ឧបនាយករដ្ឋមន្ត្រី យឹម ឆៃលី បានមានប្រសាសន៏ថា បើគ្មានសន្តិភាព ក៏គ្មានការអភិវឌ្ឍន៏ សេរីភាព សិទិ្ឋមនុស្ស និងលទ្ឋិប្រជាធិបតេយ្យឡើយ
កិច្ចប្រជុំបូកសរុបការងារគណបក្ស និងក្រុមការងារចុះជួយខេត្តកំពង់ចាម រយៈពេល៩ខែ ឆ្នាំ២០២០ និងលើកទិសដៅភារកិច្ចបន្ត ត្រូវបានរៀបចំធ្វើនៅសាលប្រជុំគណបក្សខេត្ត ព្រឹកថ្ងៃទី២៨ តុលា ឆ្នាំ២០២០ ក្រោមអធិបតីភាពឯកឧត្តមឧបនាយករដ្ឋមន្ត្រី យឹម ឆៃលី សមាជិកអចិន្ត្រៃយ៏គណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលចុះជួយខេត្តកំពង់ចាម ។
ឯកឧត្តម អ៊ុន ចាន់ថា សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធាន គណៈកម្មាធិការគណបក្សខេត្តកំពង់ចាម បានឡើងអានរបាយការណ៏បូកសរុបការងារគណបក្ស និងទិសដៅភារកិច្ចបន្ត ក្នុងនោះមានស្ថានការណ៏នយោបាយ សន្តិសុខសណ្តាប់ធ្នាប់សង្គម ស្ថានភាពសេដ្ឋកិច្ច និងជីវភាពរស់នៅរបស់ប្រជាពលរដ្ឋ ការផ្តល់សេវាសាធារណៈ ការដោះស្រាយបញ្ហាសង្គម ការអនុវត្តន៏គោលនយោបាយគាំពារសង្គម សកម្មភាពក្រុមគ្រូពេទ្យស្ម័គ្រចិត្តចុះព្យាបាលជូនប្រជាពលរដ្ឋដោយឥតគិតថ្លៃ ការងារសមាគមអតីតយុទ្ឋជន, ស្ថានភាពកូវីដ១៩ ក្នុងនោះមានវិធានការនៃការគ្រប់គ្រងអ្នកជម្ងឺ ការគ្រប់គ្រងពលករ ពលការិនី ការជួយឧបត្ថម្ភពលរដ្ឋដែលរងគ្រោះដោយកូវីដ១៩, ការប្រជុំជីវភាពគណបក្ស, ការចាត់តាំង និងការកសាងពង្រឹងគណបក្ស, ព្រមទាំងទិសដៅភារកិច្ចបន្តដែលមាន១១ចំណុចផងដែរ។
ឯកឧត្តម ឧបនាយករដ្ឋមន្ត្រី យឹម ឆៃលី បានមានប្រសាសន៏ថា សព្វថ្ងៃប្រទេសកម្ពុជាមានសុខសន្តិភាពពេញផ្ទៃប្រទេស មានស្ថេរភាពសេដ្ឋកិច្ច-សង្គម និងឯកភាពជាតិទាំងស្រុង ព្រមទាំងបានអភិវឌ្ឍន៏ប្រទេសជាតិឲ្យមានការរីកចំរើនលើគ្រប់វិស័យក្រោមយុទ្ឋសាស្ត្រឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្ត្រី ហើយប្រជាជនកម្ពុជាសព្វថ្ងៃកំពង់ទទួលបាននូវអត្ថមនុញ្ញផលនៃសុខសន្តិភាពនេះ។ ដូច្នេះ យើងត្រូវថែរក្សាឲ្យបាននូវសុខសន្តិភាពទោះក្នុងតម្លៃណាក៏ដោយ ព្រោះបើគ្មានសន្តិភាព ក៏គ្មានការអភិវឌ្ឍន៏ សេរីភាព សិទិ្ឋមនុស្ស និងលទ្ឋិប្រជាធិបតេយ្យឡើយ។ ថ្មីនេះ ក្រុមឧទ្ទាមក្រៅច្បាប់មានបំណងធ្វើបាតុកម្ម ផ្តួលរំលំរដ្ឋាភិបាលស្របច្បាប់ក្រោមលេសចោទប្រកាន់ថា មានកងទ័ពចិននៅកម្ពុជា។ ឯកឧត្តម សង្កត់ធ្ងន់ថា ការស្វែងយល់ឲ្យបានច្បាស់ពីបញ្ហា និងសំណូមពរនានារបស់ប្រជាពលរដ្ឋតាមរយៈវេទិការសាធារណៈ គឺជាកិច្ចការចាំបាច់ដែលយើងត្រូវតែធ្វើ ហើយត្រូវដោះស្រាយរាល់បញ្ហាទាំងនោះប្រកបដោយសមធម៌ និងតម្លាភាព និងត្រូវរិះរកមធ្យោបាលគ្រប់បែបយ៉ាង ដើម្បីឆ្លើយតបតាមសំណូពររបស់ពួកគាត់ឲ្យមានប្រសិទ្ឋិភាព។ យើងត្រូវខិតខំបំពេញភារកិច្ចដែលរាជរដ្ឋាភិបាលបានប្រគល់ជូន ពិសេសសំរេចឲ្យបានជោគជ័យនូវកម្មវិធីនយោបាយដំណាក់កាលទី៤ របស់រាជរដ្ឋាភិបាល ដោយប្រើប្រាស់នូវធនធានសរុប មធ្យោបាយសរុប កំលាំងសរុប ព្រមទាំងធ្វើការសម្របសម្រួលគ្រប់ការងារ និងផ្សារភ្ជាប់ក្រុមការងារជាមួយប្រជាពលរដ្ឋ ជាពិសេសអនុវត្តនូវអភិក្រមទាំង៥ របស់សម្តេចតេជោនាយករដ្ឋមន្ត្រី គឺងូតទឹក ដុះក្អែល ឆ្លុះកញ្ចក់ ព្យាបាល និងវះកាត់។
ឯកឧត្តមក៏បានផ្តល់នូវយុទ្ឋសាស្ត្រ និងវិធានការជាក់ស្តែងនានារបស់គណបក្សខេត្ត ដើម្បីឆ្លើយតបទៅនឹងបំណងប្រាថ្នារបស់ប្រជាពលរដ្ឋ ក្នុងនោះទី១. បន្តចុះជួយពង្រឹង និងពង្រីកសមាជិកគណបក្សនៅមូលដ្ឋានដោយឈរលើទ្រឹស្តី “រក្សាចាស់ បង្កើតថ្មី លើមូលដ្ឋានដែលមានស្រាប់ និងសមាជិកបក្ស១នាក់ ជាសំលេងឆ្នោត១សន្លឹករបស់គណបក្ស”, ទី២. បន្តជំរុញការអភិវឌ្ឍ និងថែទាំហេដ្ឋារចនាសម្ព័នតាមជនបទ, ទី៣. បន្តធ្វើវេទិការសាធារណៈ, ទី៤.ពង្រឹងការត្រៀមរៀបចំខ្លួនសម្រាប់ការបោះឆ្នោតជ្រើសរើសឃុំ សង្កាត់ អាណត្តិទី៥ ឆ្នាំ២០២២ និងបោះឆ្នោតជ្រើសតាំងតំណាងរាស្ត្រនីតិកាលទី៧ ឆ្នាំ២០២៣, ទី៥. បន្តការយកចិត្តទុកដាក់គ្រប់គ្រងសមាជិកថ្មីដែលគ្រប់អាយុចុះបោះឆ្នោត និងបានចុះឈ្មោះរួចហើយនៅឆ្នាំ២០២០ និងទី៦. ស្ថាប័នពាក់ព័ន្ឋនៅថ្នាក់ខេត្ត ត្រូវបន្តអប់រំ និងតាមដានដោយយកចិត្តទុកដាក់ក្នុងវិធានការបង្ការ ទប់ស្កាត់ និងការពារការរាតត្បាតជម្ងឺកូវីដ១៩ ក្នុងខេត្តកំពង់ចាមរបស់យើង៕
