វគ្គបណ្តុះបណ្តាលមន្រ្តីបច្ចេកទេសរៀបចំការប្រកួតកីឡាទូកក្តោង បានបញ្ចប់បិទបញ្ចប់ហើយ កាលពីថ្ងៃទី២៤ ខែតុលា ឆ្នាំ២០២០ ក្រោមអធិបតីភាព លោកជំទាវ អ៊ុល ភីរុណ អភិបាលរងខេត្តកែប និងមានការចូលរួមពីសំណាក់លោក ងួន ច័ន្ទសុជាតា ប្រធានមន្ទីរអប់រំ យុវជន និងកីឡា, លោក ទុយ ប៊ុនហឿង តំណាងនាយកដ្ឋានអប់រំកាយ និងកីឡា និងលោក សោម សុទ្ធរិទ្ធិពង្ស អគ្គលេខាធិការនៃសហព័ន្ធកីឡាទូកក្តោងកម្ពុជា នៅសណ្ឋាគារ ថ្ងៃបាំងឆ័ត្រ ខេត្តកែប ។
បើតាមការបញ្ជាក់របស់លោក សោម សុទ្ធរិទ្ធិពង្ស អគ្គលេខាធិការសហព័ន្ធកីឡាទូកក្តោងកម្ពុជា បានលើកឡើងថា ដោយរាជរដ្ឋាភិបាលកម្ពុជា បានសម្រេចទទួលធ្វើជាម្ចាស់ផ្ទះប្រកួតកីឡាស៊ីហ្គេមឆ្នាំ២០២៣ ដែលជាប្រវត្តិសាស្ត្ររបស់ប្រទេសកម្ពុជា ក្នុងនោះនឹងមានកីឡាទូកក្តោង ដែលជាកីឡាលើទឹកមួយប្រភេទមានប្រជាប្រិយភាពនៅក្នុងតំបន់ និងបណ្តាប្រទេសជាច្រើននៅលើពិភពលោក និងមានប្រតិភូ អត្តពលិក មកពីបណ្តាប្រទេសអាស៊ានយ៉ាងតិចចំនួន ០៨ប្រទេសចូលរួម ។

ការបង្កើតអោយមាន វគ្គបណ្តុះបណ្តាលមន្ត្រីបច្ចេកទេសរៀបចំការប្រកួតកីឡាទូកក្តោងជាលើកដំបូងនៅខេត្តកែប ដើម្បីអោយកីឡាទូកក្តោងរបស់កម្ពុជា មានមន្រ្តីបច្ចេកទេសរៀបចំការប្រកួតនៅថ្ងៃអនាគតកាន់តែច្រើន សម្រាប់ត្រៀមការប្រកួតកីឡាស៊ីហ្គេមឆ្នាំ២០២៣ និងដើម្បីបង្ហាញដល់មហាជន បានឃើញ និងស្វែងយល់អំពីប្រភេទកីឡាទូកក្តោងផងដែរ ។ លោកអគ្គលេខាធិការ បន្ថែមទៀតថា មន្រ្តីបច្ចេកទេសសម្រាប់រៀបចំការប្រកួតគឺពិតជាមានសារៈសំខាន់ណាស់លើការរៀបចំការប្រកួតយ៉ាងណាអោយមានគុណភាព និងស្របតាមច្បាប់ដែលសហព័ន្ធអន្តរជាតិបានកំណត់ រួមទាំងមានតម្លាភាពក្នុងការប្រកួតដល់កីឡាករដែលចូលរួមគ្រប់រូប។
សូមបញ្ជាក់ថា វគ្គបណ្តុះបណ្តាលមន្ត្រីបច្ចេកទេសនេះ ផ្តោតទៅលើ ទ្រឹស្តី និងការអនុវត្តជាក់ស្តែង ៖
១.ទ្រឹស្តី ៖ ប្រវត្តិនៃកីឡាទូកក្តោង សម្ភារៈប្រើប្រាស់សំរាប់រៀបចំការប្រកួត ក្បួនខ្នាតនៃទីលានប្រកួត ការប្រើប្រាស់សញ្ញាផ្សេងៗ និងបទបញ្ញាត្តិនៃការប្រកួត ។
២.ការអនុវត្ត ៖ អនុវត្តផ្ទាល់ដោយរៀបចំជាការប្រកួតមួយ និងមានការពន្យល់ផ្ទាល់នៅលើទឹក ។
ជាលទ្ធផលនៃវគ្គបណ្តុះបណ្តាលមន្ត្រីបច្ចេកទេសរៀបចំការប្រកួតកីឡាទូកក្តោងរយៈពេល៣ថ្ងៃកន្លងមកនេះ មានសិក្ខាកាម ២៤រូបទទួលបាន
-និទេ្ទសល្អ ចំនួន១១ រូប = ៤៦ %
-និទ្ទេសល្អបង្គួរ ចំនួន៧ រូប = ២៩ %
-និទេ្ទសមធ្យម ចំនួន៤ រូប = ១៧ %
-និទេ្ទសខ្សោយ ចំនួន២ រូប = ៨ %