់ ដល់សិស្សានុសិស្ស សម្រាប់អភិវឌ្ឍប្រទេសជាតិនាពេលអនាគត
(ភ្នំពេញ)៖ ឯកឧត្តម ហង់ជួន ណារ៉ុន រដ្ឋមន្ដ្រីក្រសួងអប់រំ យុវជន និងកីឡា បញ្ជាក់ថា សៀវភៅគ្រូមុខវិជ្ជាអប់រំកាយ គឺជាសមិទ្ធផលថ្មីមួយ នៃកម្មវិធីអប់រំកាយបែបថ្មី ដើម្បីផ្ដល់នូវមានសារៈប្រយោជន៍យ៉ាងសំខាន់ដល់សិស្សានុសិស្ស និងទទួលបាននូវវិជ្ជាសម្បទា បំណិនសម្បទា កាយសម្បទា និងចរិយាសម្បទា ក៏ដូចជារួមចំណែកយ៉ាងសំខាន់ ក្នុងវិស័យអប់រំកាយ ក្នុងការផលិត ធនធានមនុស្ស កសាង និងអភិវឌ្ឍប្រទេសជាតិនាពេលអនាគត។ ការលើកឡើងយ៉ាងដូច្នេះ របស់ឯកឧត្តម រដ្ឋមន្ត្រី ក្នុងឱកាសអញ្ជើញជាអធិបតីភាពក្នុងពិធី បិទបញ្ចប់គម្រោងសហប្រតិបត្តិការរៀបចំសៀវភៅគ្រូមុខវិជ្ជាអប់រំកាយ សម្រាប់គ្រឹះស្ថានមធ្យមសិក្សាបឋមភូមិ កាលពីល្ងាចថ្ងៃទី២២ ខែតុលា ឆ្នាំ២០២០ ។
ឯកឧត្តម ហង់ជួន ណារ៉ុន បានវាយតម្លៃខ្ពស់ ចំពោះភាគីពាក់ព័ន្ធ ដែលបានខិតខំបំពេញបេសកកម្ម ដែលមានចរិតជាប្រវត្តិសាស្ដ្រនេះឡើង សម្រាប់ការងារអប់រំកាយក្នុងគ្រឹះស្ថានសិក្សាក្នុងប្រទេសកម្ពុជា។ លើសពីនេះ ឯកឧត្តមរំពឹងថា ភាគីជប៉ុន ក៏នឹងបន្ដជួយក្រសួងអប់រំ ទាំងផ្នែកអប់រំ យុវជន និងកីឡា ពិសេសដំណើរឆ្ពោះទៅរកជោគជ័យក្នុងការប្រកួតកីឡាស៊ីហ្គេម ឆ្នាំ២០២៣ ទាំងការរៀបចំទូទៅ និងការទទួលបានមេដាយច្រើនពីការប្រកួតផងដែរ។
សូមបញ្ជាក់ សៀវភៅគ្រូមុខវិជ្ជាអប់រំកាយ ដែលក្រសួងអប់រំ យុវជន និងកីឡា បានចុះអនុស្សារណៈយោគយល់គ្នា(MOU) ជាមួយទីភ្នាក់ការងារសហប្រតិបត្តិការអន្ដរជាតិនៃប្រទេសជប៉ុន(JICA) និងអង្គការមិនមែនរដ្ឋាភិបាលជប៉ុន បេះដូងមាស ដើម្បីដាក់ឲ្យដំណើរការក្នុងថ្នាក់មធ្យមសិក្សាបឋមភូមិ បានបញ្ចប់ការចងក្រងដោយជោគជ័យហើយ ក្រោយចំណាយពេលរៀបចំ និងចងក្រងអស់រយៈពេល ៣ឆ្នាំ និង ៩ខែ។បន្ទាប់ពីគម្រោង ដែលទទួលបានការគាំទ្រពីអង្គការ JICA និងអង្គការបេះដូងមាស បានអនុវត្តចាប់ពីដើមឆ្នាំ២០១៧ ដល់ខែកញ្ញា ឆ្នាំ២០២០កន្លងទៅ។
គួរបញ្ជាក់ថា ការចងក្រងសៀវភៅគ្រូមុខវិជ្ជាអប់រំកាយខាងលើ បានយករាជធានី-ខេត្តចំនួន៣ ជាគោលដៅ រួមមានរាជធានីភ្នំពេញ ខេត្តបាត់ដំបង និងខេត្តស្វាយរៀង ដើម្បីប្រមូលធាតុចូលតាមរយៈការរៀបចំសិក្ខាសាលាចំនួន ២៧លើក ព្រមទាំងការបង្រៀនទ្រឹស្ដី និងការអនុវត្តជាក់ស្ដែង។ កន្លងមកអង្គរបេះដូងមាស បានបោះពុម្ភសៀវភៅគ្រូអប់រំកាយសម្រាប់មធ្យមសិក្សាបឋមភូមិចំនួន ៦០០ក្បាលរួចមកហើយ តែឆាប់ៗខាងមុខ ក្រសួងអប់រំ នឹងបោះពុម្ភបន្ថែម ១៦,០០០ក្បាលទៀត ដើម្បីចែកជូនដល់សាលាមធ្យមសិក្សាបឋមភូមិទូទាំងប្រទេស៕
