អតីតប្រធានាធិបតីកូរ៉េខាងត្បូងជាប់គុក១៧ឆ្នាំ ពីបទពុករលួយពេលនៅកាន់អំណាច
អតីតប្រធានាធិបតីកូរ៉េខាងត្បូងលោក Lee Myung-bak បានចេញដំណើរទៅកាន់ពន្ធនាគារនៅថ្ងៃចន្ទ ទី២ វិច្ឆិកា នេះ បន្ទាប់ពីតុលាការក្រុងសេអ៊ូល បានកាត់ទោសរូបលោកឲ្យជាប់ពន្ធនាគាររយៈពេល ១៧ឆ្នាំពីបទពុករលួយ និងបិទការប្តឹងឧទ្ធរណ៍ថែមទៀត។
លោក Lee អតីតប្រធានាធិបតីកូរ៉េខាងត្បូង ដែលធ្លាប់បានកាន់អំណាចចន្លោះពីឆ្នាំ២០០៨-២០១៣ ក្នុងវ័យ ៧៨ឆ្នាំរូបនេះធ្លាប់បានដឹកនាំប្រទេសកូរ៉េខាងត្បូង ឆ្លងកាត់វិបត្តិសេដ្ឋកិច្ចពិភពលោក នៅចន្លោះឆ្នាំ២០០៨-២០០៩ និងឈ្នះការដេញថ្លៃកីឡាអូឡាំពិករដូវរងារឆ្នាំ២០១៨ ប៉ុន្តែលោកត្រូវបានគណបក្សប្រឆាំងរិះគន់ថា លោកបានធ្វើឲ្យប៉ះពាល់យ៉ាងខ្លាំង ដល់ស្ថាប័នប្រជាធិបតេយ្យ និងសេរីភាពនៃការបញ្ចេញមតិ។
លោក Lee ត្រូវបានផ្តន្ទាទោសឲ្យជាប់ពន្ធនាគាររយៈពេល ១៥ឆ្នាំ ជាលើកដំបូងពីបទកឹបកេងប្រាក់ និងទទួលសំណូកនៅចុងឆ្នាំ២០១៨ ហើយត្រូវជាប់ពន្ធនាគារតាំងពីពេលនោះ ក្រោយមកសាលាឧទ្ធរណ៍បានបង្កើនទម្ងន់ទោសរហូតដល់ ១៧ឆ្នាំ ប៉ុន្តែត្រូវបានអនុញ្ញាតឲ្យនៅក្រៅឃុំបណ្តោះអាសន្ន រង់ចាំការប្តឹងបន្តទៅកាន់តុលាការកំពូល។
តុលាការកំពូលបានសម្រេចកាត់ទោសលោក Lee ឲ្យជាប់ពន្ធនាគាររយៈពេល ១៧ឆ្នាំ ពីបទកឹបកេងប្រាក់ ២២លានដុល្លារ និងទទួលយកសំណូកជាច្រើនទៀត។ បន្ថែមពីលើនេះ លោក Lee ក៏ត្រូវរងការពិន័យជាប្រាក់ ១៣ពាន់លានវ៉ុន ក៏ដូចជាការដកហូតទ្រព្យសម្បត្តិចំនួន ៥.៧ពាន់លានវ៉ុនផងដែរ៕ ប្រភពពី CNA
