(ភ្នំពេញ)៖ ដោយទទួលបានការគាំទ្រពី​ក្រសួង​អប់រំយុវជននិងកីឡា នាព្រឹកថ្ងៃទី២៣ខែតុលាឆ្នាំ២០២០នេះ សហព័ន្ធកីឡាការ៉ាតេដូកម្ពុជា បានរៀបចំការប្រកួត ជ្រើសរើសជើងឯកថ្នាក់ជាតិ កីឡាការ៉ាតេដូកម្ពុជា ឆ្នាំ២០២០ នៅមជ្ឈមណ្ឌលហ្វឹកហាត់កីឡាការ៉ាតេដូ សាលាភូមិន្ទភ្នំពេញ។ ពិធីបើកការប្រកួតនេះ បានប្រព្រឹត្តទៅ ក្រោមវត្តមាន ឯកឧត្តម វ៉ាត់ ចំរើន អគ្គលេខាធិការ តំណាង ឯកឧត្តម បណ្ឌិត​សភាចារ្យ  អូន ព័ន្ធមុនីរ័ត្ន ប្រធាន​សហព័ន្ធ​កីឡាការ៉ាតេដូ កម្ពុជា។

ថ្លែងក្នុងពិធីបើកការប្រកួត ឯកឧត្តម វ៉ាត់ ចំរើន បានគូសបញ្ជាក់ថា ការប្រកួត ជ្រើសរើសជើងឯក​ថ្នាក់​ជាតិ កីឡាការ៉ាតេដូកម្ពុជា មានការកើនឡើង១០ភាគរយ ពោលឆ្នាំនេះមានកីឡាករ​កីឡាការិនី​ចូលរួម​ចំនួន​២៣ សមាគមក្លិបទូទាំងប្រទេស សរុប ប្រតិភូ និង កីឡាករកីឡាការិនី ២៣៦នាក់ ។ មាន​ការ​កើន​ឡើងកីឡាករ កីឡាការិនីចំនួន ១០% នេះ គឺជាការខិតខំប្រឹងប្រែង របស់ថ្នាក់នាំ សហព័ន្ធ បាន​ធ្វើ​ការសម្របសម្រួល ក្លិបកីឡាការ៉ាតេ និងការធ្វើសមាហរណកម្ម សមាគម-ក្លិប រួមបញ្ចូលគ្នាតែមួយ ។ ឯកឧត្តម អគ្គលេខាធិការសហព័ន្ធ បានបញ្ជាក់បន្ថែមថា សហព័ន្ធកីឡាការ៉ាតេដូកម្ពុជាបាន ធ្វើ​កំណែ​ទម្រង់ ជាច្រើន ក្នុងនោះ  សហព័ន្ធក៏ធ្វើ កំណែទម្រង់នេះ  ទៅលើ ដើម្បីឲ្យស្របតាមនិយាម របស់​គណៈកម្មការប្រកួត របស់សហព័ន្ធកីឡាការ៉ាតេដូអន្តរជាតិ  ដោយបានចាប់​ផ្តើមតាំង​ពី​ឆ្នាំ២០១៩​ម្លេះ ។

សូមបញ្ជាក់ថា បើតាមរបាយការណ៍ របស់គណៈកម្មការរៀបចំការប្រកួត បានឲ្យដឹងថា ការប្រកួត ជ្រើសរើសជើងឯកថ្នាក់ជាតិ ឆ្នាំ២០២០ មានវិញ្ញាសាប្រកួតចំនួន៣៦ បែងចែកជា៣កម្រិត  គឺ កុមារ យុវជន និង  បុរស នារី ៕