ភ្នំពេញ៖ កម្លាំងល្បាតរបស់ប៉ុស្ដិ៍រដ្ឋបាលទឹកថ្លា នៃអធិការដ្ឋាននគរបាលខណ្ឌសែនសុខ  បានឃាត់ខ្លួនជនសង្ស័យ៣នាក់ជាបន្តបន្ទាប់កាលពីយប់មិញដែលពាក់ព័ន្ធ ករណីរក្សាទុក  និងប្រេីប្រាស់ដោយខុសច្បាប់នូវសារធាតុញៀន។ នេះបេីយោងតាមរបាយការណ៍របស់លោក វរសេនីយ៍ឯក ហួរ ម៉េងវ៉ាង  អធិការនគរបាលខណ្ឌសែនសុខ បានឲ្យដឹងនៅព្រឹកថ្ងៃទី៤ ខែវិច្ឆិកា ឆ្នាំ២០២០នេះ ។

ក្នុងរបាយការណ៍បានបញ្ចាក់ថា៖ ករណីទី១ ប្រើប្រាស់ដោយខុសច្បាប់នូវសារធាតុញៀន ជនសង្ស័យម្នាក់ ឈ្មោះ ទូច គឹមសេង  ភេទប្រុស អាយុ២១ឆ្នាំ ជនជាតិខ្មែរ មុខរបរគ្មាន ស្នាក់នៅបន្ទប់ជួល សង្កាត់ទឹកល្អក់២ ខណ្ឌទួលគោក (ពិនិត្យទឹកនោម) ។

ករណីទី២  រក្សាទុកដោយខុសច្បាប់នូវសារធាតុញៀន ជនសង្ស័យម្នាក់ ឈ្មោះ ង៉ែត រដ្ឋា  ភេទប្រុស អាយុ២៤ឆ្នាំ ជនជាតិខ្មែរ មុខរបរលាងឡាន ស្នាក់នៅកន្លែងលាងឡាន សង្កាត់ក្រាំងធ្នង់ ខណ្ឌសែនសុខ (ក្រាមសថ្លា០១កូនថង់តូច) ។

ករណីទី៣  រក្សាទុកដោយខុសច្បាប់នូវសារធាតុញៀន ជនសង្ស័យម្នាក់ ឈ្មោះ សោ ដា  ភេទប្រុស អាយុ៤២ឆ្នាំ ជនជាតិខ្មែរ មុខរបរកម្មករសំណង់ ស្នាក់នៅបន្ទប់ជួល សង្កាត់ចោមចៅ១ ខណ្ឌពោធិ៍សែនជ័យ (ក្រាមសថ្លា០២កូនថង់តូច និងម៉ូតូ០១គ្រឿង ម៉ាកសង់កូរ៉េ ពាក់ស្លាកលេខភ្នំពេញ1FQ-4521) ។

បច្ចុប្បន្ននេះ ជនសង្ស័យទាំង៣នាក់រួមទាំងវត្ថុតាង ត្រូវបានសមត្ថកិច្ចកសាងសំណុំរឿងបញ្ចូនទៅអធិការដ្ឋាននគរបាលខណ្ឌសែនសុខ ដើម្បីអនុវត្តន៍តាមនីតិវិធី៕ ដោយ៖ ភារ៉ា  និងប៊ុនធី