ម្ចាស់បុរី VIP គោរពអរគុណអភិបាលរាជធានីភ្នំពេញ និងកងកម្លាំងទាំងអស់ ដែលបានដឹកនាំកងកម្លាំងមកជួយសម្អាតផ្ទះប្រជាពលរដ្ឋក្នុងបុរី VIP ជាលើកទី២
ភ្នំពេញ៖ ឯកឧត្តម ឃួង ស្រេង គណអភិបាលរាជធានីភ្នំពេញ បានដឹកនាំកម្លាំងចម្រុះរហូតដល់រាប់រយនាក់ ដោយមានទាំងរថយន្តបាញ់ទឹក និង រថយន្តបាញ់ថ្នាំសម្លាប់មូស និង មេរោគ ជាទ្រង់ទ្រាយធំ មកលាងសម្អាត និង ធ្វើអនាម័យជូនប្រជាពលរដ្ឋ ដែលរស់នៅនៅក្នុងបុរី VIP ដែលស្ថិតនៅខណ្ឌដង្កោ ។ សកម្មភាពចុះជួយស្របពេលទឹកស្រក និង ក្នុងពេលប្រជាពលរដ្ឋចូលមករស់នៅនៅក្នុងបុរីវិញដូចដើមវិញ នាពេលនេះ មិនត្រឹមតែពលរដ្ឋដែលទទួលផលប៉ុណ្ណោះទេ ដែលបង្ហាញអារម្មណ៍ត្រេកអរ សូម្បីតែថ្នាក់គ្រប់គ្រងបុរីគ្រប់ជាន់ថ្នាក់ ក៏បង្ហាញនូវការអរគុណចំពោះសកម្មភាពយកចិត្តទុកដាក់ខ្ពស់របស់ថ្នាក់ដឹកនាំសាលារាជធានីនេះផងដែរ ។
លោក វន វណ្ណៈ និង ហម រ៉ន ម្ចាស់គម្រោងបុរី VIP ដែលបានដុតដៃដុតជើង ក្នុងសកម្មភាពចុះសម្អាតរបស់សាលារាជធានីភ្នំពេញនេះ បានបង្ហាញនូវការសាទរយ៉ាងខ្លាំង ដែលថ្នាក់ដឹកនាំសាលារាជធានីភ្នំពេញ បានដឹកនាំកម្លាំងចម្រុះរហូតដល់រាប់រយនាក់ ចុះមកសម្អាតផ្លូវថ្នល់ និងផ្ទះសម្បែងរបស់ប្រជាពលរដ្ឋ ដើម្បីអោយប្រជាពលរដ្ឋដែលរងផលប៉ះពាល់ពីការជន់លិចកន្លងមក ទទួលបាននូវបរិស្ថានរស់នៅស្អាតដូចដើម ។ នេះជាសកម្មភាពលាងសម្អាតនៅក្នុងបុរីជាលើកទី២ហើយ បន្ទាប់ពីថ្ងៃទី២៩ ខែតុលា ឆ្នាំ២០២០ ឯកឧត្តមឧត្តមសេនីយ៍ឯក រ័ត្ន ស្រាង មេបញ្ជាការរងកងរាជអាវុធហត្ថលើផ្ទៃប្រទេស និង ជាមេបញ្ជាការកងរាជអាវុធហត្ថរាជធានីភ្នំពេញ ក៏បានដឹកនាំកម្លាំងជាច្រើនរយនាក់ មកលាងសម្អាងនៅក្នុងបុរីបែបនេះម្ដងដែរ ។
យ៉ាងណាមិញ លោកទាំងពីរចាត់ទុកថា សកម្មភាពដែលដឹកនាំដោយថ្នាក់ដឹកនាំរបស់សាលារាជធានីភ្នំពេញនាពេលនេះ មានទ្រង់ទ្រាយធំជាងមុន និងកាន់តែប្រសើរជាងមុន ដោយក្រៅពីលាងសម្អាត និង បោសសម្អាតសំរាម នៅក្នុងបុរីទាំងមូល ក៏មានការបាញ់ថ្នាំមូស និង បាញ់អាកុលសម្លាប់មេរោគ នៅគ្រប់ផ្ទះរបស់ប្រជាពលរដ្ឋ រួមទាំងតំបន់ជុំវិញ ដែលធ្វើអោយពលរដ្ឋនៅក្នុងបុរីរបស់លោក មានបរិស្ថានប្រកបដោយផាសុកភាពដូចដើម ។ ក្នុងនោះ ការអន្តរាគមន៍លើប្រព័ន្ធទឹកស្អាត និង លើប្រព័ន្ធអគ្គីសនីក្រោយទឹកស្រក ក៏ជាអ្វីដែលពលរដ្ឋនៅក្នុងបុរីរបស់លោកត្រូវការផងដែរ ។
លោក ស៊ុ ស៊ីដេត នាយកគ្រប់គ្រងទូទៅបុរី VIP បានគូសបញ្ជាក់ថា ក្រោយស្ថានភាពទឹកស្រក ទីតាំងរបស់បុរីមិនមានខូចខាតនូវប្រព័ន្ធលូ និង ផ្លូវចូលបុរីធ្ងន់ធ្ងរនោះទេ ដោយប្រព័ន្ធលូដែលមានការកកស្ទះ ត្រូវបានខាងបុរីស្ដា និង ជួសជុលឡើងវិញអស់ហើយ ។ គាប់ជួនជាខាងកងរាជអាវុធហត្ថរាជធានីភ្នំពេញ និង សាលារាជធានីភ្នំពេញ បានមកជួយសម្អាតនៅក្នុងបុរីចំនួន២លើនេះផង ទើបរឹតតែធ្វើអោយទីតាំងបុរីទាំងមូលកាន់តែល្អប្រសើរ ។
លោកបង្ហាញនូវអារម្មណ៍ត្រេកអរ បន្ទាប់ពីអភិបាលរាជធានីភ្នំពេញ បញ្ជាក់នៅចំពោះអ្នកកាសែតនាថ្ងៃនោះថា ក្រសួងធនធានទឹកបានគម្រោងរៀបចំរំដោះទឹក ពីតំបន់គីរីរម្យ មិនអោយហូរចាក់បង្កអោយលិចលង់ដងស្ទឹងព្រែកត្នោតនាឆ្នាំក្រោយៗ ទៀតទេ ដែលដំណោះស្រាយនេះ គឺលោកយល់ថា ពិតជាមិនធ្វើអោយតំបន់មួយផ្នែកក្នុងខណ្ឌដង្កោលិចលង់ទៀតឡើយ ដោយសារតែភាពជាក់ស្ដែង នៅក្នុងបុរីរបស់លោកគឺមិនដែលលិចបែបនេះទេ បើគ្មានភ្លៀងពីឥទ្ធិពលព្យុះ និង ទឹកជនខ្លាំងពីស្ទឹងព្រែកត្នោត ដែលបណ្ដាលមកពីបាក់ទំនប់នៅគីរីរម្យ កាលពីប៉ុន្មានសប្ដាហ៍មុន ៕
