ក្រសួងអភិវឌ្ឍន៍ជនបទ បានបើកយុទ្ធនាការផ្សព្វផ្សាយពីសុវត្ថិភាពចរាចរណ៍ផ្លូវគោកជូនប្រជាពលរដ្ឋនិងសិស្សានុសិស្ស ក្នុងខេត្តកំពង់ឆ្នាំង កំពង់ធំ និងខេត្តសៀមរាប ដើម្បីក្រើនរំឮកបងប្អូនពេលធ្វើដំណើរពិសេសក្នុងឱកាសឈប់សម្រាកពិធីបុណ្យអុំទូកខាងមុខឱ្យយល់ពីច្បាប់ចរាចរណ៏ ចេះប្រុងប្រយ័ត្នបង្ការខ្លួន ដើម្បីអាចបញ្ចៀសគ្រោះថ្នាក់ចរាចរណ៍ ដែលកើតឡើងជាយថាហេតុ – នេះបើតាមព័ត៌មានចេញផ្សាយនៅក្នុងវេបសាយរបស់ ក្រសួងព័ត៌មាន។
លោក គង់ សុវណ្ណ ទីប្រឹក្សាសុវត្ថិភាពចរាចរណ៍នៃគម្រោងកែលម្អផ្លូវជនបទជំហានទី២របស់ក្រសួងបានឲ្យដឹង កាលពីថ្ងៃទី២៣ តុលាថា ជារៀងរាល់ឆ្នាំ មុនព្រះរាជពិធីបុណ្យអុំទូក ក្រុមការងាររបស់ក្រសួងតែងតែចុះអប់រំពីច្បាប់ចរាចរណ៍ជូនប្រជាពលរដ្ឋ សិស្សសាលា មាតាបិតា អាណាព្យាបាល និងអាជ្ញាធរភូមិ-ឃុំ ស្រុក ឲ្យចេះច្បាប់ចរាចរណ៍ពេលធ្វើដំណើរបញ្ចៀសការមានគ្រោះថ្នាក់ចរាចរណ៏ជាយថាហេតុ។
លោកបន្តថា យុទ្ឋនាការក្នុងខេត្តទាំង៣នោះ ធ្វើឡើង ក្នុងគោលបំណងលើកកម្ពស់ការយល់ដឹងស្តីពីសុវត្ថិភាពចរាចរណ៍ និងជំរុញឲ្យបងប្អូនក្នុងសហគមន៍ចេះគោរពច្បាប់ ចរាចរណ៍ ពេលធ្វើដំណើរលើដងផ្លូវ។ យុទ្ធនាការនេះ ក៏ជាផ្នែកមួយនៃសកម្មភាពអតិ្ថភាពរបស់កម្មវិធីសុវត្ថិភាពចរាចរណ៍ នៃគម្រោងកែលម្អផ្លូវជនបទ រួមចំណែកអនុវត្តន៍ ស្របតាមផែនការជាតិសុវត្ថិភាពចរាចរណ៍ផ្លូវគោករបស់រាជរដ្ឋាភិបាលកម្ពុជា ក្នុងទិសដៅកាត់បន្ថយចំនួនអ្នកស្លាប់ និងរបួសធ្ងន់ធ្ងរឲ្យបាន៥០% ។
លោកបន្តថា ក្រៅពីសារអប់រំច្បាប់ចរាចរណ៍ ក្រុមការងារបានហែក្បួនគោយន្ត ម៉ូតូនិងកង់ កាត់តាមទីប្រជុំជន សាលារៀន វត្តអារាម ភូមិអ្នកស្រុក ទីប្រជុំជនក្នុងខេត្តខាងលើនេះ ហើយអប់រំតាមរយៈឧបករណ៍បំពងសំឡេង។ លោក រំពឹងថាយុទ្ធនាការអប់រំច្បាប់ចរាចរណ៏នេះនឹងអាចរួមចំណែកកាត់បន្ថយចំនួនអ្នកស្លាប់នៅក្នុងប្រទេសកម្ពុជា ស្របតាមផែនការសកម្មភាពជាតិ សុវត្ថិភាពចរាចរណ៍ផ្លូវគោក ដែលរាជរដ្ឋាភិបាលបានកំណត់កាត់បន្ថយចំនួនអ្នកបាត់បង់ជីវិតដោយសារគ្រោះថ្នាក់ចរាចរណ៍ឱ្យបាន ៥០% នាឆ្នាំ២០២១ខាងមុខ។
តាមរបាយការណ៍នគរបាលចរាចរណ៍ និងសណ្តាប់ធ្នាប់សាធារណៈនៃអគ្គស្នងការនគរបាលជាតិបង្ហាញថា ក្នុងត្រីមាសទី១ ឆ្នាំ២០២០នេះ គ្រោះថ្នាក់ចរាចរណ៍កើតឡើង៩១៦លើក បណ្តាលឱ្យមានជនរងគ្រោះដល់ជីវិតចំនួន៤៩៣នាក់ និងរបួសធ្ងន់ចំនួន៨៤៦នាក់។
សូមបញ្ជាក់ថា៖ គម្រោងកែលម្អផ្លូវជនបទជំហានទី២ នៃកម្មវិធីអប់រំផ្សព្វផ្សាយសុវត្ថិភាពចរាចរណ៍ ផ្លូវគោកដល់ប្រជាពលរដ្ឋ មានខេត្តចំនួន១០ គឺខេត្តកំពង់ចាម ត្បូងឃ្មុំ កំពង់ស្ពឺ តាកែវ ពោធិ៍សាត់ បាត់ដំបង បន្ទាយមានជ័យ កំពង់ឆ្នាំង កំពង់ធំ និងខេត្តសៀមរាប ៕ ប្រភព៖ ក្រសួងព័ត៌មាន
