លោក ដូណាល់ ត្រាំ គំរាមបណ្តេញវេជ្ជបណ្ឌិត ហ្វូស៊ី ពីការងារ នៅក្រោយថ្ងៃបោះឆ្នោតសហរដ្ឋអាមេរិក
អាមេរិក៖ ប្រធានាធិបតីអាមេរិកលោក ដូណាល់ ត្រាំ បញ្ជាក់ថា លោកនឹងបណ្តេញវេជ្ជបណ្ឌិត អាន់តូនី ហ្វូស៊ី ពីការងារនៅក្រោយថ្ងៃបោះឆ្នោតអាមេរិក ចំពេលដែលលោកកាន់តែមានជម្លោះខ្លាំងឡើងជាមួយអ្នកឯកទេសជំងឺឆ្លងកំពូលរបស់អាមេរិករូបនេះ នេះបើតាមសារព័ត៌មាន AP នៅថ្ងៃទី០២ ខែវិច្ឆិកា ឆ្នាំ២០២០ ។
ថ្លែងទៅកាន់ក្រុមអ្នកគាំទ្រលោកក្នុងទីក្រុង Opa-locka ក្នុងរដ្ឋ Florida នៅថ្ងៃចន្ទនេះ លោក ដូណាល់ ត្រាំ បានបង្ហាញពីអារម្មណ៍មិនសប្បាយចិត្តរបស់លោកដែលថា ករណីផ្ទុះឡើងនៃជំងឺកូវីដ១៩ ដែលនៅពេលនេះបានសម្លាប់ពលរដ្ឋអាមេរិកអស់ជាង២៣ម៉ឺន១ពាន់ហើយនោះ នៅតែជាព័ត៌មានដ៏សំខាន់នៅក្នុងប្រព័ន្ធផ្សព្វផ្សាយ ។ ក្រុមអ្នកគាំទ្រលោកនៅក្នុងពិធីនោះ ស្រែកបន្ទរនូវពាក្យថា «ដេញលោក ហ្វូស៊ី ចេញទៅ ។ លោក ត្រាំ បានឆ្លើយតបទៅអ្នកគាំទ្រលោកវិញថា កុំប្រាប់អ្នកដទៃ ទុកពេលឲ្យខ្ញុំបន្តិចរហូតដល់ក្រោយថ្ងៃបោះឆ្នោតសិន ហើយថា លោកអរគុណដល់អ្នកគាំទ្រលោកដែលបានផ្តល់យោបល់ឲ្យលោកធ្វើដូចនោះ ។
សូមបញ្ជាក់ថា លោកវេជ្ជបណ្ឌិត ហ្វូស៊ី ថ្មីៗនេះកាន់តែបានរិះគន់មិនសំចៃមាត់ដែលថា លោក ត្រាំ មិនបានស្តាប់យោបល់លោកទាក់ទងនឹងវិធីទប់ស្កាត់ជំងឺកូវីដ១៩ ដោយអ្នកជំនាញរូបនេះបញ្ជាក់ថា លោកមិនបាននិយាយជាមួយលោក ត្រាំ អស់រយៈពេលជាងមួយខែមកហើយ ៕
