អាមេរិក៖ លេខាប្រតិបត្តិនៃអនុសញ្ញាអង្គការសហប្រជាជាតិ ស្តីអំពីអាកាសធាតុ UNFCCC លោកស្រី ផាទ្រីស្យា អេស្ពីណូសា បានបញ្ជាក់នៅក្នុងសេចក្តីថ្លែងការណ៍ថា សហរដ្ឋអាមេរិកនឹងនៅតែជាសមាជិកអនុសញ្ញា UNFCCC ស្ដីពីការប្រែប្រួលអាកាសធាតុ  ហើយយើងត្រៀមខ្លួនជាស្រេចដើម្បីជួយ ប្រសិនបើអាមេរិកចង់ចូលរួមក្នុងកិច្ចព្រមព្រៀងទីក្រុងប៉ារីសឡើងវិញ នេះបើតាមសារព័ត៌មានរ៉យទ័រនៅថ្ងៃទី០៤ ខែវិច្ឆិកា ឆ្នាំ២០២០ ។

ការលើកឡើងបែបនេះរបស់លោកស្រី ផាទ្រីស្យា អេស្ពីណូសា ត្រូវបានធ្វើឡើងបន្ទាប់ពីសហរដ្ឋអាមេរិកបានខ្លួនចេញជាផ្លូវការហើយ ពីកិច្ចព្រមព្រៀងទីក្រុងប៉ារីស ស្ដីពីការប្រែប្រួលអាកាសធាតុ នៅថ្ងៃពុធនេះ តាមការសន្យារយៈពេលមួយឆ្នាំរបស់លោកប្រធានាធិបតី ដូណាល់ ត្រាំ ។

សូមរំលឹកថា លោក ដូណាល់ ត្រាំ បានប្រកាសពីបំណងដកសហរដ្ឋអាមេរិក ចេញពីកិច្ចព្រមព្រៀងទីក្រុងប៉ារីស ស្ដីពីការប្រែប្រួលអាកាសធាតុកាលពីខែមិថុនា ឆ្នាំ២០១៧ ដោយអះអាងថា កិច្ចព្រមព្រៀងនេះបំផ្លាញដល់សេដ្ឋកិច្ចអាមេរិក ខណៈលោក ចូ បៃដិន សន្យាថា លោកនឹងអនុវត្តន៍កិច្ចព្រមព្រៀងអាកាសធាតុនេះវិញ ប្រសិនបើលោកជាប់ឆ្នោត ៕